ឆេះរោងកសិដ្ឋានចិញ្ចឹមមាន់២ខ្នងម៉ត់ នៅស្រុកបាណន់ ខាតបង់អស់ប្រមាណ២០ម៉ឺនដុល្លារ
- បាត់ដំបង
ខេត្តបាត់ដំបង៖ អគ្គីភ័យដែលគេអះអាងបណ្ដាលមកពីការផ្ទុះប្រព័ន្ធហ្គាសកំដៅសត្វមាន់ បាន
ខេត្តបាត់ដំបង៖ អគ្គីភ័យដែលគេអះអាងបណ្ដាលមកពីការផ្ទុះប្រព័ន្ធហ្គាសកំដៅសត្វមាន់ បានឆាបឆេះយ៉ាងសន្ធោរសន្ធៅ លេបត្របាក់អស់គ្មានសល់នូវរោងកសិដ្ឋានចិញ្ចឹមមាន់ធំៗចំនួន០២ខ្នង ឆេះរថយន្ត និង សត្វមាន់ជាង១ម៉ឺនក្បាលងាប់ទាំងអស់ ធ្វើឲ្យខាតបង់ប្រាក់អស់ប្រមាណ២០ម៉ឺនដុល្លារ កាលពីវេលាម៉ោង៤ទៀតភ្លឺ ថ្ងៃទី ១៣ កុម្ភៈ នៅចំណុចភូមិបត់សាលា ឃុំឈើទាល ស្រុកបាណន់ តែពុំមានគ្រោះថ្នាក់មនុស្សទេ។ នេះបើតាមរបាយការណ៏សមត្ថកិច្ច។
នាយប៉ុស្ដិ៍រដ្ឋបាលឈើទាល លោក ស៊ីម ពិទូ បានរាយការណ៏ថា អគ្គីភ័យដ៏ខ្លាំងក្លានោះ បានឆេះអស់គ្មានសល់ទេ នូវរោងចិញ្ចឹមមាន់ សម្ភារៈនានា នៅក្នុងកសិដ្ឋាន រួមទាំងរថយន្ត និង ម៉ូតូផង ហើយសត្វមាន់ចំនួនជាង១ម៉ឺនក្បាល ត្រូវអគ្គីភ័យឆេះងាប់ក្លាយជាផេះទាំងអស់។
លោកបានប្រាប់ថា ម្ចាស់កសិដ្ឋានឈ្មោះ ឌិប ផាឌីន ប្រុសអាយុ៤២ឆ្នាំ រស់នៅក្បែរកសិដ្ឋានគាត់ខាងលើ។ លោកថា បើតាមម្ចាស់កសិដ្ឋានរូបនេះ បានរាយការណ៏បឋមប្រាប់សមត្ថកិច្ចថា អគ្គីភ័យនេះបានកើតឡើង ដោយសារការបែកធ្លាយប្រព័ន្ធហ្គាសសម្រាប់កំដៅមាន់ ហើយវាបានផ្ទុះលាន់ដូចគ្រាប់បែកបង្កជាអគ្គីភ័យឆាបឆេះកសិដ្ឋានទាំងមូលភ្លាមៗតែម្ដង។
យោងតាមរបាយការណ៏សមត្ថកិច្ចបានឲ្យដឹងថា នៅក្នុងកសិដ្ឋានចិញ្ចឹមមាន់កសិកម្មនេះ មានរោងមាន់ចំនួន០២ខ្នង មួយខ្នងៗមានទំហំ ៨ម៉ែx៦០ម៉ែត្រ ធ្វើពីឈើប្រក់ស័ង្កសី ហើយរោងទាំង០២នេះ ចិញ្ចឹមសត្វមាន់ចំនួន១២,០០០ក្បាល។ រោងដាក់រថយន្តមួយខ្នងទំហំ ១៥ម៉ែត្រx១២ម៉ែត្រ សម្រាប់ដាក់រថយន្ត០២គ្រឿង ដែលមួយគ្រឿងម៉ាកកាមេរី(បាឡែន) និង មួយគ្រឿងទៀតម៉ាក Hyundai ប្រភេទ២,៥តោន រួមទាំងម៉ូតូចំនួន០៣គ្រឿងទៀត។ ទ្រព្យសម្បត្តិ និង អ្វីៗគ្រប់យ៉ាង ដែលមាននៅក្នុងកសិដ្ឋាននេះ បានក្លាយជាផេះ ឆេះរាបដល់ដី សូម្បីសត្វមាន់មួយក្បាលក៏មិនអាចសង្គ្រោះបានដែរ ដោយសារអគ្គីភ័យដ៏រន្ធត់នេះ តែពុំមានគ្រោះថ្នាក់ដល់មនុស្សទេ។
