ADផ្ទាំងផ្សព្វផ្សាយពាណិជ្ជកម្ម

Picture

ពី​ក្មេង​វត្តទៅ​ជា​យុវជន​ឆ្នើម​បង្កើត​រ៉ូ​បូត

1 ខែ មុន

ការ​ខំប្រឹង​ប្រែង​រៀនសូត្រ អំណត់​តស៊ូ​បាន​ធ្វើ​អោយ​យុវជន​ម្នាក់​ដែល​អតីតកាល កើត​ក្នុង​តំបន់​អតីត​ជំរុំ​ជនភៀសខ្លួន និង​ជា​ក្មេង​វត្ត​មួយ​រូប​អាច​មាន​សមត្ថភាព​ចាក​ចេញពី​គ្រួសារ​ត្រកូល​កសិករ​ក្លាយជា​បុគ្គល​ដែល​អាច​ទទួល​មុខងារ​ជា សហ​ស្ថាបនិក ក្រុម​យុវជន វ័យក្មេង​បង្កើត​រ៉ូ​បូត​សម័យ​ថ្មី ។ បុរស​រាង​ស្គម​ស្តើង​ស៊ុ​យ កុសល…

ការ​ខំប្រឹង​ប្រែង​រៀនសូត្រ អំណត់​តស៊ូ​បាន​ធ្វើ​អោយ​យុវជន​ម្នាក់​ដែល​អតីតកាល កើត​ក្នុង​តំបន់​អតីត​ជំរុំ​ជនភៀសខ្លួន និង​ជា​ក្មេង​វត្ត​មួយ​រូប​អាច​មាន​សមត្ថភាព​ចាក​ចេញពី​គ្រួសារ​ត្រកូល​កសិករ​ក្លាយជា​បុគ្គល​ដែល​អាច​ទទួល​មុខងារ​ជា សហ​ស្ថាបនិក ក្រុម​យុវជន វ័យក្មេង​បង្កើត​រ៉ូ​បូត​សម័យ​ថ្មី ។

បុរស​រាង​ស្គម​ស្តើង​ស៊ុ​យ កុសល ដែល​មាន​អាយុ​ត្រឹម​២៥​ឆ្នាំ ជា​សហ​ស្ថាបនិក​ក្រុម​យុវជន​វ័យក្មេង​បង្កើត​រ៉ូ​បូត បានអោយ​កម្មវិធី​លុយ​នៃ​សារព័ត៌មាន​កោះសន្តិភាព​ដឹង​ថា កាលដែល​លោក​ក្លាយជា​សហ​ប្រធាន​នេះ មិនមែន​ដោយសារ​តែ​លោក​មាន​ចំណេះដឹង​ខ្ពង់ខ្ពស់​ជាងគេ ហើយ​ក៏​មិនមែន​មាន​ន័យ​ថា លោក​ពូកែ​ជាងគេ​ទើប​ក្លាយជា​ប្រធាន​នោះ​ដែរ​តាម​ពិត​ទៅ គឺ​ទំនុកចិត្ត ។

កើត​ក្នុង​ត្រកូល​គ្រួសារ​កសិករ នៅ​ស្រុក​កំ​រៀង ខេត្តបាត់ដំបង ជាប់​ព្រំដែន​កម្ពុជា ថៃ មាន​បងប្អូន​សរុប​៨​នាក់ លោក​ស៊ុ​យ កុសល ជា​កូន​ទី​៨ ហើយ​ក៏​ជា​យុវជន​ឆ្នើម​ក្នុង​គ្រួសារ ។ លោក​ត្រូវ​បាន​ឪពុក​ម្តាយ​បញ្ជូន​អោយទៅ​រៀន​នៅ​សាលា​បឋម​សិក្សា​សិលា​មាន​ជ័យ​ក្នុងស្រុក​កំ​រៀង ខេត្តបាត់ដំបង ។ បន្ទាប់​មក​លោក​បាន​បន្ត មក​រៀន​នៅ​វិទ្យាល័យ​កំ​រៀង ស្រុក​កំ​រៀង ខេត្តបាត់ដំបង រហូត​ចប់​ថ្នាក់​ទី​១២ ហើយ​ក៏​បន្ត​តស៊ូ​ការ​សិក្សា​ថ្នាក់​បរិញ្ញាបត្រ​វិទ្យាសាស្ត្រ កុំព្យូទ័រ​នៅ​សកល​វិទ្យាល័យ​ភូមិន្ទ​ភ្នំពេញ ។

