អន្តរជាតិ ៖ ប្រសិនបើ​សួរ​ថា តើ​កីឡាករ​បាល់ទាត់​រូប​ណា​ដែល​មានទ្រព្យ​សម្បត្តិ​ច្រើន​ជាងគេ​បំផុត​លើ​ពិភពលោក នា​ពេល​បច្ចុប្បន្ន ? ច្បាស់​ណាស់​គ្រប់​គ្នា​ប្រាកដជា​គិត​ថា​ខ្សែប្រយុទ្ធ​ឆ្នើម​អា​ហ្ស​ង់​ទី​ន Lionel Messi ឬ​ខ្សែប្រយុទ្ធ​ឆ្នើម​ព័រ​ទុ​យ​ហ្គា​ល់ Cristiano Ronaldo ។ ប៉ុន្តែ​ការ​ពិត​គឺ​ខ្សែបម្រើ​ស្លាប​ប្រ៊ុ​យ​ណេ Faiq Bolkiah ជាមួយនឹង​ទ្រព្យសម្បត្តិ​ចំនួន ២០​ពាន់​លាន​ដុល្លារ​អា​មេ​រិ​ក​។

ព្រះ​អង្គ​ម្ចាស់ Faiq Bolkiah អាយុ​២៥​ឆ្នាំ ប្រសូត​នៅ​ទីក្រុង​ឡូ​សអាន់​ជ័រ​លេស (Los Angeles) សហរដ្ឋអាមេរិក គឺជា​ព្រះរាជបុត្រ​របស់​ព្រះ​អង្គ​ម្ចាស់ Jefri Bolkiah និង​ត្រូវជា​ព្រះ​ភាគិនេយ្យ ឬ​ក្មួយ​ប្រុស​របស់​ស្តេច​ស៊ុ​ល​តង់​ប្រទេស​ប្រ៊ុ​យ​ណេ Hassanal Bolkiah​។ បច្ចុប្បន្ន Faiq Bolkiah កំពុង​ប្រកប​អាជីព​ជាមួយនឹង​ក្លិប Ratchaburi នៃ​លី​គ​កំពូល​ថៃ និង​ជា​សមាជិក​នៃ​ក្រុម​ជម្រើសជាតិ​ប្រ៊ុ​យ​ណេ​។

ព្រះ​អង្គ​ម្ចាស់ Faiq Bolkiah បាន​ចាប់ផ្តើម​ហ្វឹកហាត់​បាល់ទាត់​នៅ​ក្នុង​ឆ្នាំ​២០០៩ នៅ​ពេល​ដែល​ព្រះ​អង្គ​បាន​ចូលរួម​ក្នុង​មជ្ឈមណ្ឌល​បណ្តុះបណ្តាល​យុវជន​របស់​ក្លិប AFC Newbury (​នៅ​ចក្រ​អង់គ្លេស​។ ព្រះ​អង្គ​បាន​បន្ត​ឆ្លងកាត់​ការ​បណ្តុះបណ្តាល​ជាមួយនឹង​ក្លិប​ធំ​ៗ​ដូច​ជា Southampton, Arsenal និង Chelsea មុន​ពេល​ចូលរួម​ជាមួយនឹង​ក្លិប Leicester City នៅ​ឆ្នាំ​២០១៦​។ ទោះ​យ៉ាងណា ព្រះ​អង្គ​មិន​ធ្លាប់​បាន​លេង​ឱ្យ​ក្រុម​ឈុត​ធំ Leicester ម្តងណា​ឡើយ​រយៈពេល​៤​ឆ្នាំ​នៅ​ទីនោះ​។

ព្រះ​អង្គ​ម្ចាស់ Faiq Bolkiah បាន​ចូលរួម​ជាមួយ​ក្លិប Marítimo B នៅ​ព័រ​ទុ​យ​ហ្គា​ល់ នៅ​ឆ្នាំ ២០២០ នៅ​ទីនោះ​បាន​១​រដូវ​កាល ព្រះ​អង្គ​បាន​ផ្លាស់​មក​ចូលរួម​ជាមួយ​ក្លិប Chonburi នៅ​លី​គ​កំពូល​ថៃ នៅ​ក្នុង​ឆ្នាំ ២០២១ មុន​បន្ត​ផ្លាស់​មក​ចូលរួម​ជាមួយ​ក្លិប Ratchaburi នៅ​ឆ្នាំ ២០២៣ រហូត​មក​ទល់​បច្ចុប្បន្ន​។ ព្រះ​អង្គ​ម្ចាស់​ត្រូវ​បាន​កោះហៅ​ចូល​ក្រុម​ឈុត​ធំ​ប្រ៊ុ​យ​ណេ​នៅ​ឆ្នាំ ២០១៦​។

កីឡាករ​បាល់ទាត់​ទាំង​១០​រូប ដែល​មានទ្រព្យ​សម្បត្តិ​ច្រើន​បំផុត​នៅ​លើ​ពិភពលោក
១. Faiq Bolkiah (​ប្រ៊ុ​យ​ណេ​/ Ratchaburi) ៖ ២០​ពាន់​លាន​ដុល្លារ
២. Lionel Messi (​អា​ហ្ស​ង់​ទី​ន​/Inter Miami) ៖ ៦០០​លាន​ដុល្លារ
៣. Cristiano Ronaldo (​ព័រ​ទុ​យ​ហ្គា​ល់​/AI Nassar) ៖ ៥០០​លាន​ដុល្លារ
៤. David Beckham (​អង់គ្លេស​/​ចូល​និវត្តន៍​) ៖ ៤៥០​លាន​ដុល្លារ

៥. Dave Whelan (​អង់គ្លេស​/​ចូល​និវត្តន៍​) ៖ ២១០​លាន​ដុល្លារ
៦. Neymar Jr. (​ប្រេ​ស៊ី​ល​/Al Hilal) ៖ ២០០​លាន​ដុល្លារ
៧. Zlatan Ibrahimovic (​ស៊ុ​យ​អែ​ត​/​ចូល​និវត្តន៍​) ៖ ១៩០​លាន​ដុល្លារ
៨. Kylian Mbappe (​បារាំង​/PSG) ៖ ១៨០​លាន​ដុល្លារ
៩. Wayne Rooney (​អង់គ្លេស​/​ចូល​និវត្តន៍​) ៖ ១៧០​លាន​ដុល្លារ
១០. Ronaldo Luis Nazario (​ប្រេ​ស៊ី​ល​/​ចូល​និវត្តន៍​) ៖ ១៦០​លាន​ដុល្លារ​៕ (​ប្រភព ៖ The Mirror, Marca និង Current Affairs. Adda247)