ថៃ ៖ បុរសជនជាតិកូរ៉េខាងត្បូងម្នាក់បានផ្ញើលុយទៅសងព្រះវិហារមួយកន្លែង ភ្ជាប់ជាមួយលិខិតសុំទោស ដោយបានសារភាពពីទោសកំហុសរបស់ខ្លួនដែលបានលួចលុយពីព្រះវិហារខាងលើ កាលពីជិត៣ទសវត្សរ៍មុន ។ នេះបើយោងតាមការចុះផ្សាយរបស់សារព័ត៌មាន thestar ដែលចេញផ្សាយ…
ថៃ ៖ បុរសជនជាតិកូរ៉េខាងត្បូងម្នាក់បានផ្ញើលុយទៅសងព្រះវិហារមួយកន្លែង ភ្ជាប់ជាមួយលិខិតសុំទោស ដោយបានសារភាពពីទោសកំហុសរបស់ខ្លួនដែលបានលួចលុយពីព្រះវិហារខាងលើ កាលពីជិត៣ទសវត្សរ៍មុន ។ នេះបើយោងតាមការចុះផ្សាយរបស់សារព័ត៌មាន thestar ដែលចេញផ្សាយ នៅថ្ងៃទី១៩ ខែកញ្ញា ឆ្នាំ២០២៤ ដោយដកស្រង់ប្រភព ពី South China Morning Post ។
ប្រភពដដែលបញ្ជាក់ថា បុរសម្នាក់នេះបានលួចលុយពីក្នុងព្រះវិហារ ៣ម៉ឺនវ៉ុន កាលពីឆ្នាំ១៩៩៧ ហើយឈានមកដល់ឆ្នាំ២០២៤ នាពេលថ្មីៗនេះគាត់បានសងវិញនូវទឹកប្រាក់ចំនួន២លានវ៉ុន ដែលស្មើនឹងជាង៦៦ដងនៃចំនួនដែលគាត់បានលួច កាលពី២៧ឆ្នាំមុន ។
ដើមហេតុនៃរឿងកើតចេញអ្នកបម្រើការងារក្នុងព្រះវិហារ Jajangam(ឆាឆាំងងាំ) ដែលជាទីសក្ការៈដ៏ស្រស់ស្អាតមួយ ក្នុងប្រាសាទ Tongdosa(ថុងទូហ្សា) ខេត្ត Gyeongsang (ក្យុងសាំង) ប្រទេសកូរ៉េខាងត្បូង បានរាយការណ៍ប្រាប់កាសែត Korean Time ក្រោយពីគាត់បានប្រទះឃើញសំបុត្រអនាមិកមួយ នៅក្នុងហិបបរិច្ចាគ កាលពីថ្ងៃទី២០ ខែសីហា ។
ក្នុងស្រោមសំបុត្រនោះមានប្រាក់២លានវ៉ុន (១៥០០ដុល្លារអាមេរិក) រួមទាំងសំណេរដែលបានរៀបរាប់ថា ៖ «ក្នុងឆ្នាំ១៩៩៧ ខ្ញុំជាក្មេងប្រុសម្នាក់ ដែលបានលួចប្រាក់ចំនួន៣ម៉ឺនវ៉ុនពីព្រះវិហារ ។ ហើយប៉ុន្មានថ្ងៃក្រោយមកខ្ញុំក៏ប៉ុនប៉ងលួចម្ដងទៀត ប៉ុន្តែត្រូវព្រះសង្ឃមួយអង្គចាប់បាន ។ ព្រះសង្ឃរូបនោះ មានក្តីសន្តោសគាត់មិនបានប្តឹងប៉ូលិស ឬប្រាប់ឪពុកម្តាយរបស់ខ្ញុំ ដោយគាត់បានដាក់ដៃលើស្មារបស់ខ្ញុំ ដោយបិទភ្នែក និងគ្រវីព្រះកេសដោយស្ងៀមស្ងាត់ ។ គ្រានោះហើយ ជាពេលវេលាដ៏សំខាន់បំផុតដែលបានផ្លាស់ប្តូរជីវិតរបស់ខ្ញុំចាប់តាំងពីថ្ងៃនោះមក ខ្ញុំមិនដែលចង់បានអ្វីដែលមិនមែនជារបស់ខ្ញុំទេ !ក្តីសន្តោសរបស់ព្រះសង្ឃបាននាំផ្លូវឱ្យខ្ញុំឲ្យក្លាយជាមនុស្សល្អ» ។
