ខេត្តបាត់ដំបង ៖ ជនម្នាក់ត្រូវបានកម្លាំងកងរាជអាវុធហត្ថឃាត់ខ្លួន កាលពីវេលាម៉ោង៥ល្ងាចថ្ងៃទី១៥ កុម្ភៈ ស្ថិតនៅចំណុចភូមិអង់ ក្នុងសង្កាត់អូរចា ក្រុងបាត់ដំបង ក្រោយពីមានបណ្ដឹងចោទ ប្រកាន់ថា…
ខេត្តបាត់ដំបង ៖ ជនម្នាក់ត្រូវបានកម្លាំងកងរាជអាវុធហត្ថឃាត់ខ្លួន កាលពីវេលាម៉ោង៥ល្ងាចថ្ងៃ
ទី១៥ កុម្ភៈ ស្ថិតនៅចំណុចភូមិអង់ ក្នុងសង្កាត់អូរចា ក្រុងបាត់ដំបង ក្រោយពីមានបណ្ដឹងចោទ ប្រកាន់ថា «ជននេះបានវាយធ្វើទារុណកម្មទៅលើសង្សារខ្លួនរហូតប៉ោងមុខ ប៉ោងមាត់ និងរបួសស្ទើរសុះសាច់ ព្រោះតែខឹងសុំលុយនាងមិនបាន ។
បើតាមរបាយការណ៍ពីសមត្ថកិច្ចថា ជនសង្ស័យឈ្មោះហម សារ៉ាវុធ អាយុ១៨ឆ្នាំ គ្មានមុខរបរច្បាស់លាស់ រស់នៅក្នុងបន្ទប់ជួលជាមួយគូស្នេហ៍ហេងស៊យនៅចំណុចកើតហេតុខាងលើ ។ ជននេះបានប្រើហិង្សាសង្សារដែលមានអាយុ១៩ឆ្នាំ មានមុខរបរម៉ាស្សា ។ យោងតាមបណ្ដឹងរបស់នាងដែលបានប្រាប់មន្ត្រីកងរាជអាវុធហត្ថបានឱ្យដឹងថា នាងត្រូវសង្សាររបស់នាងឈ្មោះវុធ វាយធ្វើទារុណកម្មយ៉ាងឃោរឃៅ កាលពីវេលាម៉ោង៣រំលងអធ្រាត្រ ឈានចូលថ្ងៃទី១៥ កុម្ភៈ នៅក្នុងបន្ទប់ជួលខាងលើ ។
គូស្នេហ៍ហេងស៊យរូបនេះ បានវាយនាងឡើងប៉ោងមុខមួយចំហៀងហើយថែមទាំងទាញដែកហាលខោអាវយកមកវាយនាងស្ទើរទក់សាច់ទៀត ដែលធ្វើឱ្យនាងរបួសពេញភ្លៅ ដៃ និងរាងកាយ ។ នាងម៉ាស្សារូបនេះ បានបញ្ជាក់ប្រាប់សមត្ថកិច្ចថា សង្សារចោលម្សៀតរូបនេះ បានវាយធ្វើបាបនាង ក៏ព្រោះតែខឹងសុំលុយនាងចាយមិនបាន ព្រោះនាងគ្មានលុយ ។
ក្រោយកើតហេតុ នៅព្រឹកឡើងថ្ងៃដដែល ទើបនាងបានទៅប្ដឹងសមត្ថកិច្ចឱ្យជួយអន្តរាគមន៍រហូតត្រូវឃាត់ខ្លួនសង្សារនេះ ។ បើតាមមន្ត្រីកងរាជអាវុធហត្ថបានឱ្យដឹងថា ជនសង្ស័យត្រូវបានកម្លាំងការិយាល័យព្រហ្មទណ្ឌនៃបញ្ជាការកងរាជអាវុធហត្ថខេត្តស្រាវជ្រាវឃាត់ខ្លួនបាន ក្រោយទទួលបានបណ្ដឹងនារីរងគ្រោះ ។ ពេលនេះ មន្ត្រីការិយាល័យជំនាញបាន និងកំពុងសួរនាំ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