អ្នកភូមិ និង ទាំងមន្ត្រីមូលដ្ឋាន បានប្រឹងប្រែងយ៉ាងខ្លាំងជាមួយម្ចាស់កសិដ្ឋាន និង កម្មករថែមាន់ ក្នុងការព្យាយាមចូលពន្លត់អគ្គីភ័យដ៏សន្ធោរសន្ធៅ ដែលកំពុងលេបត្របាក់យកសត្វមាន់ជាង១ម៉ឺនក្បាល ខណៈរថយន្តពន្លត់អគ្គីភ័យរបស់សមត្ថកិច្ចចំនួន០៤គ្រឿងក៏បានចេញជួយអន្តរាគមន៏ផងដែរ។ ប៉ុន្តែជាអកុសលអគ្គីភ័យដែលមានកម្លាំងខ្លាំង និង លឿនបំផុតនោះ បានឆេះអស់គ្មានសល់ទៅហើយ បន្សល់ទុកត្រិមតែស័ង្កសី ឆ្អឹងរថយន្ត០២គ្រឿង និង ឆ្អឹងម៉ូតូ០៣គ្រឿងប៉ុណ្ណោះ។ នៅចំពោះមុខស្ថានភាពបែបនេះ ម្ចាស់កសិដ្ឋានមិនអាចព័រនាអ្វីបានទេនោះពេលនោះ។
នេះបើតាមសមត្ថកិច្ចដែលព្យាយាមសួរព័ត៌មានបឋមដំបូង។ ប៉ុន្តែម្ចាស់កសិដ្ឋានរូបនេះគ្រាន់តែបានបំភ្លឺទាំងរដិបរដុបបញ្ជាក់ប្រាប់ពីមូលហេតុ ដែលនាំឲ្យមានអគ្គីភ័យនេះកើតឡើងថា «អគ្គីភ័យនេះ បានកើតឡើងដោយសារការបែកធ្លាយប្រព័ន្ធហ្គាស ដែលបំពាក់ក្នុងរោងដើម្បីកំដៅសត្វមាន់។ វាបែកជ្រាបសាយភាយ រហូតផ្ទុះលាន់កក្រើក រហូតបង្កជាអគ្គីភ័យតែម្ដង»។
អភិបាលស្រុកបាណន់ លោក ស្រេង សុខា ដែលបានចុះអន្តរាគមន៏ពេលកំពុងកើតហេតុនោះដែរ បានថ្លែងថា បើតាមការពិនិត្យជាក់ស្ដែង គឺ កសិដ្ឋានចិញ្ចឹមមាន់នេះ ហាក់គ្មាននៅសេសសល់អ្វីទេ សូម្បីសត្វមាន់មួយក្បាល។ លោកអភិបាលស្រុក បានបញ្ជាក់ថា ទ្រព្យសម្បត្តិ និង សម្ភារៈបានបាត់បង់ដោយសារអគ្គីភ័យនេះ រួមមានរថយន្ត ម៉ូតូ រោងចិញ្ចឹមមាន់ និង សត្វមាន់ជាង១ម៉ឺនក្បាល ដែលធ្វើឲ្យម្ចាស់កសិដ្ឋាននេះ ខាតបង់ច្រើនណាស់។
លោក ស្រេង សុខា បានប្រាប់បន្ថែមថា ស្ថិតនៅចំពោះមុខនេះ លោកកំពុងជួបសួរនាំជនរងគ្រោះ ធ្វើរបាយការណ៏បូកសរុបពីទ្រព្យសម្បត្តិដែលខូចខាត រាយការណ៏បន្តជូនថ្នាក់លើ ដើម្បីជួយសង្គ្រោះបឋមដល់ជនរងគ្រោះ តាមអវីដែលអាចជួយគាត់បាន៕
ចែករំលែកព័តមាននេះ