ឆ្នាំនេះ អ្នកដាំដើមរាសី ទឹកភ្នែកហើយ ក្រោយគ្រូហុងស៊ុយពោលច្បាស់ៗពាក់ព័ន្ធដើមរាសី ។ កសិករត្អូញថា គាត់យំលែងចេញ និងពោលដោយក្តុកក្តួលថា « ឆ្នាំនេះអ្នកដាំដើមរាសីទឹកភ្នែកហើយ…
ឆ្នាំនេះ អ្នកដាំដើមរាសី ទឹកភ្នែកហើយ ក្រោយគ្រូហុងស៊ុយពោលច្បាស់ៗពាក់ព័ន្ធដើមរាសី ។ កសិករត្អូញថា គាត់យំលែងចេញ និងពោលដោយក្តុកក្តួលថា « ឆ្នាំនេះអ្នកដាំដើមរាសីទឹកភ្នែកហើយ គ្រូហុងស៊ុយអើយ» ។
និយាយដល់រឿងបុណ្យចូលឆ្នាំប្រពៃណីចិន វៀតណាម គឺជាបុណដ៏សំខាន់មួយរបស់បងប្អូនជនជាតិចិន ឬបងប្អូនជនជាតិខ្មែរដែលជាប់សែស្រឡាយចិន ឬបងប្អូនជនជាតិវៀតណាម ឬខ្មែរដែលឈាមសែស្រឡាយវៀតណាម តែងតែប្រារព្ធជារៀងរាល់ឆ្នាំមិនដែលអាក់ខានឡើយ ។ នៅឆ្នាំ២០២៤នេះ ថ្ងៃសែនចូលឆ្នាំចិន ត្រូវចំថ្ងៃសុក្រ ទី៩ ខែកុម្ភៈ ។ សម្រាប់ថ្ងៃបុណ្យចូលឆ្នាំចិន រយៈពេល៣ថ្ងៃ គឺថ្ងៃទី ១០, ១១ និង១២ ខែកុម្ភៈ ឆ្នាំ២០២៤ ។ បងប្អូនមួយចំនួនធំ ហៅថា ពិធិបុណចូលឆ្នាំប្រពៃណីចិន តែមែនទែនទៅវាក៏ជាថ្ងៃចូលឆ្នាំប្រពៃណីវៀតណាមផងដែរ ។
មុនលម្អិតរឿងកសិករខ្មែរអ្នកដាំដើមរាសីត្រូវបង្ហូរទឹកនេត្រាដោយសារ នាឱកាសបុណ្យចូលឆ្នាំចិននេះ សូមលើកយកនូវប្រវត្តិសង្ខេបនៃបុណ្យចូលឆ្នាំចិន ជូនប្រិយមិត្តអ្នកអានបានឈ្វេងយល់ដូចខាងក្រោម៖ បុណ្យចូលឆ្នាំចិន គឺជាពិធីបុណ្យដ៏សំខាន់មួយរបស់ជនជាតិចិន ដែលតែងតែប្រារព្ធឡើង នៅពេលផ្លាស់ប្តូរពីប្រតិទិនចាស់ចូលប្រតិទិនថ្មី របស់ប្រទេសចិន ។ គេអាចហៅបុណ្យចូលឆ្នាំនេះថា ជាពិធីបុណ្យនិទាឃរដូវ ឬបុណ្យនៃរដូវផ្ការីក «Spring Festival»។
ប្រាកដណាស់ ចូលឆ្នាំចិនឆ្នាំនេះ កសិករអ្នកដែលដាំដើមរាសីទឹកភ្នែកហើយ ក្រោយលក់ដើមរាសីមិនចេញ ដោយមកដល់ថ្ងៃទី៨ ខែកុម្ភៈ ឆ្នាំ២០២៤នេះ ដើមរាសីនៅពេញចម្ការ ខណៈមិនសូវមានអ្នកទិញដាក់ផ្ទះនោះ ។ សម្រាប់ជនជាតិចិន បុណ្យចូលឆ្នាំជាឱកាសពិសេសសម្រាប់ក្រុមគ្រួសារ ក្នុងការជួបជុំ ដើម្បីបរិភោគអាហាររួមគ្នាជាពិសេស គឺអាហារពេលល្ងាច ។ វាក៏ជាឱកាសសម្រាប់ជនជាតិចិន ក្នុងការបោសសម្អាតគេហដ្ឋានជាថ្មី ដើម្បីបណ្តេញរឿងមិនល្អ និងវិញ្ញាណអាក្រក់ ហើយទទួលយកសំណាងល្អនៅឆ្នាំថ្មី ។
