រាជធានីភ្នំពេញ ៖ ការបោកប្រាសលុយកាក់នៅក្នុងសង្គម មានច្រើនរូបភាព ច្រើនសណ្ឋាន ដែល
រាជធានីភ្នំពេញ ៖ ការបោកប្រាសលុយកាក់នៅក្នុងសង្គម មានច្រើនរូបភាព ច្រើនសណ្ឋាន ដែលគ្រប់គ្នាគួរមាន ការប្រុងប្រយ័ត្នឱ្យកាន់តែខ្ពស់។ អ្វីគួរឱ្យសង្វេគ ភាគច្រើននៃអំពើរឆបោកទាំងនោះ មាន ប្រជាពលរដ្ឋស្លូតត្រង់និងអ្នកក្រីក្រនៅទីជនបទ ជាជនរងគ្រោះហើយ អ្នកដើរបោក ប្រាសគេភាគច្រើនជាអ្នកបានតាំងខ្លួនថាជាអ្នកមាន អ្នកជោគជ័យនិងជាអ្នកចេះដឹង ទៅវិញ។
![](https://kohsantepheapdaily.com.kh/wp-content/uploads/2024/02/da4c24cd95476b6e3c95698048fa3b3d.webp)
រូបភាពនៃអំពើឆបោកមានច្រើនសណ្ឋាន ដោយបុគ្គលដែលបានតាំងខ្លួនថាជាអ្នកចេះ ជា បញ្ញវន្ត ឬជាបណ្ឌិត និងជាអ្នកមានបទពិសោធន៍ច្រើន ជាអ្នកជោគជ័យនៅក្នុងជំនួញ ដើរធ្វើ សកម្មភាព ឬលើកគម្រោងឡើង ដោយអះអាងថាគម្រោងរបស់គេទាំង នោះទាំងគឺបង្កើត ឡើងដើម្បីផលប្រយោជន៍រួម ដើម្បីសង្គមនិងដើម្បីលើកកម្ពស់ជីវភាពកសិករ ដើម្បីយុវជន ទទួលបានឱកាសរកប្រាក់ និងទទួលបានការងារធ្វើជាដើម។
![](https://kohsantepheapdaily.com.kh/wp-content/uploads/2024/02/778a3078c2ecefd37aef9b999eebc29f.jpg)
ល្បិចនិងទេពកោសល្យបោកប្រាក់ពីអ្នកដែលតាំងខ្លួនថាជាអ្នកជួយសង្គម ធ្វើជំនួញមិន ដើម្បីតែផលប្រយោជន៍ខ្លួន ពីដំបូងឡើយគេមើលមិនដឹងថាជាអំពើបោកប្រាសឡើយ។ ដូច្នេះហើយបានជាទូទៅអំពើឆបោកដោយសារអ្នកមានប្រជាប្រិយភាព នៅក្នុងសង្គម ទាំងនេះ ភាគច្រើនមានទំហំធំ មានជនរងគ្រោះច្រើននាក់ ហើយទឹកប្រាក់ដែលគេប្រមូល បានក៏សម្បើម ដែរ។
ក្រុមអ្នកចេះដឹងនិងអ្នកជោគជ័យ បានដើរប្រមូលប្រាក់ពីពលរដ្ឋក្រីក្រ តាមរូបភាពផ្សេងៗគ្នា ដូចជាការចូលហ៊ុនរកស៊ី ការបង្កើតគម្រោងវិនិយោគ ហើយពួកគេលក់ភាគហ៊ុនទៅឱ្យពលរដ្ឋ ឬចងការប្រាក់ដោយផ្ទាល់ពីពលរដ្ឋ ដោយសន្យាថានឹងផ្តល់ការប្រាក់ខ្ពស់ជាងធនាគារនិងគ្រឹះស្ថានហិរញ្ញវត្ថុ។
![](https://kohsantepheapdaily.com.kh/wp-content/uploads/2024/02/970467d146e5ee5da97d5a9bfcb4d480.webp)
សកម្មភាពឆបោកតាំងនោះពីដំបូងគេបោកអ្នកស្គាល់គ្នា ដូចជាអ្នកធ្វើការជាមួយគ្នា ឬជាកូន សិស្សជាដើម។ បន្ទាប់ពីបានប្រមូលប្រាក់ពីអ្នកស្គាល់គ្នាហើយ គេបានឱ្យអ្នកស្គាល់គ្នា ដែល បានកំពុងក្លាយជារងគ្រោះនោះ ទៅដើរប្រមូលប្រាក់ពីអ្នកដែលខ្លួនស្គាល់ជាបន្តទៀត។ ជនរងគ្រោះដើរប្រមូលប្រាក់ពីអ្នកស្គាល់បន្តទៀត ត្រូវគេឆបោកបន្ថែមថានឹងទទួលបាន ផលប្រយោជន៍ ជាភាគរយពីការរកទុនបន្ថែមហើយកាន់តែឆាប់មានបាន។
