រាជធានីភ្នំពេញ ៖ តារាភាពយន្តជើងចាស់ លោក យស បូវណ្ណៈ បានប្រកាសចូលរួមឈរឈ្មោះជាបេក្ខភាពប្រធានសមាគមសិល្បករខ្មែរ សម្រាប់អាណត្តិថ្មី ក្នុងពេលដែលលោកទទួលបានសំណូមពរ និងជួយជ្រោមជ្រែងគាំទ្រពីបណ្ដាអ្នកសិល្បៈ…
រាជធានីភ្នំពេញ ៖ តារាភាពយន្តជើងចាស់ លោក យស បូវណ្ណៈ បានប្រកាសចូលរួមឈរឈ្មោះជាបេក្ខភាពប្រធានសមាគមសិល្បករខ្មែរ សម្រាប់អាណត្តិថ្មី ក្នុងពេលដែលលោកទទួលបានសំណូមពរ និងជួយជ្រោមជ្រែងគាំទ្រពីបណ្ដាអ្នកសិល្បៈ រួមទាំងមហាជនផងដែរ ។
លោក យស បូវណ្ណៈគឺជាតារាសម្តែងមួយរូបដែលមានបទពិសោធន៍ជាច្រើនឆ្នាំនៅក្នុងវិស័យសិល្បៈ ហើយលោកក៏ទទួលបានការបណ្តុះបណ្តាលលើផ្នែកនេះនៅឯក្រៅប្រទេសផងដែរ ខណៈពេលដែលលោកកំពុងបន្តអាជីពសិល្បៈរបស់ខ្លួន រហូតដល់ពេលបច្ចុប្បន្ននៅលើទឹកដីអាមេរិក ជាទីដែលលោកកំពុងរស់នៅ ។
លោក យស បូវណ្ណៈ បានអះអាងប្រាប់កោះសន្តិភាពតាមសារអេឡិចត្រូនិចថា លោកបានទទួលការស្នើសុំពីសិល្បករនៅក្នុងប្រទេសមួយចំនួន ដើម្បីឱ្យលោកឈរឈ្មោះជាប្រធានសមាគមសិល្បករខ្មែរ ដោយសារការមើលឃើញលោកគឺជាអ្នកសិល្បករជើងចាស់ដែលមានបទពិសោធន៍ច្រើនលើផ្នែកមួយនេះ ។
លោកបញ្ជាក់ថា បើទោះបីជាលោករស់នៅក្រៅប្រទេសក៏ដោយ ប៉ុន្តែការលើកឡើងពីអ្នកសិល្បៈមួយចំនួននោះ គឺមិនជាបញ្ហាឡើយ ព្រោះនៅក្នុងសមាគមមានអនុប្រធាន និងក្រុមប្រឹក្សាភិបាលដែលធ្វើការងារមួយចំនួនសម្រាប់ប្រធានបានដែរ ។
លោកបន្តថា ដោយសារមើលឃើញពីចំណុចខាងលើនេះ លោកក៏បានសម្រេចឈរឈ្មោះជាបេក្ខជនមួយរូប សម្រាប់ការបោះឆ្នោតជ្រើសរើសប្រធានសមាគមសិល្បករខ្មែរនាអាណត្តិថ្មីនេះ ក្នុងគោលបំណងដើម្បីចូលរួមចំណែកលើកស្ទួយតម្លៃសិល្បៈខ្មែរយើង ក្នុងនាមលោកគឺជាមនុស្សម្នាក់បានប្រតិបត្តិលើផ្នែកមួយនេះ ។
លោក យស បូវណ្ណៈ បានលើកឡើងបន្ថែមថា ប្រសិនបើលោកអាចជាប់ឈ្មោះជាប្រធានថ្មីនោះគឺលោកនឹងដាក់គោលដៅមួយច្បាស់លាស់ និងត្រឹមត្រូវ ដើម្បីការពារ និងលើកស្ទួយសិល្បៈ ជាមួយនឹងការទំនាក់ទំនងល្អជាមួយអ្នកសិល្បៈ និងក្រសួងស្ថាប័នពាក់ព័ន្ធ ។
លោកបញ្ជាក់ថា គោលដៅសំខាន់គឺលោកនឹងខិតខំជំរុញការងារ និងដាក់ការងារល្អ និងសំខាន់ៗ ដើម្បីឱ្យអ្នកសិល្បៈក្មេងៗជំនាន់ក្រោយធ្វើតាម ដោយធ្វើយ៉ាងណាចៀសឆ្ងាយពីការមើលងាយមកលើអ្នកសិល្បៈ ។
យ៉ាងណា បើតាមលោក យស បូវណ្ណៈ សម្រាប់តំណែងជាប្រធានសមាគមសិល្បករខ្មែរ គឺចៀសមិនផុតពីការរិះគន់ តិះតៀននោះឡើយ ប៉ុន្តែសម្រាប់លោកការរិះគន់ក្នុងន័យស្ថាបនា និងការអភិវឌ្ឍន៍គឹលោកទទួលយក ហើយការរិះគន់ក្នុងន័យបន្ទោសបង្អាប់ ឬប៉ែងជើងក៏លោកទទួលយកដើម្បីយកបញ្ហាទាំងអស់នោះមកដាក់លើតុជជែកគ្នាជាមួយក្រុមប្រឹក្សារបស់សមាគម ។
ទោះជាយ៉ាងណា លោកបញ្ជាក់ថា ក្នុងនាមជាទីប្រឹក្សាក្រសួងវប្បធម៌និងវិចិត្រសិល្បៈប្រចាំរដ្ឋកាលីហ្វញ៉ា សហរដ្ឋអាមេរិក ហើយក៏ជាអតីតសាស្ត្រាចារ្យនៃសកលវិទ្យាល័យភូមិន្ទវិចិត្រសិល្បៈនិងជាប្រធានក្រុមការងារពាក់ព័ន្ធសិល្បៈនៅរដ្ឋដែលលោកកំពុងរស់នៅ លោកនឹងប្រើប្រាស់បទពិសោធន៍ទាំងអស់នេះ ដើម្បីជួយទ្រទ្រង់ និងអភិវឌ្ឍវិស័យសិល្បៈខ្មែរឱ្យមានការរីកចម្រើនបន្ថែមទៀត ៕
ចែករំលែកព័តមាននេះ