រាជធានីភ្នំពេញ ៖ ពិតជាថ្មីប្លែកទៀតហើយ ក្រោយបងប្អូនមួយចំនួនអាចនឹងមានការយល់ច្រឡំថា លោកតាលោកយាយមួយគូកំពុងដឹកដៃគ្នាចូលរោងការផ្អើលពេញបណ្តាញសង្គម ដោយរូបភាពនេះត្រូវបានចែកចាយដោយចៅស្រីលោកតា និងលោកយាយនោះ ។ ជាការពិតណាស់ លោកតាគ្រោងឈុតកូនកំលោះពិតជាស្រស់សង្ហា…
រាជធានីភ្នំពេញ ៖ ពិតជាថ្មីប្លែកទៀតហើយ ក្រោយបងប្អូនមួយចំនួនអាចនឹងមានការយល់ច្រឡំថា លោកតាលោកយាយមួយគូកំពុងដឹកដៃគ្នាចូលរោងការផ្អើលពេញបណ្តាញសង្គម ដោយរូបភាពនេះត្រូវបានចែកចាយដោយចៅស្រីលោកតា និងលោកយាយនោះ ។
ជាការពិតណាស់ លោកតាគ្រោងឈុតកូនកំលោះពិតជាស្រស់សង្ហា លោកយាយគ្រោងឈុតកូនក្រមុំពិតជាស្រស់សោភា បានផ្ទឹមចងដៃបាច់ផ្កាស្លាដូចជាពិធីមង្គលការពិតៗទទួលបានការសារទរយ៉ាងខ្លាំងពីសំណាក់មហាជន ក្រោយបងប្អូនច្រឡំថា ស្មានតែពួកគាត់ការមែនទែន តែពេលបានដឹងការពិតដាច់ផ្ងារតែម្តង ។
តើបងប្អូនអាចទស្សន៍ទាយបានទេថា នេះជាពិធីអ្វីអោយប្រាកដនោះ? មានទាំងការចងដៃផង បាចផ្កាស្លា ដាក់អកកេះផង ជួលល្ខោនផង ហើយអ្វីដែលកាន់ភ្នាក់ផ្អើលនោះ មានញាតិមិត្តច្រើនតុលើសពីការរំពឹងទុក ដោយការល្មមៗនៅស្រុកស្រែចំការសុំចាញ់នោះ ។
គួរបញ្ជាក់ដែរថា នេះជាពិធី «ចម្រើនព្រះជន្មវឌ្ឍនមង្គល » ចំពោះលោកតាលោកយាយ ដោយជាការមូលមតិរបស់កូនៗក្នុងការលើករាសីចម្រើនព្រះជន្មដល់អ្នកមានគុណក្នុងថ្ងៃពិសេសមួយនេះ ពោលនេះជាការតបស្នងសងគុណចំពោះអ្នកមានគុណ ក៏ដូចជាការបំពេញនូវភាពកត្តញ្ញូកត្តវេទិតាធម៌ចំពោះព្រះរស់ ដែលមានឈ្មោះថា ពុកនិងម៉ែនេះ ។
តាមរយៈបទសម្ភាសន៍ជាមួយកម្មវិធី 60Buzz នៃសារព័ត៌មានកោះសន្តិភាព ប្រភពពីចៅស្រី
បង្តើតរបស់លោកតាលោកយាយអោយដឹងថា កាលពីកន្លងទៅ ជំនាន់លោកតាលោកយាយមិនបានធ្វើជាពិធីមង្គលអ្វីធំដុំនោះឡើយ គឺបានត្រឹមអង្គការចាប់គូអោយ តែដោយភ័ព្វនិស្ស័យរួមរស់នៅជាមួយគ្នាចេះយល់យល់ចិត្តគ្នា រហូតបានកូន៩នាក់ (ស្រី៥នាក់ និងប្រុស៤នាក់) ។ មិនតែប៉ុណ្ណោះ នាបច្ចុប្បន្នតាយាយមួយគូនេះ មានចៅរហូតដល់ទៅ២២រូបផងដែរនោះ ។
ប្រភពពីចៅបន្តថា លោកតាឈ្មោះ ចិន ខាវ អាយុ៦៥ឆ្នាំ ចំណែកលោកយាយនៅតែក្មេងឈ្មោះ អោម សយ អាយុ៦៦ឆ្នាំ ដោយពិធីមួយនេះធ្វើឡើងនៅទី១៧ ខែកុម្ភៈ ឆ្នាំ២០២៤ ស្ថិតក្នុងភូមិត្រពាំងជ្រៃ ឃុំព្រៃវិហារ ស្រុកគងពិសី ខេត្តកំពង់ស្ពឺ ដោយមានញាតិមិត្តច្រើនកុះករ រហូតដល់ទៅ ៣៥០តុ មានការអកកេះ និងល្ខោនបាសាក់ផងនោះ ពោលសប្បាយផ្តាំចាស់តែម្តង។
ចៅតាខាវ និងយាយសយបន្តថា ពិធីដែលធ្វើឡើងនេះ ដោយកាលពីជំនាន់លោកតាលោកយាយខ្លួននោះអាចមិនមានខាន់ស្លា ដូច្នេះ ចម្រើនព្រះជន្ម បែបជាមានចំណងដៃធ្វើដូចការគឺម្យ៉ាងដែរ គឺបានទាំងពីរ ពិតជាប្លែក ហើយការធ្វើឡើងនេះសុទ្ធតែមានការស្រុះគ្នាពីកូនចៅ ដូចពាក្យចាស់ពោលថា « ចង្កឹះមួយបាច់កាច់មិនបាត់ » នោះ ។
គួរបញ្ជាក់ដែរថា កូនលោកតាលោកយាយមិនមែនជាអ្នកមានខ្លាំងណាស់ណានោះឡើយ ខ្លះធ្វើការរោងចក្រ ខ្លះជាកសិករ តែសំខាន់ពួកគាត់មានកូនចៅច្រើន មានញាតិមិត្តចូលរួមច្រើន ដូច្នេះការអញ្ចើញភ្ញៀវក៏ច្រើននោះ៕ ដោយ៖លីហួ គីមឆាយ.
ចែករំលែកព័តមាននេះ