រាជធានីភ្នំពេញ ៖ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១២ ខែកុម្ភៈ ឆ្នាំ២០២៤នេះ បានឲ្យម្ចាស់រថយន្តបង្ក ម៉ាក HILUX REVO ស្លាកលេខភ្នំពេញ 2AQ-1520 ពណ៌ស ដែលបើកបុកម៉ូតូម៉ាក ហុងដាគុប ពណ៌ខៀវ ពាក់ស្លាកលេខ ភ្នំពេញ 1AV 8317 បណ្ដាលឱ្យរងរបួសមនុស្ស០២នាក់ និងស្លាប់ក្មេងស្រីម្នាក់ ត្រូវចូលខ្លួនមកសារភាព និងទទួលខុសត្រូវចំពោះមុខច្បាប់ នៅស្នងការដ្ឋាននគរបាលរាជធានីភ្នំពេញ ជាបន្ទាន់ ។
ហេតុការណ៍គ្រោះថ្នាក់ចរាចរណ៍រវាងរថយន្តនិងម៉ូតូ កើតឡើងកាលពីវេលាម៉ោង០៩និង៣០នាទីយប់ថ្ងៃទី១១ ខែកុម្ភៈ ឆ្នាំ២០២៤ ត្រង់ចំណុចផ្លូវ៦០ម៉ែត្រ ស្ថិតនៅភូមិព្រែកថ្លឹង សង្កាត់ជើងឯក ខណ្ឌដង្កោ ណ្ដាលឱ្យរងរបួសស្រាលចំនួន០២នាក់ និងស្លា.ប់ក្មេងស្រីម្នាក់ ។
ករណីគ្រោះថ្នាក់ចរាចរណ៍ខាងលើនេះ ឧត្តមសេនីយ៍ឯក ជួន ណារិន្ទ បានបញ្ជាឱ្យមន្ត្រីជំនាញ ចុះស្រាវជ្រាវនៅកន្លែងកើតហេតុនោះ ដើម្បីប្រមូលភស្ថុតាងក្នុងការតាមស្វែងរករថយន្តបង្ក ផងដែរ ។
ប្រភពព័ត៌មានបានអោយដឹងថា មុនកើតហេតុ គេឃើញឪពុកបើកបរម៉ូតូអាគុបស៊េរីចាស់ ដឹកកូនប្រុសស្រី២នាក់ ទៅយកប្រពន្ធចេញពីធ្វើការនៅផ្សារទំនើប AEON-3 ប៉ុន្តែមិនទាន់ទៅដល់ផង ត្រូវរថយន្តម៉ាក HILUX REVO ស្លាកលេខភ្នំពេញ 2AQ-1520 ពណ៌ស បើកលឿនដូចហោះ បុកពីក្រោយម៉ូតូជនរងគ្រោះ និងអូសទាំងមនុស្សនិងម៉ូតូឡើងចិញ្ចើមផ្លូវ បណ្ដាលឲ្យកូនស្រីស្លា.ប់ពេលបញ្ជូនទៅមន្ទីរពេទ្យ រីឯឪពុកនិងកូនប្រុសតូចបានរបួស។ ចំណែករថយន្ត បន្ថែមល្បឿនបើករត់បាត់ ។
ប្រភពបានបន្តថា បុរសជាឪពុកឈ្មោះ សោម សីហាក់ អាយុ៣៥ឆ្នាំ រងរបួស ជាអ្នកបើកម៉ូតូគុប HONDA CUP-50 ស៊េរីចាស់ ពណ៍ទឹកប៊ិចចាស់ ពាក់ស្លាកលេខភ្នំពេញ 1AV-8317 ដឹកកូនប្រុសម្នាក់ជិះខាងមុខឈ្មោះ សោម សុវណ្ណបញ្ញា អាយុ៤ឆ្នាំ រងរបួសបែកក្បាល និងពកក្បាលពីក្រោយ ចំណែកកូនស្រីម្នាក់ទៀត ជិះឱបចង្កេះពីក្រោយឈ្មោះ សោម បញ្ញាលីកា អាយុ១១ឆ្នាំ ស្លា.ប់ពេលបញ្ជូនទៅសង្គ្រោះនៅឯមន្ទីរពេទ្យ ។
ក្រោយកើតហេតុ ជនរងគ្រោះទាំង០៣នាក់ ត្រូវបានប្រជាពលរដ្ឋហៅកង់បីដឹកបញ្ជូនទៅពេទ្យ ចំណែកក្មេងស្រីរងគ្រោះ ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យគន្ធបុប្ផាដែរ ប៉ុន្តែអកុសលដោយស្ថានភាពរបួសធ្ងន់ធ្ងរពេកបានផុតដង្ហើមទៅ ។ ម៉ូតូរបស់ជនរងគ្រោះត្រូវបានសមត្ថកិច្ចប៉ុស្តិ៍នគរបាលសង្កាត់ជើងឯក ចុះទៅយកទៅរក្សាទុកបណ្ដោះអាសន្ន រង់ចាំផ្នែកជំនាញចរាចរណ៍ខណ្ឌដង្កោ ធ្វើការជាបន្ត ។
បច្ចុប្បន្ន សពកំពុងតម្កល់ធ្វើបុណ្យតាមប្រពៃណី នៅផ្ទះរបស់ក្រុមគ្រួសារជនរងគ្រោះ ស្ថិតនៅភូមិក្រពើហារ សង្កាត់ព្រែកឬស្សី ក្រុងតាខ្មៅ ខេត្តកណ្តាល ក្រុមគ្រួសារពុំសូវមានលទ្ធភាពធ្វើបុណ្យទេ ៕
![](https://kohsantepheapdaily.com.kh/wp-content/uploads/2024/02/93b96df040366994896e7d1f73fde637.jpg)
![](https://kohsantepheapdaily.com.kh/wp-content/uploads/2024/02/3f05122bb6790344dd24e571b7cb5843.jpg)
![](https://kohsantepheapdaily.com.kh/wp-content/uploads/2024/02/6c2ca9ff786c26d809d7dbddf31eb13e.jpg)
![](https://kohsantepheapdaily.com.kh/wp-content/uploads/2024/02/312702119fc3c71bea0748c432350ca3.jpg)
![](https://kohsantepheapdaily.com.kh/wp-content/uploads/2024/02/38e3becf572d38b800cf593d2c64847d.jpg)
![](https://kohsantepheapdaily.com.kh/wp-content/uploads/2024/02/a1df906cf5d68505b10b9f12fbc7eebd.jpg)
![](https://kohsantepheapdaily.com.kh/wp-content/uploads/2024/02/df544ecbff17b579205a70691d94e86f.jpg)
![](https://kohsantepheapdaily.com.kh/wp-content/uploads/2024/02/c825921e4a645756286ab1f94956b720.jpg)
![](https://kohsantepheapdaily.com.kh/wp-content/uploads/2024/02/c0471e03d9d3e52d59bc2c2be2fe72cd.jpg)
![](https://kohsantepheapdaily.com.kh/wp-content/uploads/2024/02/d1ad0ea3f0d51abb49819b7211067e4b.jpg)
ចែករំលែកព័តមាននេះ