ADផ្ទាំងផ្សព្វផ្សាយពាណិជ្ជកម្ម

Picture

នគរបាលឃាត់ខ្លួន​ចោរ​ញី​ឈ្មោល​២​នាក់ ក្រោយ​លួច​ម៉ូតូ​១​គ្រឿង មាន​ប្រព័ន្ធ​ GPS

2 អាទិត្យ មុន

រាជធានី​ភ្នំពេញ ៖ កម្លាំង​នគរបាល​ខណ្ឌ​ពោធិ៍​សែន​ជ័យ ដឹកនាំ​ដោយ​លោក​វរសេនីយ៍ឯក ម៉​ន វុ​ធី អធិការ​នគរបាល​ខណ្ឌ សហ​ការណ៍​ជាមួយ​កម្លាំង​នគរបាល​ស្រុក​កណ្ដាលស្ទឹង ខេត្តកណ្ដាល និង​កម្លាំង​នគរបាល​ស្រុក​បាទី…

រាជធានី​ភ្នំពេញ ៖ កម្លាំង​នគរបាល​ខណ្ឌ​ពោធិ៍​សែន​ជ័យ ដឹកនាំ​ដោយ​លោក​វរសេនីយ៍ឯក ម៉​ន វុ​ធី អធិការ​នគរបាល​ខណ្ឌ សហ​ការណ៍​ជាមួយ​កម្លាំង​នគរបាល​ស្រុក​កណ្ដាលស្ទឹង ខេត្តកណ្ដាល និង​កម្លាំង​នគរបាល​ស្រុក​បាទី ខេត្តតាកែវ ធ្វើការ​ឃាត់ខ្លួន​ចោរ​ញី​ឈ្មោល​១​គូរ ក្រោយ​ពេល​ធ្វើ​សកម្មភាព​លួច​កាច់​សោ​.​ក​ម៉ូតូ​១​គ្រឿង ដែល​មាន​ភ្ជាប់​ប្រព័ន្ធ​តាមដាន​សុវត្ថិភាព GPS ។

ហេតុការណ៍​នោះ បាន​កើតឡើង​កាលពី​វេលា​ម៉ោង​២​និង​១០​នាទី​រសៀល ថ្ងៃ​ទី​១១ ខែកុម្ភៈ ឆ្នាំ​២០២៤ នៅ​ចំណុច​ហាង​កាហ្វេ​យីហោ «​ធី​កាហ្វេ​» ស្ថិត​នៅ​ក្នុងភូមិ​តា​ងួ​ន​១ សង្កាត់​កា​កាប​ទី​១ ខណ្ឌ​ពោធិ៍​សែន​ជ័យ រាជធានី​ភ្នំពេញ ។

ជនសង្ស័យ​ទាំង​២​នាក់ រួម​មាន ៖
ទី​១. ឈ្មោះ ប៊ុ​ន ប្រុស ភេទ​ប្រុស អាយុ​១៩​ឆ្នាំ មាន​ទីលំនៅ​ផ្ទះ​ជួល​ភូមិ​ទួល​សង្កែ សង្កាត់​ទួល​សង្កែ ខណ្ឌឫស្សីកែវ រាជធានី​ភ្នំពេញ រង​របួស​ជង្គង់​ទាំង​២ និង​ដៃ​ទាំង​២ ។
ទី​២. ឈ្មោះ សេង សាំ​មន្នី ភេទ​ស្រី អាយុ​១៩​ឆ្នាំ ម​សន​ទីលំនៅ​ភូមិ​ទួល​ពង្រ សង្កាត់​ចោម​ចៅ​ទី​១ ខណ្ឌ​ពោធិ៍​សែន​ជ័យ រង​របួស​បាក់​កូនដៃ​ឆ្វេង ។ ជនសង្ស័យ​ទាំង​២​នាក់ នេះ​រង​របួស​ព្រោះតែ​ព្យាយាម​ជិះ​ម៉ូតូ​គេចខ្លួន ហើយ​ដួល​ក្នុង​ពេល​ដែល​កម្លាំង​ដេញ​តាម​ប្រមាញ់ ។

ដោយឡែក ជន​រង​គ្រោះ​ឈ្មោះ ស្រ៊ុ​ន មាស ភេទ​ប្រុស អាយុ​៣៦​ឆ្នាំ មុខរបរ​បើកបរ​រថយន្ត មាន​ទីលំនៅ​ភូមិ​តា​ងួ​ន​១ សង្កាត់​កា​កាប​ទី​១ ខណ្ឌ​ពោធិ៍​សែន​ជ័យ ជា​ម្ចាស់​ម៉ូតូ ម៉ាក​ហុងដា​ឌ្រី​ម​សេ​១២៥ ព​ណ៍​ខ្មៅ ពាក់​ស្លាក​លេខ​ភ្នំពេញ 1HB-4901 ដែល​ត្រូវ​ជនសង្ស័យ​លួច​យក ។