យ៉ាងណាក៏ដោយ បុរសខាងលើមិនបានបង្ហើបពីព័ត៌មានផ្ទាល់ខ្លួន ឬអាជីពការងារបច្ចុប្បន្នរបស់គាត់នោះឡើយ ដោយគ្រាន់តែបង្ហើបថា បច្ចុប្បន្នលោកបានប្រឹងប្រែងធ្វើការ ខិតខំធ្វើអំពើល្អ និងទទួលបានការគោរពស្រលាញ់ពីមនុស្សជុំវិញខ្លួន ។ បុរសរូបនេះបញ្ជាក់ទៀតថា ដើមហេតុដែលគាត់សម្រេចចិត្តសារភាពទោសកំហុស និងសងគុណទៅកាន់ព្រះវិហារនោះដោយសារគាត់កំពុងជិតក្លាយជាឪពុកគេ ហើយកូនរបស់គាត់នឹងមានមោទនភាពជាមួយនឹងភាពទទួលខុសត្រូវរបស់គាត់ដែលជាឪពុក ព្រះសង្ឃសប្បុរសដែលបុរសខាងលើបានរៀបរាប់ក្នុងសំបុត្រ ត្រូវបានគេស្គាល់ថាជា ព្រះតេជគុណ ហ៊ី យ៉ុនមុន មកដល់បច្ចុប្បន្នព្រះអង្គនៅតែបន្តគង់នៅក្នុងព្រវិហារមួយនេះ ។ ព្រះតេជគុណមានសង្ឃដីកាប្រាប់កាសែត Korea Times ដោយរំលឹកថា កាលពីឆ្នាំ១៩៩៧ គឺវាជាពេលវេលាដ៏លំបាកសម្រាប់មនុស្សជាច្រើននៅក្នុងសហគមន៍ ហើយក្រៅពីក្មេងប្រុសដែលបានលួចលុយពីហិបបរិច្ចាគ អ្នកស្រុកជាច្រើនបានព្យាយាមលួចយកទាំងហិបបរិច្ចាគរបស់ព្រះវិហារ ។
វិបត្តិហិរញ្ញវត្ថុអាស៊ី ឆ្នាំ១៩៩៧ បានជះឥទ្ធិពលយ៉ាងខ្លាំង ទៅលើសេដ្ឋកិច្ចរបស់ប្រទេសកូរ៉េខាងត្បូង ដែលបណ្តាលឱ្យក្រុមហ៊ុនជាច្រើនក្ស័យធន ធ្វើឱ្យមនុស្សជាច្រើនអត់ការងារធ្វើ ។ ព្រះតេជគុណបន្តថា គ្រប់គ្នាកំពុងតែត្រដាបត្រដួស ដូច្នេះយើងមិនបានស្តីបន្ទាស អ្នកលួចប្រាក់នោះទេ ហើយម្តងម្កាលក៏បើកហិបប្រាក់នោះ ដើម្បីឱ្យអ្នកដែលត្រូវការយកវាទៅប្រើការ ។ ព្រះតេជគុណ ហ៊ី យ៉ុនមុន ក៏បានជូនពរទៅបុរសខាងលើថា «ខ្ញុំជឿថា អ្នកនឹងក្លាយជាឪពុកដ៏អស្ចារ្យ ។ ខ្ញុំសូមជូនពរឱ្យជីវិតរបស់អ្នកពោរពេញដោយរឿងល្អៗ»៕
ចែករំលែកព័តមាននេះ