Messi ព្យាយាមបកស្រាយបញ្ហានៅហុងកុង ក្រោយមតិរិះគន់នៅចិនកាន់តែខ្លាំង
អន្តរជាតិ ៖ កីឡាករ Lionel Messi បានព្យាយាមធ្វើការបកស្រាយតាមរយៈវីដេអូនៅលើបណ្ដាញ
អន្តរជាតិ ៖ កីឡាករ Lionel Messi បានព្យាយាមធ្វើការបកស្រាយតាមរយៈវីដេអូនៅលើបណ្ដាញទំនាក់ទំនងសង្គម ជុំវិញការមិនចូលលេងប្រកួតមិត្តភាពរបស់ក្លិប Inter Miami នៅហុងកុង ខណៈដែលកំពូលខ្សែប្រយុទ្ធអាហ្សង់ទីនវ័យ៣៦ឆ្នាំរូបនេះ បន្តប្រឈមមុខនឹងការខឹងសម្បារពីអ្នកគាំទ្រចិនលើបញ្ហានេះ។ នេះបើយោងតាមប្រភពពី BBC ចេញផ្សាយនៅថ្ងៃទី២០ ខែកុម្ភៈ ឆ្នាំ២០២៤។
កីឡាករ Lionel Messi មិនបានចូលលេងប្រកួតមិត្តភាពរបស់ Inter Miami ទល់នឹងក្រុមជម្រើស All Star ហុងកុង កាលពីថ្ងៃទី៤ ខែកុម្ភៈ កន្លងទៅ ក្រោមហេតុផលរបួស ដែលធ្វើឱ្យអ្នកគាំទ្រជិត៤ម៉ឺននាក់ នៅកីឡដ្ឋានទីក្រុងហុងកុងដែលចំណាយលុយទិញសំបុត្រចូលទស្សនាផ្ទុះការខឹងសម្បារ ស្រែកចំអក និងផ្តល់សញ្ញាមេដៃចុងក្រោម ហើយថែមទាំងស្រែកទារលុយថ្លៃសំបុត្រវិញផងដែរ។
ប៉ុន្តែទោះយ៉ាងណា រំលង៣ថ្ងៃក្រោយមក Messi បានចូលលេងប្រកួតមិត្តភាពទល់នឹងក្រុម Vissel Kobe នៅជប៉ុន ដែលបានបង្កការខឹងសម្បារកាន់តែខ្លាំងនៅហុងកុង និងនៅក្នុងប្រទេសចិន ដែលជាកន្លែងកីឡាកររូបនេះមានប្រជាប្រិយភាពខ្លាំង ហើយប្រតិកម្មប្រឆាំងនឹង Messi បានអូសបន្លាយអស់ជាច្រើនសប្តាហ៍ និងរហូតមកទល់ពេលនេះ។
ចាប់តាំងពីបញ្ហារបស់ Messi នៅហុងកុងរួចមក មន្ត្រីចិនបានសម្រេចលុបចោលការប្រកួតមិត្តភាពរបស់ក្រុមជម្រើសជាតិអាហ្សង់ទីនចំនួន២ប្រកួត ដែលនឹងធ្វើឡើងនៅក្នុងប្រទេសចិន ដោយម្ចាស់ជើងឯកពានរង្វាន់ World Cup ឆ្នាំ ២០២២ នឹងត្រូវជួបនីហ្សេរីយ៉ា នៅទីក្រុងហាំងចូវ និងកូតឌីវ័រ នៅទីក្រុងប៉េកាំង នាខែក្រោយ។
អាជ្ញាធរបាល់ទាត់ទីក្រុងប៉េកាំងបានបញ្ជាក់ថា ទីក្រុងគ្មានគម្រោងរៀបចំការប្រកួតដែល Lionel Messi នឹងត្រូវចូលរួមនោះទេ។ ស្របពេលដែលការិយាល័យកីឡានៅទីក្រុងហាំងចូវ ក៏បានបញ្ជាក់ថា ការប្រកួតដែលខ្លួនកំពុងធ្វើជាម្ចាស់ផ្ទះត្រូវលុបចោលសម្រាប់ហេតុផលដែលគ្រប់គ្នាសុទ្ធតែបានដឹង ។ បញ្ហានៅហុងកុង ប្រព័ន្ធផ្សព្វផ្សាយរដ្ឋចិន Global Times បានចោទ Messi និងក្លិប Inter Miami ថា ពាក់ព័ន្ធនឹងហេតុផលនយោបាយក្នុងគោលបំណងធ្វើឱ្យអាម៉ាស់តំបន់រដ្ឋបាលពិសេសរបស់ចិន។
ទោះយ៉ាងណាក៏ដោយ នៅក្នុងវីដេអូមួយលើបណ្ដាញសង្គមចិន Weibo ដែលបានបង្ហោះកាលពីថ្ងៃទី១៩ ខែកុម្ភៈ កន្លងទៅ Messi បានច្រានចោលការអះអាងដែលថា រូបគេមិនចូលការលេងប្រកួតនៅហុងកុងក្រោមហេតុផលនយោបាយ គឺជារឿងមិនពិតទាំងស្រុង ដោយបានសង្កត់ធ្ងន់លើសេចក្ដីស្រឡាញ់ជាពិសេសចំពោះប្រជាជនចិន ដោយ Messi បានបន្ថែមថា ប្រសិនបើមានរឿងនោះមែន រូបគេនឹងមិនធ្វើដំណើរទៅកាន់ប្រទេសជប៉ុន ឬប្រទេសចិនជាច្រើនលើកច្រើនសានោះទេ។ ការមិនអាចលេងនៅហុងកុង ដោយសារតែបញ្ហារលាកសាច់ដុំភ្លៅខាងក្នុង (Adductor Muscle) ហើយរូបគេព្យាយាមព្យាបាល និងហ្វឹកហាត់ ក៏ប៉ុន្តែពេទ្យជំនាញបានបង្ហាញថា មិនអាចលេងបានទេ ដែលអាចប្រឈមហានិភ័យកាន់តែអាក្រក់។
គួររំលឹកថា អ្នកគាំទ្រប្រមាណ ៣៨,០០០នាក់ នៅកីឡដ្ឋានហុងកុងបានស្រែកចំអក និងទារលុយថ្លៃសំបុត្រវិញ នៅពេលដែលសហម្ចាស់ក្លិប Inter Miami លោក David Beckham ថ្លែងទៅកាន់ពួកគេនៅចប់ការប្រកួត ខណៈដែលអ្នកគាំទ្របានចំណាយប្រាក់រហូតដល់ ៦២៤ដុល្លារអាម៉េរិក ដើម្បីមើលការប្រកួត Messi ។ ចាប់តាំងពីពេលនោះមក ក្រុមហ៊ុន Tatler Asia ដែលជាអ្នករៀបចំការប្រកួតបានសន្យាថា នឹងសងប្រាក់ ៥០% ទៅកាន់អ្នកគាំទ្រវិញ៕ (ប្រភព ៖ BBC)
ចែករំលែកព័តមាននេះ