ទីក្រុងបាងកក៖ ប្រទេសថៃចិញ្ចឹមមាន់ច្រើនប៉ុណ្ណឹងហើយនៅមិនទាន់ជាប់ចំណាត់ថ្នាក់លេខមួយទៀត។ ប៉ុន្តែប្រទេសនេះក៏កំពុងកាក់កបសម្បើមណាស់ដែរនឹងការនាំចេញសាច់មាន់ស្រស់ទៅលក់នៅក្រៅប្រទេស និងដណ្ដើមបានតំណែងលេខបីពិភពលោក។ ពិតជាមិនអន់ទេ, ជាមួយនឹងការនាំចេញសាច់មាន់ជាង១សែនតោនកាលពីឆ្នាំ២០២៣ ប្រទេសថៃអាចរកចំណូលបាន១០០ពាន់លាតបាត ឬជាង២៧០០លានដុល្លារ។
![](https://kohsantepheapdaily.com.kh/wp-content/uploads/2024/02/e1a7e34ffe9641675d7fa662b265360b.jpg)
សព្វថ្ងៃនេះ ប្រទេសប្រេស៊ីលបន្តក្ដោបក្ដាប់តំណែងលេខមួយ, ខណៈដែលអាមេរិកក្ដោបក្ដាប់តំណែងលេខពីរពិភពលោកខាងនាំចេញសាច់មាន់។ ប៉ុន្តែគុណភាពសាច់មាន់របស់ថៃ និងប្រទេសទាំងពីរនេះមិនដឹងថាមានលក្ខណៈបែបណាខ្លះទេ។យ៉ាងហោចណាស់ចំណាត់ថ្នាក់នាំចេញសាច់មាន់របស់ថៃកាន់តែប្រសើរជាងមុន។ ពោលគឺកាលពីឆ្នាំ២០២២ ថៃជាប់ចំណាត់ថ្នាក់លេខ៤ពិភពលោក។ ឆ្នាំ២០២៣ចំណាត់ថ្នាក់ឡើងមួយកាំទៀតមកឈរលេខបី។ នេះបើយោងតាមលោកស្រីឆាវីវ៉ាន់ ខាំផា (Chaweewan Kampa) ជាប្រធានសមាគមអ្នកចិញ្ចឹមមាន់។
![](https://kohsantepheapdaily.com.kh/wp-content/uploads/2024/02/227996886d07938757f392c602bdbd9e.jpg)
លោកស្រីកោតសរសើរគោលការណ៍របស់រាជរដ្ឋាភិបាលក្នុងការនាំចេញសាច់មាន់ និងការបន្តនាំចូលអាហារដែលធ្វើពីសណ្ដែកសៀងរយៈពេលមួយឆ្នាំទៀតដើម្បីទប់ស្កាត់មិនឱ្យទំនិញឡើងថ្លៃ និងមិនឱ្យខ្វះខាតចំណីសម្រាប់សត្វ។ កិច្ចព្រមព្រៀងពាណិជ្ជកម្មជាមួយអង្គការពាណិជ្ជកម្មពិភពលោក (WTO) អនុញ្ញាតឱ្យប្រទេសថៃនាំចូលចំណីផ្សំពីសណ្ដែកសៀងបង់ពន្ធនាំចូលក្រោមលក្ខខណ្ឌអនុគ្រោះ២% បើប្រៀបធៀបនឹងពន្ធគយពេញ១១៩%។ ចំណីសត្វដែលផ្សំពីម្សៅពោតបង់ពន្ធនាំចូល២០% បើប្រៀបធៀបនឹងពន្ធគយពេញ៧០%។ ថៃអាចនាំចូលចំណីសត្វជាង៥ម៉ឺនតោនក្នុងអត្រាពន្ធ២០%នេះ។
![](https://kohsantepheapdaily.com.kh/wp-content/uploads/2024/02/f6e10327c632befe4f7eb587e9b8b186.jpg)
ដូចនេះឃើញថាចំណីសត្វរបស់ថៃមិនប្រើប្រាស់សារធាតុគីមីដើម្បីឱ្យសត្វស៊ីឆាប់ធំទេគឺប្រើម្សៅសណ្ដែកសៀង និងម្សៅពោត។ លោកស្រីឆាវីវ៉ាន់ថ្លែងថាទោះបីមានលក្ខខណ្ឌល្អៗបែបនេះក្ដី ប៉ុន្តែប្រទេសថៃមិនទាន់ពេញចិត្ត១០០%ទេព្រោះមានបញ្ហាថ្លៃចំណាយលើការផលិត (ការចិញ្ចឹម ការផ្ដល់ប្រាក់ឈ្នួលកម្មករ ការនាំចេញ និងចំណាយផ្សេងៗ) នៅមានកម្រិតខ្ពស់បើប្រៀបធៀបជាមួយគូប្រកួតប្រជែងនៅលើទីផ្សារ។
![](https://kohsantepheapdaily.com.kh/wp-content/uploads/2024/02/d5c3d8c3449c4abcc87939bf319f302f.jpg)
ប្រេស៊ីល និងអាមេរិកជាប្រទេសផលិតសណ្ដែកសៀង និងពោតសម្រាប់ផ្សំធ្វើចំណីសត្វច្រើនជាងគេនៅលើពិភពលោក។ ដូច្នេះ ពួកគេមានប្រៀបខ្លាំងជាងថៃ។ ចំណែកថៃបើយកពោត និងសណ្ដែកសៀងផលិតចំណីសត្វទៅមិនរួចទេ។ ថៃត្រូវការបម្រុងទុកសម្រាប់មនុស្សបរិភោគដែរ។ នេះហើយជាចំណុចដែលប្រទេសថៃចាញ់ប្រៀបគេ។ ដូច្នេះ លោកស្រីសូមស្នើសុំឱ្យរាជរដ្ឋាភិបាលចរចាជាមួយ WTO ដើម្បីនាំចូលចំណីសត្វគិតពន្ធធូរថ្លៃ។ ទាល់តែបែបនេះទើបម្ចាស់កសិដ្ឋានចិញ្ចឹមមាន់អាចកាត់បន្ថយថ្លៃចំណាយ ហើយអាចមានលទ្ធភាពលក់មាន់នៅក្នុងតម្លៃប្រកួតប្រជែងនៅលើទីផ្សារពិភពលោក។
![](https://kohsantepheapdaily.com.kh/wp-content/uploads/2024/02/040641f709390d32b02be055dc9f7115.jpg)
ពាក់ព័ន្ធនឹងចំណីសត្វនេះមិនមែនតែមាន់ទេ។ ប្រធានសមាគមជ្រូករបស់ថៃក៏ត្អូញត្អែរផងដែរ។ លោកថាបញ្ហាចំណីសត្វជាបន្ទុកចំណាយដ៏ធំបំផុតរបស់ម្ចាស់កសិដ្ឋានចិញ្ចឹមសត្វ។ ដូច្នេះ លោកសូមស្នើសុំឱ្យរាជរដ្ឋាភិបាលយកចិត្តទុកដាក់ខ្ពស់ចំពោះបញ្ហានេះ។ លោកយល់ថាគួរបញ្ចុះតម្លៃពន្ធនាំចូល និងបន្ធូរបន្ថយលក្ខខណ្ឌនាំចូលចំណីសត្វបន្ថែមទៀត៕
ប្រភព៖ The Nation Thailand
https://www.nationthailand.com/thailand/economy/40035450
![](https://kohsantepheapdaily.com.kh/wp-content/uploads/2024/02/f515b3f1442ea7fd751e65c2e3a0f9fd.jpg)
ចែករំលែកព័តមាននេះ