នៅតាមបង្អួច និងទ្វារ គេតែងតែតុបតែងលំអជាមួយនឹងក្រដាស ឬកំណាព្យពីរប្រយោគ ដែលមានពណ៌ក្រហម តំណាងឲ្យ «សំណាងល្អ សុភមង្គល ទ្រព្យសម្បត្តិ និងអាយុយ៉ឺនយូរ» ។ ក្រៅពីការសែនព្រេន នៅមានសកម្មភាពផ្សេងៗទៀត ដែលប្រជាជនចិននិយម ធ្វើនៅថ្ងៃចូលឆ្នាំមានដូចជា ការដុតផាវ ការចែកអាំងប៉ាវ ឬចំណីអាហារដល់គ្នាទៅវិញទៅមក ។ តាមរយៈការលើកឡើង របស់បងប្អូនជនជាតិចិនបានបញ្ជាក់ថា «ប្រសិនបើមនុស្សចំណាយ ឬចែករំលែកដល់អ្នកដទៃកាន់តែច្រើននៅក្នុងឱកាសបុណ្យចូលឆ្នាំនឹងនាំឲ្យលាភហូរចូលគ្រួសារ របស់ពួកគេកាន់តែច្រើនដូចគ្នា» ។
យោងទៅតាមរឿងនិទាន និងរឿងព្រេងខ្លះទៀតបានឲ្យដឹងថា ការចាប់ផ្ដើមនៃពិធីបុណ្យចូលឆ្នាំចិនបានផ្ដើមឡើងជាមួយការវាយប្រយុទ្ធប្រឆាំងជាមួយសត្វក្នុងទេវកថា មានឈ្មោះថា «នៀន» មានន័យថា ឆ្នាំជាភាសាចិន ។ ងាកមកកសិករខ្មែរវិញថា ម៉េចត្រូវស្រក់ទឹកភ្នែកថ្ងៃសែន និងចូលឆ្នាំចិននោះ គឺថា រឿងវាពាក់ព័ន្ធនឹង«ដើមរាសី និងគ្រូហុងស៊ុយ» ។
ជាការពិតណាស់ ដើមរាសីជាដើមរុក្ខជាតិដែលគេគ្រប់គ្នាតែងយកដាក់ថូដាក់តាំងផ្ទះ ដើម្បីលើករាសី រាសីខ្ពស់ និងភាពរីកចម្រើនកើតកាលវាលគុម្ពត្រជាក់ត្រជុំដល់លោកអ្នកនោះ តែផ្ទុយទៅវិញឆ្នាំនេះគ្រូហុងស៊ុយមួយចំនួនបានថ្លែងថា ចូលឆ្នាំចិន២០២៤នេះមិនអោយដាក់ដើមរាសីនៅជំនៀងផ្ទះឡើយ ដូច្នេះអាជីករលក់ដើមរាសី និងកសិករដាំដើមរាសីអាចនឹងលំបាកយំលែងចេញ ក្រោយខំដាំថែស្រោចទឹកសព្វបែបយ៉ាងហើយ ចុងក្រោយគ្មានអ្នកទិញបានត្រឹមបង្ហោះលើបណ្តាញសង្គមថា « ឆ្នាំនេះអ្នកដាំដើមរាសី ទឹកភ្នែកហើយ..គ្រូហុងស៊ុយអើយ »។
