«ពិតជាសាហាវពេកហើយបើនារីម្នាក់នេះរៀបគម្រោងសម្លាប់ប្ដីខ្លួនឯងដើម្បីឆក់ប្លន់អំណាចប្រធានាធិបតីដូចការសង្ស័យមែន»
ករណីធ្វើឃាតអតីតប្រធានាធិបតីហៃទីដល់ក្នុងបន្ទប់គេងរបស់លោកកាលពីឆ្នាំ២០២១នោះមិនទាន់ចប់ទេ។ ក្រោយការស្លាប់នេះ ក្រុមម៉ាស់ផ្ចា (mafia) និងបងតូចបងធំរីកដុះដាលដូចផ្សិត និងឡើងចាងសម្បើមណាស់។ ចៅក្រមទទួលបន្ទុកខាងស៊ើបអង្កេតសំណុំរឿងនេះសុខចិត្តលាឈប់ពីតួនាទីជាបន្តបន្ទាប់ពីព្រោះខ្លាចគេសម្លាប់។
ប៉ុន្តែចៅក្រមចុងក្រោយនេះចិត្តសឿងគ្រាន់បើ។ គាត់ពន្លឿននីតិវិធីស៊ើបអង្កេតករណីធ្វើឃាតលោកម៉ូអ៊ីស៊ី (Moïse) និងចោទប្រកាន់ជនសង្ស័យ៥០នាក់។ ក្នុងនោះក៏មានជំទាវទី១ដែលជាភរិយាសពលោកម៉ូអ៊ីស៊ី, អតីតនាយករដ្ឋមន្ត្រី និងអគ្គស្នងការនគរបាលជាតិ។ លោកវ៉ាល់ទែ (Walther Wesser Voltaire) ជាចៅក្រមស៊ើបក្ដីទី៥ដែលកាន់សំណុំរឿងនេះបន្តពីចៅក្រមមុនៗចំនួន៤នាក់ដែលខ្លាចរអានឹងរឿងដ៏ធំដល់ថ្នាក់នេះ។ ពួកគេសុខចិត្តអស់តំណែងក៏បានដែរ, កុំឱ្យតែអស់ជីវិត។
ចៅក្រមយល់ថាជាការរឿងគួរឱ្យភ្ញាក់ផ្អើលដែលលោកម៉ូអ៊ីស៊ីក្នុងនាមប្រធានាធិបតីប្រទេសមួយទាំងមូល មានកងការពារច្រើនស្អេកស្កះសុទ្ធតែជាអង្គរក្សជំនិតហ៊ានពលីជីវិតដើម្បីពាំងគ្រាប់កាំភ្លើងជំនួសលោក។ ចុះហេតុដូចម្ដេចបានជាគេចូលធ្វើឃាតស្រួលៗម្ល៉េះ? នៅក្នុងរាត្រីធ្វើឃាតនោះ គ្មានការប្រទាំងប្រទើសគ្នា ឬការផ្ទុះអាវុធពីសំណាក់កងការពាររបស់លោកទៅលើក្រុមពេជ្ឈឃាតសូម្បីតែបន្តិច។ រឿងនេះហាក់ដូចជាមានស៊ុំគ្រលំគ្នាជាប្រព័ន្ធដើម្បីជួយសម្រួលផ្លូវនៃការធ្វើឃាត។
ហេតុអ្វីជំទាវទីមួយហៃទីស្ថិតនៅក្នុងបញ្ជីនៃជនសង្ស័យ?
