ថៃ ៖ អតីតនាយករដ្ឋមន្ត្រីថាក់ស៊ីន បានធ្វើដំណើរទៅដល់ភូមិគ្រឹះដ៏ស្កឹមស្កៃរបស់ក្រុមគ្រួសារលោកកណ្តាលទីក្រុងបាងកក នៅព្រឹកថ្ងៃអាទិត្យ បន្ទាប់ពីខកខានមិនបានឈានជើងជាន់ក្នុងផ្ទះនេះ អស់រយៈពេល១៧ឆ្នាំ ។
ប្រភពពីសារព័ត៌មានថៃ The Nation បានចេញផ្សាយ នៅថ្ងៃអាទិត្យទី១៨ ខែកុម្ភៈ ឆ្នាំ២០២៤ ថា វត្តមានអញ្ជើញវិលត្រឡប់ថ្ងៃដំបូងទៅជួបជុំក្រុមគ្រួសាររបស់លោក ថាក់ស៊ីន ត្រូវបានរឹតបន្តឹងសន្តិសុខសុវត្ថិភាពយ៉ាងតឹងរឹងបំផុតនៅបរិវេណខាងក្រៅភូមិគ្រឹះរបស់គាត់ រថយន្ត Mercedes-Benz របស់ប្រធានគណបក្សភឿថៃ លោកស្រី Paetongtarn Shinawatra បានចាកចេញពីភូមិគ្រឹៈនេះ នៅម៉ោងប្រហែល៤និង៤០នាទីព្រឹក ហើយមកដល់មន្ទីរពេទ្យដែល លោកថាក់ ស៊ីន ស្នាក់នៅនាម៉ោងប្រហែល៥ព្រឹក ។
លោក ថាក់ស៊ីន បានត្រឡប់ទៅគេហដ្ឋានរបស់លោកវិញ ក្នុងរថយន្តនៅម៉ោង៦និង៣០នាទីព្រឹក អមដោយកងកម្លាំងការពារយ៉ាងដិតដល់ ។ នៅក្នុងរថយន្តមានលោក ថាក់ស៊ីន និងកូនស្រីទាំងពីរលោកស្រី លោកស្រី Paetongtarn Shinawatra និងលោកស្រី Pinthongta Shinawatra Kunakornwong។
ក្រុមអ្នកសង្កេតការណ៍បាននិយាយថា លោកថាក់ស៊ីន មើលទៅស្ថិតក្នុងសភាពទន់ខ្សោយនៅឡើយ ដោយគាត់នៅពាក់ប៉ុងរុំក និងពាក់ម៉ាស់ ដែលបង្ហាញថា លោកនៅតែមានបញ្ហាសុខភាពទាក់ទងនឹងស្ថានភាពឆ្អឹងខ្នងប្រព័ន្ធប្រសាទ និងប្រព័ន្ធដង្ហើម ។
ជុំវិញសេរីភាពរបស់ លោកថាក់ ស៊ីន នាយករដ្ឋមន្ត្រីថៃ លោកសេដ្ឋា ថាក់វិស៊ីន បានបញ្ជាក់ប្រាប់អ្នកកាសែត កាលពីម្សិលមិញថា ការដោះលែងលោកថាក់ ស៊ីន ឱ្យនៅក្រៅឃុំថា លោកនឹងគោរពយ៉ាងពេញទំហឹងទៅតាមនីតិវិធីច្បាប់ ។ ចំពោះសំណួរថា តើលោកនឹងយកលោកថាក់ស៊ីន ធ្វើជាទីប្រឹក្សាដែរឬទេ?
លោកសេដ្ឋានិយាយជាលក្ខណៈទូទៅថា លោកតែងតែទទួលយកយោបល់ពីគ្រប់រៀមច្បងដែលធ្លាប់ធ្វើជានាយករដ្ឋមន្ត្រីថៃពីមុនមក ។ ប៉ុន្តែលោកបញ្ជាក់ថា លោកថាក់ស៊ីន មិនចូលរួមនៅក្នុងក្រុមទីប្រឹក្សារបស់លោកទេ ។ លោកថ្លែងថា បើនិយាយអំពីគម្រោងយកលោកថាក់ ស៊ីន ធ្វើជាទីប្រឹក្សាហាក់ដូចជា វែងឆ្ងាយពេកហើយ ។ ម្យ៉ាងទៀត លោកក៏មិនដឹងច្បាស់ថា តើលោកថាក់ ស៊ីន ចង់ធ្វើកិច្ចការនេះឬអត់ ។ លោកសេដ្ឋាគិតថា លោកថាក់ស៊ីនអាចនឹងមានកិច្ចការជាច្រើនដែលត្រូវធ្វើ ។
ម្យ៉ាងទៀត លោកក៏ត្រូវការសម្រាក ដើម្បីថែទាំសុខភាពរបស់លោកដែលមិនទាន់ស្រួលខ្លួនមែនទែននៅឡើយទេ ។ យោងតាមនាយកដ្ឋានពន្ធនាគារ ក្រោយពេលដោះលែងឱ្យនៅក្រៅឃុំ លោកថាក់ ស៊ីនមិនចាំបាច់ពាក់ខ្សែដៃអេឡិចត្រូនិច ដើម្បីតាមដានសកម្មភាពរបស់គាត់ទេ ។ ប៉ុន្តែទណ្ឌិតដទៃទៀត ដែលដោះលែងឱ្យនៅក្រៅឃុំត្រូវពាក់ខ្សែដៃនេះ ដើម្បីងាយស្រួលក្រែងលោពួកគេធ្វើខុសនឹងលក្ខខណ្ឌនៅក្រៅឃុំ សមត្ថកិច្ចអាចចាប់បញ្ចូលពន្ធធនាគារវិញ ៕ អត្ថបទ៖អោម ចែតច័ន្ទណារ៉ា
ចែករំលែកព័តមាននេះ