បើតាមការរៀបរបស់គណនីឈ្មោះ កូនអ្នកកៀនសា្វយ និយាយថា រាសីឡើងល្អ ខំថែ ខំដាំ សង្ឃឹមថា បានលក់ក្នុងឪកាសបុណ្យប្រពៃណីចិន តែគ្រូហ៊ុយស៊ុយនិយាយថា មិនអោយដាក់ដើមរាសី ឥឡូវនៅចោលទាំងចម្ការ ដោយធ្លាប់តែកាលពីកន្លងទៅ ថ្ងៃទី៣ ឬថ្ងៃទី៤ កាប់យកទៅលក់នៅផ្សារអស់ហើយ តែពេលនេះនៅសល់ពេញចម្ការ ។ បើតាមការបន្តពីប្រភពដដែលបន្តថា ចំពោះដើមរាសីនេះខំថែ ជួលគេធ្វើស្មៅ ក្រែងបានដោះស្រាយជីវភាព តែពេលនេះលើសដើមមិនបានជួយដល់ជីវភាពហើយលំបាកលើសដើមទៀត ។
ក្រោយមានការបង្ហោះចំពោះគណនីមួយនេះ មហាជនខ្លះបានលើកឡើងថា « សម្រាប់ខ្ញុំ ដើមហ្នឹងគ្រាន់ដាក់លម្អប៉ុណ្ណោះ រឿងហេង ឬស៊យឡើង ឬចុះ ដោយសារវាមិនជឿសោះឡើយ ព្រោះវាគ្មានរិទ្ធិអីខ្លាំងជាងមនុស្សទេ ចង់ដុត ចង់ដក ចង់ដាំ ពេលណាក៏បាន» ។ និងមហាជនខ្លះទៀតលើកឡើងក្នុងន័យបែបនេះថា « ដាំ ឬដាក់នៅក្នុងផ្ទះវាបញ្ចេញឧស្ម័នហើយ និងជួយស្រូបជាតិពុល ជាការលម្អនៅក្នុងផ្ទះផង រុក្ខជាតិទាំងនេះវាមានអត្ថប្រយោជន៍ច្រើន មិនមែនជារបស់ចង្រៃឧបទ្រពអប្បមង្គលដូចអ្វីដែលគ្រូគ្រូហុងស៊ុយមួយចំនួនបានពោលទេ »។
ខ្លះទៀតលើកឡើងថា បែបណាក៏ល្អ« ឆ្នាំទៅថា ត្រូវ ឆ្នាំនេះថា មិនត្រូវ ចូលឆ្នាំខ្មែរត្រូវរហូតជាមួយផ្កាឈូក និងម្លិះ សូមពិចារណាផង»។ និងមហាជនខ្លះទៀតលើកឡើងថា« បងអាចលក់បាន ចិនសែហាមកុំអោយដាក់តែអ្នកដែលមានជំនាងកណ្ដាលផ្ទះតែប៉ុណ្ណោះ ព្រោះតារាសាស្ដ្រមិនល្អចុះចូល»។ ខ្លះទៀតលើដោយលើកខ្លួនឯងជាធំ « ខ្ញុំមិនជឿទេរឿងហុងស៊ុយ ជឿលើសមត្ថភាពខ្លួនឯង ហើយការដាក់សម្ការៈវា គ្រាន់ការតុបតែឲស្អាត សប្បាយចិត្តប៉ុណ្ណោះ»។
គួរបញ្ជាក់ដែរថា ដើមរាសីឆ្នាំនេះ អាជីករ កសិករអ្នកដាំមានការត្អូញត្អែរក្រោយលក់មិនចេញ ដោយម្នាក់សម្តែងការស្តោកស្តាយក្រោយ ខំប្រឹងដោយកម្លាំងញើសឈាមហើយបែរជាលក់មិនចេញបែបនេះ៕ ដោយ៖ លីហួ គីមឆាយ.
ចែករំលែកព័តមាននេះ