ជំទាវម៉ាទីនេ ម៉ូអ៊ីស៊ី (Martine Moïse) ផ្ដល់ចម្លើយមានភាពមិនប្រក្រតីជាច្រើន។ លោកជំទាវនិយាយម្ដងអញ្ចេះ ម្ដងអញ្ចោះនៅពេលរំលឹកទៅដល់រាត្រីរន្ធត់នោះ។ មនុស្សជាច្រើនឆ្ងល់ថាស្វាមីត្រូវគេបាញ់ឡើងសុសសាច់ ប៉ុន្តែលោកជំទាវអត់ត្រូវអីមួយគ្រាប់ ខណៈដែលអ្នកទាំង២ដេកគ្រែជាមួយគ្នា។ ម៉្យាងទៀត ពួកឃាតករស៊ីឈ្នួលដែលចូលទៅបាញ់នោះមានគ្នារាប់សិបនាក់ បាញ់រះមិនដឹងប៉ុន្មានគ្រាប់។ លោកជំទាវបកស្រាយថាខ្លួនក៏ត្រូវរបួសដែរ ហើយត្រូវគេដឹកទៅសង្គ្រោះបន្ទាន់។ បន្ទាប់ពីលោកជំទាវមិនបានបង្ហាញខ្លួន២ដងតាមការកោះហៅ ចៅក្រមក៏ចេញដីកាចាប់ខ្លួនកាលពីខែតុលា ឆ្នាំ២០២៣។
អតីតប្រធានខុទ្ទកាល័យវិមានប្រធានាធិបតីហៃទីប្រាប់ថា២ថ្ងៃមុនពេលស្វាមីត្រូវគេធ្វើឃាត, ជំទាវរូបនេះបានចូលទៅប្រមូលរបស់របរដែលគេមិនដឹងប្រមូលបានអ្វីខ្លះទេនៅក្នុងវិមាននោះអស់រយៈពេលជិត៥ម៉ោង។ ក្រោយពេលប្ដីត្រូវគេធ្វើឃាត២ថ្ងៃ ជំទាវរូបនេះហៅទូរស័ព្ទទៅមន្ត្រីខុទ្ទកាល័យ ហើយប្រាប់ថា «ស្វាមីរបស់ខ្លួនកាលនៅរស់គ្មានបានការអ្វីទេ។ ដូច្នេះ វិមាននេះត្រូវតែបន្តបើកទ្វារ។ ស្វាមីប្រាប់បុរសម្នាក់ឈ្មោះធីក្លូត (Ti Klod)ឱ្យបង្កើតគណៈរដ្ឋមន្ត្រី។ គាត់នឹងរៀបចំការបោះឆ្នោតរយៈពេលបីខែទៀត។ ដូច្នេះ ខ្ញុំ (ជំទាវ) អាចក្លាយជាប្រធានាធិបតី។ យើងជិតក្លាយជាអ្នកកាន់អំណាចហើយ»។
ចំណុចសង្ស័យ១ទៀតគឺជំទាវរូបនេះប្រាប់ថានៅពេលបាញ់ប្រហារនោះ ខ្លួនរត់ទៅពួនក្រោមគ្រែ។ ប៉ុន្តែចៅក្រមចុះពិនិត្យមើលគ្រែនោះរួចហើយ គ្មានប្រឡោះណាសម្រាប់ជ្រកកោនទេ។ សូម្បីតែកណ្ដុរមួយក្បាលក៏មិនអាចចូលទៅលាក់ខ្លួនពួនអាត្មាបានផង កុំថាឡើយមនុស្សមាឌប៉ុណ្ណាប៉ុណ្ណី។ ជនសង្ស័យឈ្មោះចូសែហ្វ (Joseph Félix Badio) ប្រាប់ចៅក្រមស៊ើបក្ដីថាជំទាវរូបនេះចង់កម្ចាត់ស្វាមីរបស់ខ្លួនចោលដើម្បីក្ដោបយកអំណាចតែម្ដងឯង និងបំពេញមហិច្ឆតាដ៏ខ្មៅងងឹតរបស់ខ្លួន។
មួយថ្ងៃក្រោយការបែកធ្លាយឯកសារសម្ងាត់និយាយទូរស័ព្ទ មេធាវីរបស់លោកជំទាវបាននិយាយការពារកូនក្ដីរបស់ខ្លួន។ មេធាវីយល់ថា «លោកជំទាវគ្មានចិត្តធំដល់ថ្នាក់ឃុបឃិតគ្នាសម្លាប់ប្ដីខ្លួនឯងទេ។ មូលហេតុដែលជំទាវផ្ដល់ចម្លើយមិនប្រាកដប្រជាយ៉ាងដូច្នេះដោយសារតែហេតុការណ៍នោះរន្ធត់ពេកធ្វើឱ្យលោកជំទាវវង្វេងវង្វាន់ភ្លេចមុខភ្លេចក្រោយ»។ មេធាវីសូមច្រានចោលការចេញរបាយការណ៍ស៊ើបអង្កេត និងចាត់ទុកថាការចោទប្រកាន់នេះមិនផ្អែកលើគោលការណ៍យុត្តិធម៌ទេ។ ឥឡូវនេះ គេរង់ចាំមើលការតតាំងក្ដីគ្នានៅតុលាការ និងការសម្រេចរបស់អង្គជំនុំជម្រះជាបន្តទៀត។ ការពិតយ៉ាងណាគង់តែដឹងសខ្មៅគ្នាជាមិនខាន៕
ប្រភព៖ Associated Press
https://apnews.com/article/haiti-widow-accused-prime-minister-police-chief-f77603e3aefde2512e640b9f896b11b2
ចែករំលែកព័តមាននេះ