ក្រុងប៉ោយប៉ែត ៖ ព្រឹកថ្ងៃទី៣០ ឧសភា ឆ្នាំ២០១១ មន្ត្រីតុលាការខេត្តបន្ទាយមានជ័យ ដឹកនាំដោយលោកតន់ សីហៈតេជៈ ព្រះរាជអាជ្ញារងខេត្ត ចុះអនុវត្តសាលដីកាតុលាការកំពូលលេខ៣៨១ឃ ចុះថ្ងៃទី២៨ ខែតុលា ឆ្នាំ២០១០ ស្ថិតនៅជាប់ផ្លូវជាតិលេខ៥ ក្នុងភូមិកូនដំរី សង្កាត់ប៉ោយប៉ែត ក្រុងប៉ោយប៉ែត
ក្រុងប៉ោយប៉ែត ៖ ព្រឹកថ្ងៃទី៣០ ឧសភា ឆ្នាំ២០១១ មន្ត្រីតុលាការខេត្តបន្ទាយមានជ័យ ដឹកនាំដោយលោកតន់ សីហៈតេជៈ ព្រះរាជអាជ្ញារងខេត្ត ចុះអនុវត្តសាលដីកាតុលាការកំពូលលេខ៣៨១ឃ ចុះថ្ងៃទី២៨ ខែតុលា ឆ្នាំ២០១០ ស្ថិតនៅជាប់ផ្លូវជាតិលេខ៥ ក្នុងភូមិកូនដំរី សង្កាត់ប៉ោយប៉ែត ក្រុងប៉ោយប៉ែត។
ក្នុងការចុះអនុវត្តនៅចំណុចដីទំនាស់ទំហំ៥.០០០ម៉ែត្រការ៉េនោះ លោកអ៊ុក ខ្វាន់រិន មេភូមិកូនដំរីបានឱ្យដឹងថា ការចុះអនុវត្តសាលដីការបស់លោកព្រះរាជអាជ្ញារងខេត្តបន្ទាយមានជ័យនៅពេលនេះ គឺមានភាពមិនប្រក្រតី ដោយការអនុវត្តនោះខុសទីតាំងផ្លូវ ដោយលោកមេភូមិបញ្ជាក់ថា ការប្តឹងជំទាស់របស់ភាគីឈ្នះក្តីនោះនៅចំណុចទីតាំងផ្លូវលំលេខ២ឯណោះទេ។ ប៉ុន្តែនៅពេលដែលតុលាការខេត្តចុះមកអនុវត្ត ស្រាប់តែមកអនុវត្តនៅចំណុចផ្លូវលំលេខ៤ទៅវិញ ដោយមានចម្ងាយខុសគ្នាប្រមាណ៥០០ម៉ែត្រឯណោះ។
គួរកត់សម្គាល់ថា រឿងក្តីដីធ្លីនេះក៏មានលិខិតផ្លូវការរបស់រដ្ឋមន្ត្រីក្រសួងយុត្តិធម៌ ចុះថ្ងៃទី២០ ខែឧសភា ឆ្នាំ២០១១ ដោយលោកអង្គ វង្សវឌ្ឍានា បានសុំឱ្យលោកប្រធានសាលាដំបូង និងលោកព្រះរាជអាជ្ញាខេត្តបន្ទាយមានជ័យ ផ្អាកការអនុវត្តជាបណ្តោះអាសន្នសិន រង់ចាំការសម្រេចតាមមតិដ៏ខ្ពង់ខ្ពស់របស់លោកឧបនាយករដ្ឋមន្ត្រី ប៊ិន ឈិន។
បើទោះជាមានចំណាររបស់លោករដ្ឋមន្ត្រីក្រសួងយុត្តិធម៌បែបនេះក៏ដោយ ក៏តុលាការខេត្តនៅតែអនុវត្តឱ្យខាងតែបាននាព្រឹកថ្ងៃទី៣០ ឧសភា។ ក្នុងនោះភាគីចាញ់ក្តីឈ្មោះកែវ តូច បានអំពាវនាវសុំឱ្យសម្តេចតេជោ ហ៊ុន សែន និងលោកជំទាវបណ្ឌិត មេត្តាជួយរកយុត្តិធម៌ដល់រូបគាត់ជាជនរងគ្រោះផង បើពុំដូច្នេះទេ ជនមានអំណាចនឹងបង្កធ្វើឱ្យសង្គមកើតមានបញ្ហាមិនចេះចប់មិនចេះហើយ។
លោកតន់ សីហៈតេជៈ ព្រះរាជអាជ្ញារងខេត្តបានឱ្យដឹងថា ចំពោះការចុះអនុវត្តសាលដីការបស់តុលាការកំពូលនៅពេលនេះ គឺលោកធ្វើតាមច្បាប់តែប៉ុណ្ណោះ បើមានភាគីណាមួយមិនសុខចិត្តសូមឱ្យទៅតវ៉ានៅចំពោះមុខច្បាប់ចុះ។ ខាងក្រោមនេះជាលិខិតអន្តរាគមន៍របស់ក្រសួងយុត្តិធម៌ក្នុងរឿងក្តីនេះ ដែលយើងសម្រេចថតចម្លងទាំងស្រុងដោយមិនធ្វើអត្ថាធិប្បាយបន្ថែមឡើយ៕
ចែករំលែកព័តមាននេះ