«ផឹកធ្វើអ្វី បើផឹកមិនស្រវឹង» នេះជាពាក្យដែលពេលខ្លះទំនងជាការនិយាយ លេងសើច បង្កើតបរិយាកាសសប្បាយនៅក្នុងពេលមានការជុំជួបគ្នាយ៉ាងក្តី ។ តែពាក្យនេះហាក់ស្តែងចេញឱ្យឃើញឥរិយាបទរបស់បុគ្គលមួយចំនួននៅពេលបានទទួលទានគ្រឿងស្រវឹងម្តងៗហើយត្រូវផឹកឱ្យទាល់តែស្រវឹងទើបឈប់ ។ បើផឹកមិនទាន់ស្រវឹង ហើយមានគេទៅឃាត់…
«ផឹកធ្វើអ្វី បើផឹកមិនស្រវឹង» នេះជាពាក្យដែលពេលខ្លះទំនងជាការនិយាយ លេងសើច បង្កើតបរិយាកាសសប្បាយនៅក្នុងពេលមានការជុំជួបគ្នាយ៉ាងក្តី ។ តែពាក្យនេះហាក់ស្តែងចេញឱ្យឃើញឥរិយាបទរបស់បុគ្គលមួយចំនួននៅពេលបានទទួលទានគ្រឿងស្រវឹងម្តងៗហើយត្រូវផឹកឱ្យទាល់តែស្រវឹងទើបឈប់ ។ បើផឹកមិនទាន់ស្រវឹង ហើយមានគេទៅឃាត់ ឬទៅហាមពួកគាត់នឹងលើកទស្សនៈថា «ផឹកធ្វើអ្វីបើផឹកមិនស្រវឹង»មកនិយាយភ្លាម ។
«ផឹកធ្វើអីបើផឹកមិនស្រវឹង» គឺជាផឹកជំរុញអោយមនុស្សផឹករហូតដល់ស្រវឹង ។ ដូច្នេះ ពាក្យនេះអាចបណ្តាលអោយមនុស្សជោរផឹករហូតដល់ស្រវឹងហើយបង្កើតជាគ្រោះថ្នាក់ផ្សេងៗ ។ ដូច្នេះទំនងជាមានមនុស្សមិនតិចទេ ដែលមានទម្លាប់បានផឹកហើយ គឺត្រូវតែផឹកឱ្យទាល់តែស្រវឹង ។ ផឹកទាល់តែស្រវឹង អាចបង្កជាបញ្ហាច្រើនយ៉ាងដល់អ្នកផឹក និងសង្គម រួមទាំងសង្គមគ្រួសារ និងសង្គមជាតិ ។
ដូចគេដឹងហើយថា គ្រឿងស្រវឹង គេអាចទទួលទានបាននៅក្នុងកម្រិតមួយសមរម្យ ។ ផឹកតាមក្រិតក្រមសុខាភិបាលមិនដល់ថ្នាក់និយាយថា សុរាអាចជួយសុខភាពនោះទេ ។ តែយ៉ាងហោចណាស់វាមិនប៉ះពាល់ធ្ងន់ធ្ងរដល់សុខភាព។ អ្នកញៀនសុរាខ្លះបានពោលថា ការផឹកសុរាបន្តិចបន្តួច គឺដើម្បីឱ្យបាយឆ្ងាញ់ ។ នៅក្នុង ន័យនេះសុរាមិននាំឱ្យមានទោសនោះទេ ។
ក្រៅពីប៉ះពាល់សុខភាព សុរា ឬគ្រឿងស្រវឹងអាចធ្វើឱ្យខាតបង់ថវិកា និងពេលវេលា ។ គ្រឿងស្រវឹង ត្រូវគេស្គាល់ជាទូទៅថា ជាទឹកប្តូរនិស្ស័យ ។ អ្នកស្លូតផឹកសុរាអាចប្រែទៅជាមនុស្សកាច មនុស្សប្រកាន់ដែលនាំឱ្យមានជម្លោះ និងបង្កហិ.ង្សាជាមួយគេឯងជាដើម ។
ពោលអ្នកស្រវឹងអាចកើតជារាគៈ ជាសេចក្ដីត្រេកត្រអាលក្នុងកាមគុណនាំទៅជាចាប់រំលោ.ភប្រពន្ធកូនគេ ។ អ្នកស្រវឹងអាចកើតជាទោសៈ សេចក្ដីប្រទូស្ដដល់សត្វ និងសង្ខារ កើតជាក្តីក្តាំ ។ អ្នកស្រវឹងអាចមោហៈ ក្នុងខ្លួន គឺសេចក្ដីវង្វេង មិនដឹងតាមពិត ។
ក្តីវិនាសពីសុរា ឬស្រាបៀរដែលគេទទួលទានដល់ថ្នាក់ស្រវឹង តាមសម្តីដែលថា «ផឹកធ្វើអ្វី បើផឹកមិនស្រវឹងនោះ» គឺជាមូលហេតុមួយបណ្តាលឱ្យមានគ្រោះថ្នាក់ចរាចរណ៍ដែលសង្គមកំពុងព្រួយបារម្ភ ។ គ្រោះថ្នាក់ចរាចរណ៍ជាក្តីវិនាសភ្លាមៗដែលកើតចេញពីគ្រឿងស្រវឹង ។ គ្រោះថ្នាក់ចរាចរណ៍ធ្វើឱ្យខ្លួនបាត់អាយុជីវិត និងអ្នកផ្សេងទៀតបាត់បង់ជីវិត ឬរបួសផងដែរខូចខាតទ្រព្យសម្បិត្ត ។
ការទទួលទានគ្រឿងស្រវឹង ដល់ថ្នាក់បាត់ស្មារតី មិនអាចគ្រប់គ្រងខ្លួនបាននាំឱ្យខ្លួនបាត់បង់កិត្តិយស និងសេចក្តីថ្លៃថ្នូរផងដែរ ។
សរុបមកវិញ គេមិនគួរណាផឹកដល់ថ្នាក់ឱ្យខ្លួនធ្លាក់ក្នុងសភាពស្រវឹងបាត់ស្មារតីនោះឡើយ ។ ទស្សនៈថា «ផឹកធ្វើអ្វី បើផឹកមិនស្រវឹង»នេះគួរតែលាងជម្រះចេញពីខួរក្បាលអ្នកផឹក បើសិនជាគេមិនចង់ស្តាយក្រោយ ដោយសារតែគ្រោះថ្នាក់បណ្តាលមកពីស្រវឹង ។
គេគួរនាំគ្នាប្រកាន់យក និងលើកមកនិយាយនូវសារអប់រំនានាដូចជាថា ទទួលទាន គ្រឿងស្រវឹងដោយការទទួលខុសត្រូវ ឬថា ផឹកស្រាត្រឹមបាយឆ្ងាញ់ បានហើយ ៕ ដោយ ៖ សារាន់
ចែករំលែកព័តមាននេះ