ចរន្តទីផ្សារអចលនទ្រព្យ ជាពិសេសខុនដូនៅកម្ពុជានៅឆ្នាំ២០២៤នេះអាចនឹងកម្រើកឡើង ខណៈដែលស្ថានភាពនៅថៃ និងវៀតណាម ហាក់មានចលនាកម្រើកឡើងដែរនេះ គឺជាបច្ច័យមួយដែលនឹងអាចរុញចរន្តទីផ្សារនៅកម្ពុជាអោយកម្រើកឡើងផងដែរ ។ នៅកម្ពុជា កាលពីឆ្នាំ២០២៣កន្លងទៅស្ថិតិហាក់មិនបញ្ជាក់ច្បាស់នៅឡើយទេ ប៉ុន្តែគេគ្រាន់តែដឹងថា…
ចរន្តទីផ្សារអចលនទ្រព្យ ជាពិសេសខុនដូនៅកម្ពុជានៅឆ្នាំ២០២៤នេះអាចនឹងកម្រើកឡើង ខណៈដែលស្ថានភាពនៅថៃ និងវៀតណាម ហាក់មានចលនាកម្រើកឡើងដែរនេះ គឺជាបច្ច័យមួយដែលនឹងអាចរុញចរន្តទីផ្សារនៅកម្ពុជាអោយកម្រើកឡើងផងដែរ ។ នៅកម្ពុជា កាលពីឆ្នាំ២០២៣កន្លងទៅស្ថិតិហាក់មិនបញ្ជាក់ច្បាស់នៅឡើយទេ ប៉ុន្តែគេគ្រាន់តែដឹងថា មានគម្រោងខុនដូថ្មីដែលនឹងដាក់ចូលទីផ្សារមានប្រមាណជា៨០០០យូនីត នៅក្នុងសញ្ញានៃកំណើនប្រមាណជាជិត១៣ភាគរយ ។
របាយការណ៍ទស្សនវិស័យម៉ាក្រូសេដ្ឋកិច្ច និងធនាគារឆ្នាំ២០២៣ និងទស្សនវិស័យឆ្នាំ២០២៤ ដែលចេញផ្សាយដោយធនាគារជាតិនៃកម្ពុជាដែលបានចេញផ្សាយនាពេលថ្មីៗនេះបានកត់សម្គាល់ថា ទីផ្សារអចលនទ្រព្យនឹងរីកចម្រើននៅឆ្នាំនេះ ទោះបីខុនដូត្រូវបានគេរំពឹងថា នឹងនៅតែខ្សោយក៏ដោយចុះ ។ របាយការណ៍នេះផ្តល់នូវការវិភាគនូវនិន្នាការដែលជះឥទ្ធិពលលើវិស័យអភិវឌ្ឍន៍អចលនទ្រព្យពេញមួយ ឆ្នាំ២០២៣ ដោយផ្អែកលើទិន្នន័យឥណទាន ។
តាមសេចក្តីរាយការណ៍នៅលើទំព័រសារព័ត៌មាននៅក្នុងស្រុកក៏បានបង្ហើបថា វិស័យសំណង់ ក្នុងឆ្នាំ២០២៣ បានកើនឡើងក្នុងល្បឿនយឺត តែនៅតែកើនឡើង ។ វិស័យសំណងត្រូវបានសារព័ត៌មានធ្វើសេចក្តីរាយការណ៍ថា កើនជាង ១,១ភាគរយ បើធៀបនឹង០,៥ ភាគរយ កាលពីឆ្នាំមុន ។ រីឯការនាំចូលសម្ភារៈសំណង់បានកើនឡើង៤,៧ ភាគរយដែលឆ្លុះបញ្ចាំងពីកំណើនវិជ្ជមានធៀបនឹងឆ្នាំ២០២២ ដែលកាលនោះ ការនាំចូលបានថយចុះប្រមាណជា២៥,៦ ភាគរយ ។ នេះ គឺជាស្ថានភាពត្រួសៗនៅកម្ពុជា ប៉ុន្តែនៅជិតខាងកម្ពុជាដែលជាដៃគូពាណិជ្ជកម្ម និងវិនិយោគនៅកម្ពុជាដូចជា ថៃ និងវៀតណាម ក៏មានស្ថានភាពវិជ្ជមានផងដែរ ។
