អស់និស្ស័យហើយ! Mbappe ប្រាប់ PSG ថា នឹងចាកចេញនៅចប់រដូវកាលនេះ
បារាំង ៖ កីឡាករ Kylian Mbappe បានប្រាប់ Paris St-Germain ថា រូបគេនឹងចាកចេញពីក្លិបនៅចប់
បារាំង ៖ កីឡាករ Kylian Mbappe បានប្រាប់ Paris St-Germain ថា រូបគេនឹងចាកចេញពីក្លិបនៅចប់
បារាំង ៖ កីឡាករ Kylian Mbappe បានប្រាប់ Paris St-Germain ថា រូបគេនឹងចាកចេញពីក្លិបនៅចប់រដូវកាលនេះ ស្របពេលកុងត្រារបស់ខ្សែប្រយុទ្ធបារាំងវ័យ២៥ឆ្នាំរូបនេះជាមួយម្ចាស់ជើងឯកលីគកំពូលបារាំង Ligue 1 នឹងអស់សពុលភាពនៅចុងខែមិថុនា ខាងមុខនេះ ជាមួយជម្រើសបន្ថែម១ឆ្នាំទៀត ហើយរូបគេត្រូវបានផ្សារភ្ជាប់យ៉ាងខ្លាំងជាមួយនឹងការផ្លាស់ទៅចូលរួមជាមួយក្លិប Real Madrid ដោយគ្មានតម្លៃខ្លួន (Free Agent) ។ នេះបើយោងតាមប្រព័ន្ធផ្សព្វផ្សាយបារាំង និងប្រព័ន្ធផ្សព្វផ្សាយនៅជុំវិញពិភពលោក ដែលបានចេញផ្សាយកាលពីថ្ងៃទី១៥ ខែកុម្ភៈ ឆ្នាំ២០២៤ កន្លងទៅ។
អនាគតរបស់ Mbappe គឺជាកម្មវត្ថុនៃការជាប់គាំងដ៏ធំជាមួយក្លិប PSG កាលពីរដូវក្តៅមុន ដែលបង្កជាការមើលមុខគ្នាមិនចំ រហូតដល់ខ្សែប្រយុទ្ធរូបនេះ ចាកចេញពីក្រុមឈុតធំ អំឡុងពេលការប្រកួតមិត្តភាពអន្តរជាតិដំណើរទេសចរណ៍ មុនបើករដូវកាលនេះ នៅអាស៊ីរបស់ PSG។ ក្លិបអ្នកមានបារាំងនៅតែចង់បាន Mbappe បន្តកុងត្រាថ្មី បើទោះបីជាការចាកចេញរបស់គេនឹងត្រូវមើលឃើញនៅពេលខាងមុខនេះ ដោយ PSG មានបំណងបង្កើតក្រុមកីឡាករវ័យក្មេងដ៏អស្ចារ្យ ដែលជាផែនការកើតឡើង ក្រោយការចាកចេញរបស់ខ្សែប្រយុទ្ធអាហ្សង់ទីន Lionel Messi និងខ្សែប្រយុទ្ធប្រេស៊ីល Neymar កាលពីរដូវកាលមុន។
Mbappe ដែលឈ្នះពានរង្វាន់ World Cup ជាមួយនឹងក្រុមមាន់គកបារាំង កាលពីឆ្នាំ ២០១៨ នៅប្រទេសរុស្ស៊ី បានធ្វើឱ្យពិភពលោកភ្ញាក់ផ្អើល កាលពីឆ្នាំ ២០២២ នៅពេលរូបគេចុះហត្ថលេខាលើកុងត្រាថ្មីជាមួយ PSG បើទោះជាមានការរំពឹងទុកច្រើនខែជាមួយការផ្លាស់ទៅ Real Madrid យ៉ាងណាក៏ដោយ។ កុងត្រាថ្មីរបស់ Mbappe បានផ្តល់រូបគេនូវទឹកប្រាក់រហូតដល់ ២០០លានអឺរ៉ូក្នុងមួយរដូវកាល ដើម្បីបន្តលេងជាមួយ PSG ហើយកុងត្រានឹងអស់សពុលភាពនៅរដូវក្តៅនេះតែម្តង។
គួររំលឹកថា ខ្សែប្រយុទ្ធ Kylian Mbappe បានផ្លាស់ពីក្លិប AS Monaco មកចូលរួមជាមួយក្លិប PSG កាលពីថ្ងៃទី៣១ ខែសីហា ឆ្នាំ២០១៨ នៅក្នុងតម្លៃ ១៨០លានអឺរូ។ ខ្សែប្រយុទ្ធរូបនេះបង្ហាញខ្លួនសរុប២៩០ប្រកួត និងស៊ុតបញ្ចូលទីបាន ២៤៣គ្រាប់ ដោយជួយក្រុមឈ្នះជើងឯកលីគកំពូលបារាំង៥ដង Coupe de France ៣ដង Coupe de la Ligue ២ដង និង French Super Cup ៣ដងផងដែរ៕ (ប្រភព ៖ Sky News, BBC និង The Athletic)
ចែករំលែកព័តមាននេះ