ទោះមានការអំពាវនាវរបស់អាជ្ញាធរមានសមត្ថកិច្ចដល់ប្រជាពលរដ្ឋឱ្យមានការប្រយ័ត្នប្រយែងនៅក្នុងការធ្វើស្រែប្រាំងក្នុងបរិមាណច្រើន ដើម្បីកុំឱ្យមានការខាតបង់ដោយសារឆ្នាំនេះ អាចខ្វះខាតទឹកយ៉ាងក្តីក៏មានពលរដ្ឋមួយចំនួនបានបន្តធ្វើស្រែប្រាំង ឬបានជ្រុលក្នុងការបង្កបង្កើនផលទៅហើយ ដោយហេតុថា ការចុះធ្វើស្រែជាការងាររបស់កសិករដែលត្រូវធ្វើជាប្រចាំ ដើម្បីទ្រទ្រង់ជីវភាពរបស់ពួកគាត់ផង និងទ្រទ្រង់សេដ្ឋកិច្ចជាតិដែរ ។ រហូតដល់ពេលនេះ…
ទោះមានការអំពាវនាវរបស់អាជ្ញាធរមានសមត្ថកិច្ចដល់ប្រជាពលរដ្ឋឱ្យមានការប្រយ័ត្នប្រយែងនៅក្នុងការធ្វើស្រែប្រាំងក្នុងបរិមាណច្រើន ដើម្បីកុំឱ្យមានការខាតបង់ដោយសារឆ្នាំនេះ អាចខ្វះខាតទឹកយ៉ាងក្តីក៏មានពលរដ្ឋមួយចំនួនបានបន្តធ្វើស្រែប្រាំង ឬបានជ្រុលក្នុងការបង្កបង្កើនផលទៅហើយ ដោយហេតុថា ការចុះធ្វើស្រែជាការងាររបស់កសិករដែលត្រូវធ្វើជាប្រចាំ ដើម្បីទ្រទ្រង់ជីវភាពរបស់ពួកគាត់ផង និងទ្រទ្រង់សេដ្ឋកិច្ចជាតិដែរ ។
រហូតដល់ពេលនេះ គេបានលឺសំឡេងដង្ហើយរបស់កសិករពីតំបន់មួយចំនួនឱ្យមានការជួយសង្ក្រោះស្រែប្រាំងរបស់ពួកគាត់ដោយសារការខ្វះទឹកនេះ ។ កសិករអះអាងថា ប្រសិនស្រូវប្រាំងរបស់គាត់ត្រូវខូចនោះពួកគាត់នឹងខាតបង់ថវិកាជាច្រើន ដោយសារការចុះធ្វើស្រែពួកគាត់បានចំណាយថវិកាទិញពូជ កម្លាំងគ្រឿងយន្ត និងជីកសិកម្មជាដើម ។
កសិកម្នាក់នៅខេត្តពោធិ៍សាត់ ទឹកដីដែលអាជ្ញាធរបានជូនដំណឹងពីការមិនគួរ ធ្វើស្រែប្រាំងនោះបានអះអាងថា ការចុះធ្វើស្រែប្រាំងនៅពេលនេះ គឺដោយសារគាត់រំពឹងថា អាចបានចំណូលយកទៅដោះស្រាយការជំពាក់លុយគេ ។ លោកថា ប្រសិនជាស្រូវត្រូវខូចនោះគាត់នឹងមានបំណុលកើនឡើង ។ កសិករឈ្មោះស៊ូ និយាយថា « ឆ្នាំហ្នឹង ខ្ញុំជំពាក់លុយគេច្រើន ដោយសារលុយជីផង លុយទិញប្រេងសម្រាប់ម៉ាស៊ីនបូមផង ។ យើងទិញថ្នាំគេ ជឿគេបណ្ដាក់គេរហូត ។ បើនិយាយទៅបណ្ដាក់ទាំងអស់ ។ វាអត់មានលុយឯង ។ លុយឯងធ្វើស្រែវស្សាបានតែមួយហិកតាដល់យើងធ្វើចូលពីរហិកតាវាអស់ច្រើន ។ យើងរុញដី រុញអីផង អ៊ីចឹងខាតច្រើនណាស់ ឆ្នាំនេះ» ។
ការដង្ហើយរកជំនួយរបស់ប្រជាកសិករនាពេលនេះ អាចជាការជូនដំណឹងដល់ អាជ្ញាធរ មានសមត្ថកិច្ចនៅក្នុងការប្រឹងប្រែងស្វែងរកដំណោះស្រាយឱ្យបានទាន់ពេលវេលាក្នុងការជួយស្រោចស្រង់ស្រែប្រាំងរបស់កសិករដែលកំពុងខ្វះទឹក ។ ជីកអណ្តូង និងការស្វែងរកប្រភពទឹក ដើម្បីទាញយកមកជួយសង្គ្រោះពលរដ្ឋ គឺជាអ្វីដែលគេមើលឃើញថា អាជ្ញាធរអាចអនុវត្តភ្លាមៗ ដើម្បីដោះស្រាយបញ្ហាចំពោះមុខ ។ ក្រៅពីនោះ គេក៏សិក្សា និងកសាងសំណង់ធានាសាស្ត្របន្ថែមទៀត ដើម្បីលើកកម្ពស់វិស័យកសិកម្មក៏ដូចជា ការលើកកម្ពស់ជីវភាពកសិករ ។ ដោយហេតុថា អភិវឌ្ឍន៍វិស័យកសិកម្ម គឺមិនបានខ្វះទឹកបាននោះទេ ។ ធ្វើស្រែនឹងទឹកធ្វើសឹកនឹងបាយ ។ ជាទូទៅការធ្វើស្រែនៅកម្ពុជាបានជួបប្រទះគ្រោះធម្មជាតិជាញឹកញាប់ដូចជារដូវប្រាំងគ្មានទឹក រដូវវស្សាទឹកជំនន់ ។
វិស័យកសិកម្មជាសរស្តម្ភមួយ ដែលបានទ្រទ្រង់សេដ្ឋកិច្ចជាតិ ។ ឆ្នាំ២០២២ផលិតផលកសិកម្មចំនួន ៨,៦ លានតោន ដែលស្មើនឹងតម្លៃសរុបជិត៥ ពាន់លានដុល្លារត្រូវបានកម្ពុជានាំចេញទៅផ្សារអន្តរជាតិ ។ វិស័យកសិកម្មបានរួមចំណែកជាង២២ ភាគរយនៃផលិតផលសរុបក្នុងស្រុក (GDP) កម្ពុជា។
រដ្ឋាភិបាលកម្ពុជាតែងតែបង្ហាញសុឆន្ទៈនៅក្នុងការជួយកសិករ ដូចជាជួយរកទីផ្សារ ជួយផ្នែកបច្ចេកទេស និងគិតគូរដល់ប្រព័ន្ធធារាសាស្ត្រផងដែរ ។ ប៉ុន្តែបញ្ហាខ្វះទឹក គឺជាបញ្ហាទាមទារអោយមានការពង្រីកប្រព័ន្ធធារាសាស្ត្រកាន់តែទូលំទូលាយ ដើម្បីជួយដល់ការដាំដុះរបស់កសិករ ៕
ចែករំលែកព័តមាននេះ