យោងទៅតាមការចេញផ្សាយរបស់សារព័ត៌មាន the Nation បានឲ្យដឹងថា ជនបរទេសបានចំណាយប្រាក់ជាង២ពាន់លានដុល្លារជះចូលទីផ្សារខុនដូនៅថៃ ហើយការចំណាយនេះ គឺមានការកើនឡើងជាងឆ្នាំមុនដល់ទៅ២៣,៥ភាគរយ ។ មជ្ឈមណ្ឌលព័ត៌មានអចលនទ្រព្យរបស់ធនាគារលំនៅដ្ឋានរដ្ឋាភិបាលថៃ បានរាយការណ៍ថា ខុនដូសរុបចំនួន១៤.៤៤៩ យូនីតដែលមានតម្លៃសរុបជាង ២ពាន់លានដុល្លារ ត្រូវបានក្រុមហ៊ុនអភិវឌ្ឈន៍ផ្ទេរទៅឱ្យជនបរទេសក្នុងឆ្នាំ២0២៣ ។
ជនបរទេសដែលបានទិញខុនដូនៅថៃច្រើនជាងគេ ក្នុងឆ្នាំ២០២៣ គឺចិនចំនួន ៦.៦១៤ យូនីត ជនជាតិរុស្ស៊ីចំនួន១.២៦០យូនីត អាមេរិកចំនួន៦៣១យូនីត មីយ៉ាន់ម៉ាចំនួន៥៦៤យូនីត តៃវ៉ាន់ចំនួន៥៣២យូនីត អង់គ្លេសចំនួន ៤៨៦នាក់យូនីត ក្រៅពីនោះនៅមានបារាំង អាល្លឺម៉ង់ អូស្ត្រាលី ជប៉ុនជាដើម ។
ពាក់ព័ន្ធនឹងស្ថានភាព នៅក្នុងឆ្នាំ២០២៤ លោក វិឆ័យ វិរ៉ាតាកាផាន់ (Wichai Viratakaphan) នាយកនៃមជ្ឈមណ្ឌលព័ត៌មានអចលនទ្រព្យរបស់ធនាគារ លំនៅដ្ឋានរដ្ឋាភិបាលថៃ បាននិយាយថា ទីផ្សារអចលនទ្រព្យថៃក្នុងឆ្នាំ២០២៤ នៅតែបង្ហាញពីនិន្នាការឆ្ពោះទៅរកការងើបឡើងវិញ ចំពេលមានកត្តាហានិភ័យជាច្រើន រួមទាំងការធ្លាក់ចុះនៃសេដ្ឋកិច្ចពិភពលោកការកើនឡើងថ្លៃដើមរស់នៅ និងបំណុលគ្រួសារ ។ សម្រាប់វៀតណាមឯណោះវិញ ទោះបីជាស្ថានភាពនៃវិច័យអចលនទ្រព្យនៅវិលវល់ក៏មានសេចក្តីរាយការណ៍ថា ស្ថានភាពនៅក្នុងឆ្នាំ២០២៤ នេះក៏ប្រសើផងដែរទោះបីជាស្ថានភាពខុនដូនៅវៀតណាមធ្លាក់ចុះ កាលពីឆ្នាំ២០២៣ខ្លាំងក៏ដោយ ។
លោក ឃ្វៀន ហាវ អាន នាយកផ្នែកទីផ្សារនៃក្រុមហ៊ុន CBRE វៀតណាម បានរំពឹងថា ស្ថានភាពខុនដូនៅក្នុងប្រទេសវៀតណាម នៅក្នុងឆ្នាំ២០២៤ នេះ រំពឹងថា នឹងមានស្ថិរភាព ជាពិសេស គឺនៅទីក្រុងហាណូយ និងហូជីមិញ រីឯតម្លៃក៏នឹងកើនឡើង ។
កាលពីឆ្នាំ២០២៣ វិស័យអចលនទ្រព្យវៀតណា មជួបសភាពធ្លាក់ចុះខ្លាំង ដោយនៅទីក្រុងហាណូយ មានខុនដូប្រមាណជា ជិត១០.៣០០ គម្រោងថយចុះ៣២ភាគរយ និងមានដីធ្លីចំនួន ២.៦០០ យូនីត ថយចុះ ៨៤ភាគរយ ។ នៅទីក្រុងហូជីមិញឯណោះវិញ ខុនដូមានជិត ៨.៧០០ ថយចុះ ៥៤ ភាគរយ ខណៈដែលដីធ្លីគឺមានតែ៣០យូនីតទេធ្លាក់ចុះដល់ទៅ៩៨ ភាគរយឯណោះ ៕ ដោយៈ ហេង ចេស្តារ
ចែករំលែកព័តមាននេះ