ទិវានៃក្តីស្រឡាញ់ ឬValentine’s Day ជាវប្បធម៌របស់បរទេសដែលបានហូរចូលមកកម្ពុជា ។ ពីដំបូងមានយុវជនខ្មែរមួយចំនួនបានយល់ និងប្រព្រឹត្តខុសចំពោះព្រឹត្តិការណ៍ប្រចាំឆ្នាំ ដែលគេធ្វើឡើងនៅថ្ងៃទី១៤ កុម្ភៈនេះ ។…
ទិវានៃក្តីស្រឡាញ់ ឬValentine’s Day ជាវប្បធម៌របស់បរទេសដែលបានហូរចូលមកកម្ពុជា ។ ពីដំបូងមានយុវជនខ្មែរមួយចំនួនបានយល់ និងប្រព្រឹត្តខុសចំពោះព្រឹត្តិការណ៍ប្រចាំឆ្នាំ ដែលគេធ្វើឡើងនៅថ្ងៃទី១៤ កុម្ភៈនេះ ។ ប៉ុន្តែទោះនេះជាវប្បធម៌របស់បច្ចឹមប្រទេសក្តី បើគេបានសិក្សាឱ្យលម្អិត និងសម្លឹងមើលពីជ្រុងវិជ្ជមានវិញនោះគ្មានអ្វីខុសឡើយចំពោះក្តីស្រឡាញ់។ ក្តីស្រឡាញ់ ដែលមនុស្សសត្វគ្រប់រូបមិនថា ជាតិសាសន៍ណានោះគេទេ គឺត្រូវការទាំងអស់គ្នា។
សេចក្តីស្រឡាញ់មិនមែនជាកម្មសិទ្ធិនរណាម្នាក់ឡើយ ។ ផ្ទុយទៅវិញប្រសិនជាពិភពលោក ពោពេញដោយក្តីស្រឡាញ់នោះ គ្មានឡើយជម្លោះ គ្មានឡើយសង្គ្រាម និងគ្មានការច្រណែនឈ្នានីសគ្នា ។ មានក្តីស្រឡាញ់ មានសន្តិភាព មានសុភមង្គល មិនថា សង្គមជាតិ និងក្រុមគ្រួសារ ឬសកលលោកទាំងមូលនោះឡើយ ។
នៅក្នុងឱកាសទិវានៃក្តីស្រឡាញ់ មានសកម្មភាពជាច្រើនដែលមានលក្ខណៈជាវិជ្ជាមានជាសកម្មភាពគំរូដែលពលរដ្ឋបានផ្តល់សេចក្តីស្រឡាញ់ឱ្យគ្នាឱ្យក្រុមគ្រួសារ និងឱ្យសង្គមជាតិ ដែលគួរក្លាយជាគំរូល្អមួយសម្រាប់មនុស្សជាតិ ។ ជាគំរូដែលគ្រប់គ្នាបន្តធ្វើបន្តអនុវត្តន៍ ជាប្រចាំថ្ងៃ ដើម្បីស្នាមញញឹម និងសេចក្តីសុខពិតរបស់ខ្លួន និងសង្គមខ្លួន ។
នៅក្នុងថ្ងៃទិវានៃក្តីស្រឡាញ់១៤កុម្ភៈនេះ មានពលរដ្ឋមួយចំនួនបានចេញទៅបរិច្ចាគឈាម ដើម្បីជួយសង្គ្រោះអាយុជីវិតពលរដ្ឋ ដែលត្រូវការឈាម ។ នៅក្នុងចំណោមដែលពលរដ្ឋបាន ចេញទៅបរិច្ចាគឈាម មានច្រើនរូបភាព ខ្លះបានទៅបរិច្ចាគឈាមជាលក្ខណបុគ្គល ម្នាក់ឯង។ ខ្លះអញ្ជើញទៅជាក្រុមគ្រួសារ មានប្តីប្រពន្ធ និងកូនៗ ។ ការបរិច្ចាគឈាម នៅក្នុងថ្ងៃទិវានៃក្តីស្រឡាញ់ មានអង្គការ ស្ថាប័ននានា បានរៀបចំជាកម្មវិធីបរិច្ចាគឈាមជាទ្រង់ទ្រាយធំតែម្តង ។