វត្ថុ​តាង​ដកហូត​បាន ៖
-​ម៉ូតូ​ម៉ាក​ស៊ុ​យ​ហ្ស៊ុ​យ​គី​និ​ច​១​គ្រឿង ព​ណ៍​ទឹកប្រាក់ ពាក់​ស្លាក​លេខ​ក្រចេះ 1A-3884 ដែល​ជា​របស់​ជនសង្ស័យ ។
-​កាបូប​លុយ ១​មាន​លុយ​ចំនួន ១៦,០០០​រៀល
-​ទូរ​សព្ទ​ដៃ​ម៉ាក OPPO ចំនួន​២​គ្រឿង
-​និង​ម៉ូតូ​ម៉ាក​ហុងដា​ឌ្រី​ម​សេ​១២៥ ព​ណ៍​ខ្មៅ ពាក់​ស្លាក​លេខ​ភ្នំពេញ​1HB-4901 របស់​ជន​រង​គ្រោះ ។

តាម​ប្រភព​ព័ត៌មាន បាន​ឲ្យ​ដឹង​ថា នៅ​មុន​ពេល​កើតហេតុ បុរស​រង​គ្រោះ បាន​ជិះ​ម៉ូតូ​ទៅ​ទុក​នៅ​មុខ​ហាង​កាហ្វេ​ខាងលើ រួច​ដើរ​ចូល​ទៅ​ក្នុង​ហាង ពេល​នោះ ស្រាប់តែ​ជនសង្ស័យ​ទាំង​២​នាក់ បាន​ជិះ​ម៉ូតូ​ម៉ាក​ស៊ុ​យ​ហ្ស៊ុ​យ​គី​និ​ច ១​គ្រឿង ព​ណ៍​ទឹកប្រាក់ ពាក់​ស្លាក​លេខ​ក្រចេះ 1A-3884 ទៅ​ធ្វើ​សកម្មភាព​លួច​យក​បាន​សម្រេច រួច​បាន​ជិះ​គេចខ្លួន​ម្នាក់​១​គ្រឿង បាត់​ស្រមោល​។ ចំណែក​ជន​រង​គ្រោះ ក្រោយ​ពេល​ចេញពី​ហង​កាហ្វេ​មក​វិញ​បាត់​ម៉ូតូ ក៏​ឆែក​មើល​តាម​ប្រព័ន្ធ​តាមដាន​សុវត្ថិភាព GPS ហើយ​បានឃើញ​សញ្ញា​ម៉ូតូ​របស់​ខ្លួន នៅ​តាម​ផ្លូវ​ក្នុងភូមិ​សាស្ត្រ​ស្រុក​បាទី ខេត្តតាកែវ ទើប​ប្ដឹង មន្ត្រី​នគរបាល​ខណ្ឌ​ពោធិ៍​សែន​ជ័យ ឲ្យ​ជួយ​អន្តរាគមន៍​ភ្លាម​ៗ ។

ប្រភព​ដដែល បាន​ប្រាប់​ឲ្យ​ដឹង​បន្ត​ទៀត​ថា ក្រោយ​ទទួល​បាន​ពាក្យបណ្ដឹង​ផ្ទាល់មាត់ លោក​វរសេនីយ៍ឯក ម៉​ន វុ​ធី អធិការ​នគរបាល​ខណ្ឌ​ពោធិ៍​សែន​ជ័យ ក៏​បាន​ដឹកនាំ​កម្លាំង ចុះ​ទៅ​សហ​ការណ៍​ជាមួយ​កម្លាំង​នគរបាល​ស្រុក​កណ្ដាលស្ទឹង ខេត្តកណ្ដាល និង​កម្លាំង​នគរបាល​ស្រុក​បាទី ខេត្តតាកែវ និង​ធ្វើការ​ដេញ​តាម​សញ្ញា នៃ​ប្រព័ន្ធ​GPS ផ្ដល់​ឲ្យ រហូត​ប្រទះ​ឃើញ​ជនសង្ស័យ​។ បន្ទាប់​ពី​ដឹង​ថា​សមត្ថកិច្ច​តាម​មក ជនសង្ស័យ​បាន​ព្យាយាម​ជិះ​ម៉ូតូ​រត់គេច​ខ្លួន បណ្ដាល​ឲ្យ​រង​របួស​ទាំង​២​នាក់ បន្ទាប់​ត្រូវ​កម្លាំង​នគរបាល​ឃាត់ខ្លួន រួច​បញ្ជូន​ទៅ​សង្គ្រោះ​នៅ​មន្ទីរពេទ្យ​ព្រះ​កុសុមៈ រង់ចាំ​ពេល​របួស​ធូរស្រាល​ទើប​នាំ​ចេញពី​មន្ទីរពេទ្យ​យក​ទៅ​សាកសួរ និង​កសាង​សំណុំរឿង​ចាត់ការ​តាម​ច្បាប់ ៕

អត្ថបទសរសេរ ដោយ

កែសម្រួលដោយ