ដោយទទួលបានការអនុញ្ញាតដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មការអន្តរក្រសួង បានដឹកនាំគណៈប្រតិភូមួយ ដើម្បីចូលរួមមហាសន្និបាតលើកទី៧ របស់ក្លឹបឆ្នេរសមុទ្រដែលស្អាតបំផុតលើសាកលលោក និងដើម្បីទទួលវិញ្ញាបនបត្រទទួលស្គាល់ឆ្នេរសមុទ្រកម្ពុជាជាសមាជិកពេញសិទ្ធិរបស់ក្លឹប ដែលបានប្រព្រឹត្តទៅចាប់ពីថ្ងៃទី២២ដល់២៦ ឧសភា ឆ្នាំ២០១១ នៅសាធារណរដ្ឋសេណេហ្កាល់ ។
មហាសន្និបាតនេះបានត្រូវប្រកាសបើកក្រោមអធិបតីភាពរបស់លោក Djibo Leity Ka ទេសរដ្ឋមន្ត្រី និងជារដ្ឋមន្ត្រីក្រសួងបរិស្ថាន និងការពារធម្មជាតិនៃសាធារណរដ្ឋសេណេហ្កាល់ ដោយមានការចូលរួមជាអធិបតីរបស់លោក Coumba Ndoffene DIOUF អភិបាលតំបន់ Fatick និងលោក Jerome BIGNON ប្រធានក្លឹបឆ្នេរសមុទ្រដែលស្អាតបំផុតលើសាកលលោក និងមានការចូលរួមជាសមាជិកមកពីអភិបាលខេត្ត-ក្រុង និងប្រធានតំបន់មួយចំនួនដែលជាតំណាងឱ្យឆ្នេរជាសមាជិកពេញសិទ្ធិ ក៏ដូចជាឆ្នេរបេក្ខភាពថ្មីមកពីប្រទេសនានា ព្រមទាំងតំណាងមកពីក្រសួង-ស្ថាប័ន និងអាជ្ញាធរសេណេហ្កាល់ តំណាងអង្គការយូណេស្កូ សហគមន៍អឺរ៉ុប ស្ថានទូតបារាំង អង្គការអន្តរជាតិនានា និងមន្ត្រីមូលដ្ឋានចំនួនប្រមាណ២៥០នាក់។
មហាសន្និបាតបានប្រព្រឹត្តទៅក្រោមប្រធានបទស្តីពី «ឆ្នេរសមុទ្រ ៖ យុទ្ធសាស្ត្រសម្របសម្រួលបម្រែបម្រួលអាកាសធាតុ និងសកម្មភាពដែលនឹងត្រូវធ្វើនៅថ្នាក់មូលដ្ឋាន» ។ មហាសន្និបាតបានធ្វើការពិភាក្សាយ៉ាងល្អិតល្អន់លើប្រធានបទ ៖ បញ្ហាបម្រែបម្រួលអាកាសធាតុ និងភាពងាយរងគ្រោះនៅតាមបណ្តាកោះ បញ្ហាបម្រែបម្រួលអាកាសធាតុ និងធនធានក្រោមទឹក បញ្ហាបម្រែបម្រួលអាកាសធាតុ និងធនធានព្រៃឈើ…។ ទន្ទឹមនេះ មហាសន្និបាតបានពិភាក្សាយ៉ាងស៊ីជំរៅលើឆ្នេរបេក្ខភាពថ្មី៥ទៀត ។
ក្រោយពីបានពិភាក្សាយ៉ាងផុលផុស និងប្រកបដោយការទទួលខុសត្រូវ អង្គមហាសន្និបាតក្លឹបបានបោះឆ្នោតជ្រើសរើសឆ្នេរជាបេក្ខភាព ហើយជាលទ្ធផលឆ្នេរបេក្ខភាពថ្មី៥ ត្រូវបានអនុម័តជាប់ជាបេក្ខភាព ជាអាទិ៍ ឆ្នេរសមុទ្រ Jounié (ប្រទេសលីបង់) ឆ្នេរសមុទ្រ Horta (ប្រទេសព័រទុយហ្គាល់) ឆ្នេរសមុទ្រ Roses (ប្រទេសអេស្ប៉ាញ) ឆ្នេរសមុទ្រ Fort de France (មា៉ទីនីក ប្រទេសបារាំង) និងឆ្នេរសមុទ្រ La Baule (ប្រទេសបារាំង) ។