![](https://kohsantepheapdaily.com.kh/wp-content/uploads/2024/02/86c0e23f4f84d5a4f69b625b9f4de9fa.webp)
នៅពេលផ្ទុះរឿងម្តងៗ គេសង្កេតឃើញថាពលរដ្ឋដែលបានចាញ់បោកគេ ភាគច្រើន គ្មាន ថវិកាផ្ទាល់ខ្លួនមកដាក់ទុនរកស៊ី និងការវិនិយោគនោះឡើយ ។ ពួកគាត់ជាជនរងគ្រោះ ។ដោយកសិករខ្លះសុខចិត្តលក់ដីស្រែដើម្បីប្រមូលទុនមកឱ្យគេ អ្នកខ្លះទៅខ្ចីលុយពីធនាគារ យកមកឱ្យគេ។ ឬឯជាយុវជន និងជាសិស្សនិស្សិតវិញ បានទៅបង្ខំម៉ែឪ នៅឯស្រុក ឱ្យលក់ ស្រែ លក់ស្រូវ យកលុយមកវិនិយោគជាមួយគ្រូរបស់ខ្លួន ដោយរំពឹងថាជីវិតនិងជោគជ័យ។
តិចឬច្រើនករណីឆបោកនេះ ត្រូវពលរដ្ឋស្តីបន្ទោសថាជាភាពអយុត្តិធម៌មួយនៅក្នុងសង្គម។ អយុត្តិធម៌ដោយសារច្បាប់ហាក់មានភាពយឺតយ៉ាវ ក្នុងការរកយុត្តិធម៌ដល់ជនរងគ្រោះ។ ជនល្មើសហាក់មិនសូវខ្លាចសំណាញ់ច្បាប់ គ្រាន់តែប្រើពាក្យថាក្ស័យធនប៉ុណ្ណោះ។
![](https://kohsantepheapdaily.com.kh/wp-content/uploads/2024/02/8c8ec7b37181d7d104ffd5875a3095c8.jpg)
វិធានការច្បាប់គឺជាការផ្តល់ភាពកក់ក្តៅដល់ពលរដ្ឋជាទូទៅនៅក្នុងសង្គម ។ វិធានការច្បាប់ នឹងជួយការពារពលរដ្ឋក្រីក្រី យុវជនដែលមិនទាន់ស្គាល់សង្គមច្បាស់លាស់ រងគ្រោះពី បុគ្គលឱកាសនិយម។ វិធានការច្បាប់ ទប់ស្កាត់មិនឱ្យមនុស្សឱកាសនិយមធ្វើធ្វើភ្លៀង ធ្វើផ្គរនៅសង្គមតាមតែអំពើចិត្តបានឡើយ។
ច្បាប់វិនិយោគ ច្បាប់បង្កើតអង្គការ សមាគម មានទាំងអស់នៅកម្ពុជា។ អ្នកណាធ្វើខុស ប្រព្រឹត្តិអំពើបាបល្មើសច្បាប់ មិនអាចគេចពីសំណាញ់ច្បាប់បានឡើយ។ ប្រសិទ្ធភាព នៃ ការអនុវត្តច្បាប់គឺជាយុត្តិធម៌សង្គម ផ្តល់ភាពកក់ក្តៅដល់ពលរដ្ឋគ្រប់គ្នា ពិសេស ពលរដ្ឋស្លូតត្រង់៕ (ដោយ ៖ សា រ៉ាន់)
![](https://kohsantepheapdaily.com.kh/wp-content/uploads/2024/02/501ad6530de6ee82287d0197c2508e97.webp)
![](https://kohsantepheapdaily.com.kh/wp-content/uploads/2024/02/a2e4822a98337283e39f7b60acf85ec9.jpg)
![](https://kohsantepheapdaily.com.kh/wp-content/uploads/2024/02/0ed27756f510c781946a3e6062c49632.jpg)
![](https://kohsantepheapdaily.com.kh/wp-content/uploads/2024/02/6a1f9545872836c63ade854d34459f28.webp)
![](https://kohsantepheapdaily.com.kh/wp-content/uploads/2024/02/f3cf2f1aca3dad6816c7a117f3be7662.webp)
![](https://kohsantepheapdaily.com.kh/wp-content/uploads/2024/02/568eb17de6e70df46864fcd7ff392ec4-3.jpg)
![](https://kohsantepheapdaily.com.kh/wp-content/uploads/2024/02/e29b29d2ab92709252e5e093a9f1d098-1.jpg)
ចែករំលែកព័តមាននេះ