រាជធានីភ្នំពេញ ៖ បេក្ខជនដែលចុះឈ្មោះចូលរួមប្រឡងសញ្ញាបត្រមធ្យមសិក្សាទុតិយភូមិ ហៅថា សញ្ញាបត្របាក់ឌុប នៅឆ្នាំ២០២៤នេះមានចំនួនជាង១៣ម៉ឺននាក់ ដោយចែកចេញជា ៥,៥៣៤បន្ទប់ នេះបើតាមអ្នកនាំពាក្យក្រសួងអប់រំ យុវជន…
រាជធានីភ្នំពេញ ៖ បេក្ខជនដែលចុះឈ្មោះចូលរួមប្រឡងសញ្ញាបត្រមធ្យមសិក្សាទុតិយភូមិ ហៅថា សញ្ញាបត្របាក់ឌុប នៅឆ្នាំ២០២៤នេះមានចំនួនជាង១៣ម៉ឺននាក់ ដោយចែកចេញជា ៥,៥៣៤បន្ទប់ នេះបើតាមអ្នកនាំពាក្យក្រសួងអប់រំ យុវជន និងកីឡា ។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានឲ្យដឹងនៅថ្ងៃទី២០ ខែកញ្ញា ឆ្នាំ២០២៤ ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ២០២៤ មានបេក្ខជនសរុប ចំនួន១៣៧,០៤០នាក់ ស្រី៧៤,៨៨២នាក់។ នៅក្នុងនោះថ្នាក់វិទ្យាសាស្ត្រ មានចំនួន៣៩,៣៥៨នាក់ ស្រី ២៣,៧១៥នាក់ និងថ្នាក់វិទ្យាសាស្ត្រសង្គមមានចំនួន ៩៧,៦៨២នាក់ ស្រី ៥១,១៦៧នាក់ ។
ជាមួយគ្នានោះដែរ លោកស្រីអ្នកនាំពាក្យ ក៏បានឲ្យដឹងថា សម្រាប់មណ្ឌលសំណេរ មានចំនួន ២៣០មណ្ឌល មានមណ្ឌលវិទ្យាសាស្ត្រមាន ៧៣មណ្ឌល និងមណ្ឌលវិទ្យាសាស្ត្រសង្គម មាន១៥៧មណ្ឌល។ បន្ទប់សម្រាប់បេក្ខជនប្រឡង សរុបមានចំនួន៥,៥៣៤បន្ទប់ បន្ទប់ថ្នាក់វិទ្យាសាស្ត្រមាន ១,៦០៣បន្ទប់ និងវិទ្យាសាស្ត្រសង្គម ៣,៩៣១បន្ទប់ ។
សូមរំពឹកថា នៅឆ្នាំ២០២៣ ក្រសួងអប់រំ យុវជន និងកីឡា បានប្រកាសថា មានបេក្ខជនប្រឡងជាប់បាក់ឌុប សរុបចំនួន ៩៨,៤៦០នាក់ ត្រូវជា ៧២,៨៩% ក្នុងចំណោមបេក្ខជនដាក់ពាក្យប្រឡងជាង១៣ម៉ឺននាក់ (១៣៧,៤១២នាក់) ។
ក្នុងចំណោមអ្នកជាប់ទាំងជិត១០ម៉ឺននាក់នេះ សិស្សទទួលបាននិទ្ទេស A ចំនួន ១,៦៧៣នាក់, សិស្សទទួលបាននិទ្ទេស B ចំនួន ៦,៩៦៤នាក់, សិស្សទទួលបាននិទ្ទេស C ចំនួន ១៨,៣០៨ នាក់, សិស្សទទួលបាននិទ្ទេស D ចំនួន ៣៤,២៤៦នាក់ និងសិស្ស ទទួលបាននិទ្ទេស E ចំនួន ៣៧,២៦៩នាក់ ៕
ចែករំលែកព័តមាននេះ