ក្នុងឱកាសដ៏វិសេសវិសាលនេះ អង្គមហាសន្និបាតបានរៀបចំពិធីប្រគល់វិញ្ញាបនបត្រទទួលស្គាល់សមាជិកពេញសិទ្ធិថ្មីរបស់ក្លឹប គឺ «ឆ្នេរសមុទ្រកម្ពុជា» (Cambodia Bay-La Baie du Cambodge) និងឆ្នេរសមុទ្រ Grikos នៃកោះ Patmos ប្រទេសក្រិច ។ នៅក្នុងមហាសន្និបាត គណៈប្រតិភូកម្ពុជាបានឡើងថ្លែងជម្រាបជូន និងបានគូសបញ្ជាក់ពីសារសំខាន់ក្លឹបដែលត្រូវបានចាត់ទុកថា ជាមធ្យោបាយសម្រួលដល់ការដោះដូរបទ ពិសោធន៍ជាលក្ខណៈអន្តរជាតិ ក្នុងការអភិវឌ្ឍតំបន់ឆ្នេរសមុទ្រប្រកបដោយនិរន្តរភាព និងការទទួលខុសត្រូវ និងជួយដល់កិច្ចសហការបង្កើនកិច្ចការផ្សព្វផ្សាយទាក់ទាញភ្ញៀវទេសចរ ។ ទន្ទឹមនឹងនោះ គណៈប្រតិភូក៏បានគូសបញ្ជាក់អំពីសក្តានុពលធម្មជាតិដ៏ធំធេង និងលក្ខណៈពិសេសរបស់តំបន់ឆ្នេរសមុទ្រកម្ពុជា ដែលបច្ចុប្បន្នកំពុងក្លាយជាប៉ូលអាទិភាពអភិវឌ្ឍ សេដ្ឋកិច្ច សង្គម ពាណិជ្ជកម្ម និងទេសចរណ៍របស់ព្រះរាជាណាចក្រកម្ពុជា ហើយបច្ចុប្បន្នតំបន់ឆ្នេរសមុទ្រត្រូវបានរាជរដ្ឋាភិបាលយកចិត្តទុកដាក់រៀបចំអភិវឌ្ឍ និងគ្រប់គ្រងប្រកបដោយការប្រុងប្រយ័ត្ន និងការទទួលខុសត្រូវខ្ពស់ដោយឈរលើគោលការណ៍ «ការអភិវឌ្ឍបម្រើឱ្យការអភិរក្ស ហើយការអភិរក្សបម្រើឱ្យការអភិវឌ្ឍ» ។
ជាការចាប់អារម្មណ៍ អង្គមហាសន្និបាតបានកោតសរសើរដល់កម្ពុជាដែលបានយកចិត្តទុកដាក់លើការអភិវឌ្ឍ និងគ្រប់គ្រងតំបន់ឆ្នេរសមុទ្រកម្ពុជាប្រកបដោយការទទួលខុសត្រូវ ដោយឈរលើគោលការណ៍ ការធ្វើផែនការរួមគ្នា (Planification Integrée) អភិបាលកិច្ចស៊ីសង្វាក់រួមគ្នា (Gestion Coherente) និងការគ្រប់គ្រងរួមគ្នាក្នុងការប្រើប្រាស់ធនធានធម្មជាតិ ប្រកបដោយប្រសិទ្ធភាព (Gestion des Usages) ដោយប្រមូលផ្តុំឱ្យមានការទទួលខុសត្រូវរួមគ្នា និងទទួលផលរួមគ្នារវាងស្ថាប័នរដ្ឋផ្នែកឯកជន ប្រជាពលរដ្ឋមូលដ្ឋាន និងពិសេសសហគមន៍ ហើយបទពិសោធន៍នេះត្រូវបានចាត់ទុកជាគំរូដល់ការគ្រប់គ្រងឆ្នេរសមុទ្រប្រទេសដទៃទៀតផងដែរ ដែលជាគន្លឹះចូលរួមដល់ការដោះស្រាយបញ្ហាប្រឈមសាកលលោកបច្ចុប្បន្ន គឺបម្រែបម្រួលអាកាសធាតុ និងក៏បានវាយតម្លៃខ្ពស់ចំពោះការលើកឡើងគោលនយោបាយជាយុទ្ធសាស្ត្រ និងចក្ខុវិស័យថ្មីក្នុងការអភិវឌ្ឍអេកូទេសចរណ៍កម្ពុជា ដោយដើរតាមគន្លងពីរ ៖ កម្រិតតូចដោយផ្អែកលើសហគមន៍ (Small Scale) និងកម្រិតធំ (Large Scale) ដោយផ្អែកលើវិនិយោគធំៗដែលប្រើប្រាស់បច្ចេកវិទ្យាចុងក្រោយ (High-end technology) ។
