ខេត្តបាត់ដំបង ៖ បុរសម្នាក់ទិញដីយកមកចាក់នៅខាងមុខផ្ទះ តែក្រោយពេលរថយន្តចាក់អស់ស្រាប់តែគាត់ប្រទះឃើញគ្រាប់យុទ្ធភណ្ឌមិនទាន់ផ្ទះចំនួន០២គ្រាប់ កាលពីព្រឹកថ្ងៃទី០៥ កុម្ភៈ នៅភូមិសាលាបាឡាត់ សង្កាត់អូរម៉ាល់ ដែលធ្វើអោយគាត់ភ័យស្ទើរសល់ព្រលឹង ហើយបានរាយការណ៍ប្រាប់សមត្ថកិច្ចភ្លាមៗដែរ ។
មន្ត្រីមូលដ្ឋានដែលបានចុះទៅពិនិត្យគ្រាប់យុទ្ធភណ្ឌបានប្រាប់ថា ម្ចាស់ផ្ទះឈ្មោះ ចាន់ សាន្ត បានប្រទះឃើញគ្រាប់កាំភ្លើងនោះ នៅពេលរថយន្តចាក់ដីអស់ ហើយគាត់ក៏បានផ្ដល់ព័ត៌មានទៅកាន់សមត្ថកិច្ច ដើម្បីឱ្យជួយអន្តរាគមន៍ប្រភពដដែលបានបញ្ជាក់ថា គាត់បានទិញដីចាក់ខាងមុខផ្ទះ ហើយរថយន្តដឹកដីដោយទាំងគ្រាប់មីន គ្រាប់បេ តែសំណាងល្អគ្រាប់នោះមិនផ្ទុះ ។
គ្រាប់យុទ្ធភណ្ឌទាំង០២គ្រាប់នោះ ជាប្រភេទគ្រាប់ B-40 (គ្រាប់ប៊ុមប៊ី) និងគ្រាប់មីន APERS (ក្រឡាទៀប) ដែលជាប្រភេទគ្រាប់ ដែលអាចបង្កគ្រោះថ្នាក់បំផុត។ គេមិនទាន់ដឹងថា តើរថយន្តដឹកដីលក់នោះ កាយពីដីស្រែ ឬ កាយដីតាមប្រឡាយទេ ទើបបានជាកាយដោយទាំងគ្រាប់កាំភ្លើងបែបនេះ ។
មន្ត្រីមូលដ្ឋានបានប្រាប់ថា ក្រោយពីប្រទះឃើញគ្រាប់ អាជ្ញាធរបានរាយការណ៍ទៅអង្គភាពកម្ចាត់មីន ស៊ីម៉ាក់យកពិនិត្យ និងទទួលយកគ្រាប់យុទ្ធភណ្ឌទាំង០២គ្រាប់នោះហើយ និងបានចុះទៅពិនិត្យដល់ទីតាំងដែលគ្រឿងចក្រកាយដីនោះទៀតផង ។
ចែករំលែកព័តមាននេះ