នៅក្នុងថ្ងៃទិវាក្តីស្រឡាញ់នេះ មានពលរដ្ឋមួយចំនួនមិនបានទៅបរិច្ចាគឈាមនោះទេ តែពួកគាត់បានបរិច្ចាគថវិកាមួយចំនួន ដើម្បីទ្រទ្រង់សកម្មភាពមនុស្សធម៌របស់មន្ទីរពេទ្យគន្ធបុប្ផា ដែលពលរដ្ឋខ្មែរហៅថា ពេទ្យទេវតាសង្គ្រោះជីវិតកុមារកម្ពុជា ។ ក្រៅពីនេះ ពលរដ្ឋមួយចំនួន បានធ្វើសកម្មភាពមនុស្សធម៌ ដោយការគោរព ការស្រឡាញ់ផ្សារភ្ជាប់ទៅនឹងប្រពៃណី វប្បធម៌របស់ខ្មែរដូចជា ការធ្វើចង្ហាត់ទៅប្រគេនព្រះសង្ឃ ជូនលោកឪពុកអ្នកម្តាយបានដើរកម្សានជាដើម ។
សកម្មភាពទាំងនោះ សុទ្ធសឹងជាអំពើល្អបានបុណ្យកុសលពិសេសបានសេចក្តីសុខសម្រាប់ ផ្លូវចិត្តអ្នកបានបរិច្ចាគផ្ទាល់តែម្តង ។ សកម្មភាពទាំងអស់នេះ ពលរដ្ឋគួរនាំគ្នាបន្តធ្វើ និងធ្វើឱ្យ បានជារឿយៗត្បិតអីទាំងអស់នោះ ជាតម្រូវការរបស់សង្គមជាតិតែម្តង ។
ឈាមជាតម្រូវការប្រចាំថ្ងៃ ដើម្បីជួយសង្គ្រោះអាយុជីវិតពលរដ្ឋ ។ សកម្មភាពបរិច្ចាគឈាមដោយស្ម័គ្រចិត្ត បើទោះបីមានការផុសផលយ៉ាងក្តី តែបរិមាណឈាមបានពីសម្បុរជន នៅមិន ទាន់ឆ្លើយតបតម្រូវការនោះទេទាមទារឱ្យមានការចូលរួមច្រើនថែមទៀតពីប្រជាពលរដ្ឋ។ ក្រៅពីសកម្មភាពដូចរៀបរាប់ខាងលើ កាយវិការមនុស្សធម៌ បង្ហាញពីការស្រឡាញ់ជាច្រើនទៀត ដែលពលរដ្ឋគួរនាំគ្នាប្រតិបត្តិ ។ ប្រតិបត្តិនូវកាយវិការមនុស្សធម៌ចេញពីបេះដូងកាន់តែច្រើនសង្គមជាតិយើងក៏ទទួលបានសេចក្តីសុខ សុវត្ថិភាព កាន់តែច្រើនដែរ ហើយពលរដ្ឋគ្រប់គ្នានឹងរស់នៅជាមួយស្នាមញញឹមគ្រប់ៗគ្នា ។ ដូច្នេះ ពេលអ្នកទៅដល់កន្លែងណាក៏ដោយ ចូរអ្នកចែករំលែកក្តីស្រឡាញ់ ហើយផ្តល់ស្នាមញញឹម និងក្តីរីករាយដល់មនុស្សដែលបានជួបអ្នក ៕ ដោយ សារ៉ាន់
ចែករំលែកព័តមាននេះ