ក្នុងពិធីបិទនៃអង្គមហាសន្និបាត លោកថោង ខុន រដ្ឋមន្ត្រីក្រសួងទេសចរណ៍ ត្រូវបានផ្តល់កិត្តិយសធ្វើជាអធិបតី និងថ្លែងសុន្ទរកថាបិទមហាសន្និបាតលើកទី៧ របស់ក្លឹបឆ្នេរសមុទ្រដែលស្អាតបំផុតលើសាកលលោក។ លោកបានថ្លែងអំណរគុណចំពោះការគាំទ្ររបស់សមាជិកក្លឹប និងមហាសន្និបាតដល់ឆ្នេរសមុទ្រកម្ពុជារហូតដល់ក្លាយជាសមាជិកពេញសិទ្ធិ ។ កម្ពុជាសង្ឃឹមជឿជាក់យ៉ាងមុតមាំថា ការក្លាយជាសមាជិកក្លឹបនឹងធ្វើឱ្យឆ្នេរសមុទ្រកម្ពុជា បន្តឈានមុខលើឆាកអន្តរជាតិ ពិសេសចូលរួមដល់ការអភិវឌ្ឍ ប្រកបដោយនិរន្តរភាព និងការទទួលខុសត្រូវនៅតំបន់ឆ្នេរសមុទ្រកម្ពុជា ដែលនឹងប្រែក្លាយជាគោលដៅទេសចរណ៍ដ៏ទាក់ទាញធំទី២ បន្ទាប់ពីអង្គរវត្តដែលជាគោលដៅទេសចរណ៍វប្បធម៌-ប្រវត្តិសាស្ត្រដ៏ធំចម្បងទី១ របស់ព្រះរាជាណាចក្រកម្ពុជា ។ គួរឱ្យកត់សម្គាល់ថា រហូតមកដល់បច្ចុប្បន្ន ក្លឹបឆ្នេរសមុទ្រស្អាតជាងគេបំផុតលើសាកលលោកមានសមាជិក៣៣ឆ្នេរសមុទ្រមកពី២៧ប្រទេស ហើយនៅឆ្នាំ២០១២ មហាសន្និបាតលើកទី៨ របស់ក្លឹបនឹងប្រារព្ធធ្វើឡើងនៅប្រទេសក្រិច និងប្រទេសតួកគី ។
រីឯគណៈកម្មការអន្តរក្រសួងដើម្បីដាក់បញ្ចូលឆ្នេរសមុទ្រកម្ពុជាជាសមាជិកក្លឹបឆ្នេរសមុទ្រដែលស្អាតជាងគេលើសាកលលោក មានលោកអឹុម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ជាប្រធាន និងលោកម៉ុក ម៉ារ៉េត ទេសរដ្ឋមន្ត្រី រដ្ឋមន្ត្រីក្រសួងបរិស្ថាន ជាអនុប្រធាន លោកថោង ខុន រដ្ឋមន្ត្រីក្រសួងទេសចរណ៍ ជាអនុប្រធានអចិន្ត្រៃយ៍ និងមានការចូលរួមរបស់ក្រសួង-ស្ថាប័នពាក់ព័ន្ធមួយចំនួន ។
លោករដ្ឋមន្ត្រីថោង ខុន បានគូសបញ្ជាក់ថា កម្ពុជាបានជាប់ជាបេក្ខភាពកាលពីឆ្នាំ២០១០ បន្ទាប់មកត្រូវបានគណៈកម្មការចុះធ្វើការវាយតម្លៃយ៉ាងម៉ត់ចត់ ទើបសម្រេចបញ្ចូលឆ្នេរសមុទ្រកម្ពុជាជាសមាជិកពេញសិទ្ធិនៅពេលនេះ។ បច្ចុប្បន្នក្រៅពីប្រាសាទអង្គរវត្តដែលជាតំបន់ទេសចរណ៍ចម្បងក្នុងការស្រូបភ្ញៀវទេសចរបានយ៉ាងច្រើនពី១ឆ្នាំទៅ១ឆ្នាំ ឥឡូវនេះយើងមានឆ្នេរសមុទ្រមួយទៀតដែលជាគោលដៅចម្បងទី២ ក្នុងការស្រូបភ្ញៀវទេសចរឱ្យគេមកលេងកម្សាន្ត ។ លោកបានបន្ថែមទៀតថា ចំនួនភ្ញៀវទេសចរដែលបានចូលមកប្រទេសកម្ពុជា ត្រឹមរយៈពេល៤ខែកន្លងមកនេះ មាន១លាន១ពាន់នាក់ កើនឡើង១៣,២% បើធៀបនឹងរយៈពេលដូចគ្នាកាលពីឆ្នាំ២០១០ ។ ហើយភ្ញៀវដែលមកច្រើនជាងគេគឺវៀតណាមស្ថិតនៅលំដាប់ទី១ កូរ៉េទី២ ចិនទី៣ ជប៉ុនទី៤ អាមេរិកទី៥ បារាំងទី៦ អង់គ្លេសទី៧ អូស្ត្រាលីទី៨ តៃវ៉ាន់ទី៩ និងថៃទី១០ ។ លោកមានជំនឿយ៉ាងមុតមាំថា ក្រោយពីមានការទទួលស្គាល់ឆ្នេរសមុទ្រកម្ពុជាជាសមាជិកពេញសិទ្ធិរបស់ក្លឹប យើងនឹងស្រូបភ្ញៀវទេសចរណ៍បានកាន់តែច្រើនឡើងថែមទៀត ។ ហើយប្រជាពលរដ្ឋដែលរស់នៅតាមតំបន់នោះ គាត់នឹងមានជីវភាពធូរធារថែមមួយកម្រិតទៀត ដូច្នេះយើងត្រូវរួមគ្នាថែរក្សា អភិរក្សឆ្នេរសមុទ្រយើងឱ្យបានល្អចាប់ពីពេលនេះតទៅ ៕
ចែករំលែកព័តមាននេះ