លោក​បានអោយ​ដឹង​ថា ទោះបីជា​លោក​ជា​អតីត​ក្មេង​វត្ត និង​រស់នៅ​ជាយ​ដែន​ពិតមែន តែ​លោក​តែងតែ​សំភី​នៅ​ក្នុង​ការ​សិក្សា សូ​ម្បី​តែ​វគ្គ​ខ្លី​ៗ​ក៏​លោក​តែងតែ​ខំ​សិក្សា​ជា​បន្តបន្ទាប់ ។ លោក​បាន បន្ត​ទៀត​ថា «​ហេតុ​អី​បានជា​យើង​មក​ចាប់អារម្មណ៍​លើ​វិទ្យាសាស្ត្រ​កុំព្យូទ័រ​មែនទែន​ទៅ​ដោយសារ​តែ​នៅ​ក្មេង​ខ្ញុំ​ចូល​ចិត្ត​អេ​ឡិច​ត្រូ​និ​ច ។ ខ្ញុំ​ចូល​ចិត្ត​ហ្គេ​ម​អ្វី​ក៏​ដោយ អោយ​តែ​ពាក់ព័ន្ធ​ទៅ​នឹង​អ្វី​ដែល​ថ្មី​ៗ យើង​អត់​ដែល​ស្គាល់​យើង​ចង់​ដឹង​ពី​ដំណើរការ​នៅ​ខាងក្នុង ។

ពេល​ដល់​ធំ​បន្តិច​ទៅ អ្នក​ផ្ទះ​គាត់​មាន​ទូរទស្សន៍​មួយ ហើយ​ខ្ញុំ​តែងតែ​មើល​ពី​បច្ចេកវិទ្យា ជា​ពិសេស​នៅ​ប្រទេស​ជប៉ុន ហើយ​នៅ​ពេល​ដែល​ខ្ញុំ​មើលឃើញ​រូបភាព​អស់នោះ ខ្ញុំ​ចង់ ហើយ​ខ្ញុំ​តែងតែ​ប្រាថ្នា​ថ្ងៃ​ណាមួយ​ខ្ញុំ​ចង់​មក​រៀន​ជំនាញ​ទាំង​អស់នោះ​» ។
លោក ស៊ុ​យ កុសល បន្ត​ថា ដោយសារ​ឃើញ​ពី​ការ​ខិតខំ និង​តស៊ូ​នេះ​ហើយ លោក​ត្រូវ​បាន​ជ្រើសតាំង​អោយធ្វើ​ជា​ប្រធាន ក្រុម​យុវជន​សម័យ​ថ្មី​បង្កើត​រ៉ូ​បូត​ក្នុង​ឆ្នាំ​២០១៨ ដើម្បី​ដឹកនាំ និង​គ្រប់គ្រង​សកម្មភាព​សមាជិក​ដែល​គិត​មក​ទល់​ពេល​នេះ មាន​សមាជិក​សុទ្ធសឹងតែ​ជា​យុវជន​វ័យក្មេង​ៗ​សរុប​២៣​នាក់ និង​៥​ដេ​ប៉ាត់​តឺ​ម៉​ង់ ។

ក្នុង​នាម​ជា​បញ្ញា​វ័​ន្ត​វ័យក្មេង​ម្នាក់​លោក​បាន​ប្រកាស​ជំរុញ​យុវជន​កម្ពុជា អោយ​បន្ត​ខិតខំ​សិក្សា​ស្រាវជ្រាវ​អភិវឌ្ឍ​ចំណេះដឹង ដើម្បី​ចូលរួម​ជួយ​អភិវឌ្ឍ​ប្រទេស​ជាតិ​តាម​រយៈ​ការ​កាត់​បន្ថយ​ការ​សប្បាយ​រីករាយ​ច្រើន​ឥតប្រយោជន៍​មក​ចូលរួម​អភិវឌ្ឍ​ខ្លួនឯង និង​សង្គម ។

លោក បាន​បញ្ជាក់​ថា «​ខ្ញុំ​អាច​ធ្វើ​ជា​គំរូ​ដល់​ក្មួយ​ៗ​ធ្វើ​អោយ​ឪពុក​ម្តាយ​យល់​ថា គាត់​មានកូន​ម្នាក់ ដែល​ខិតខំ​ប្រឹងរៀន ហើយ​គាត់​មានកូន​ម្នាក់​ដែល​ស្តាប់បង្គាប់​គាត់ ដែល​ស្រឡាញ់​អប់រំ​សារ​អប់រំ​របស់​គាត់ ។ ខ្ញុំ​គិត​ថា វា​មាន​ន័យ​សំខាន់​មែនទែន​សម្រាប់​គាត់​នេះ​ហើយ​បាន​ធ្វើ​អោយ​គាត់​ស្រក់​ទឹកភ្នែក​បាន ។ អ៊ីចឹង​ខ្ញុំ​គិត​ថា បើសិនជា​យើង​ជា​ជនជាតិ​ខ្មែរ​ដូច​គ្នា ទោះបីជា​ក្នុង​ស្ថាប័ន​ណា​ក៏​ដោយ បើសិនជា​យើង​មិនមែន​ធ្វើ​ដើម្បី​ប្រយោជន៍​ខ្លួនឯង ហេតុ​អ្វី​យើង​មិន ចូលរួម​ជួយ​គ្នា​» ៕ ដោយៈ ស នី​ត

អត្ថបទសរសេរ ដោយ

កែសម្រួលដោយ