ថៃដែលគេអាចគិតថា គឺជាជម្រកឬអាចជាជំរុំរបស់ក្រុមប្រឆាំងនឹងរាជរដ្ឋាភិបាលឬក៏អាជ្ញាធរ កម្ពុជាតែងតែរត់គេចដោយសារតែមានព្រំដែនដ៏ធំទូលាយជាមួយគ្នានោះនៅពេលនេះបានក្លាយជាប្រទេសដែលលែងមានសុវត្ថិភាពរបស់ពួកគេទៀតហើយ។ តាមសេចក្តីរាយការណ៍របស់សារព័ត៌មានបរទេសបានឲ្យដឹងថា នៅមុនពេលដែលសម្តេច ធិបតី ហ៊ុន ម៉ាណែត នាយករដ្ឋមន្ត្រីកម្ពុជាអញ្ជើញទៅបំពេញទស្សនៈកិច្ចនៅរាជាណាចក្រក្បែរខាងនោះតែប៉ុន្មានថ្ងៃ អាជ្ញាធរថៃបានចាប់ខ្លួនក្រុមប្រឆាំងនឹងរដ្ឋាភិបាលដែលបានរត់មកជ្រកកោននៅប្រទេសនេះ…
ថៃដែលគេអាចគិតថា គឺជាជម្រកឬអាចជាជំរុំរបស់ក្រុមប្រឆាំងនឹងរាជរដ្ឋាភិបាលឬក៏អាជ្ញាធរ កម្ពុជាតែងតែរត់គេចដោយសារតែមានព្រំដែនដ៏ធំទូលាយជាមួយគ្នានោះនៅពេលនេះបានក្លាយជាប្រទេសដែលលែងមានសុវត្ថិភាពរបស់ពួកគេទៀតហើយ។
តាមសេចក្តីរាយការណ៍របស់សារព័ត៌មានបរទេសបានឲ្យដឹងថា នៅមុនពេលដែលសម្តេច ធិបតី ហ៊ុន ម៉ាណែត នាយករដ្ឋមន្ត្រីកម្ពុជាអញ្ជើញទៅបំពេញទស្សនៈកិច្ចនៅរាជាណាចក្រក្បែរខាងនោះតែប៉ុន្មានថ្ងៃ អាជ្ញាធរថៃបានចាប់ខ្លួនក្រុមប្រឆាំងនឹងរដ្ឋាភិបាលដែលបានរត់មកជ្រកកោននៅប្រទេសនេះ និងក្រុមគ្រួសាររបស់ពួកគេដល់ទៅ៣រូប នៅនឹងកន្លែងដែលពួកគេស្នាក់នៅនៅតាមកន្លែងផ្សេងៗគ្នា។
ក្រុមសកម្មជនដែលមាននិន្នាការប្រឆាំងនឹងរាជរដ្ឋាភិបាលទាំងបីរូបនេះ គឺរួមមានឈ្មោះ លឹម សុខា អាយុ ៤៥ឆ្នាំ ជាអនុប្រធានគណកម្មការជនភៀសខ្លួនកម្ពុជា ដែលគេដឹងថា រត់មកជ្រកនៅថៃតាំងពីឆ្នាំ២០១៧ ។ ម្នាក់ទៀតឈ្មោះ ផន ផាន់ណា អាយុ៤១ ឆ្នាំ ជាសមាជិកបណ្តាញ យុវជនកម្ពុជាសាកល ដែលបានរត់គេចខ្លួនទៅកាន់ទីនោះតាំងពីឆ្នាំ២០២២ និងម្នាក់ទៀត គឺ គង់ រ៉ៃយ៉ា អាយុ៣២ឆ្នាំ ដែលបានរត់គេចខ្លួនមកទីនោះតាំងពីខែកក្កដា ដោយជននេះ ធ្លាប់ ចុះចូលជាមួយនឹងគណបក្សប្រជាជនកម្ពុជា រួចហើយតែក៏បានប្រឆាំងវិញ រហូតដល់គេខ្លួន ។
ការចាប់ខ្លួនរបស់ពួកគេនេះ ត្រូវបានអាជ្ញាធរថៃលើកឡើងថា គឺដោយសារតែពួកគេស្នាក់នៅក្នុងប្រទេសថៃដោយខុសច្បាប់ ប៉ុន្តែប្រភពខ្លះបានលើកឡើងថា គឺដោយសាតែពួកគេរៀបចំផែនការធ្វើបាតុកម្មប្រឆាំងនៅក្នុងដំណើរទស្សនៈកិច្ចរបស់សម្តេចធិបតី ។ ការចាប់ខ្លួនពួកគេនោះ សមាជិកក្រុមគ្រួសាររបស់ពួកគេក៏ត្រូវចាប់ខ្លួនផងដែរ ។ តាមការគ្រោងទុក សម្តេចធិបតី និងភរិយាគ្រោងនឹងបំពេញទស្សនៈកិច្ចផ្លូវការនៅថៃ នៅថ្ងៃទី០៧ខែកុម្ភៈ ឆ្នាំ២០២៤ ខាងមុខតបតាមការអញ្ជើញរបស់លោក សេដ្ឋា ថារីស៊ីន ។
ពាក់ព័ន្ធនឹងដំណើរទស្សនៈកិច្ចនេះ ក្រសួងការបរទេសកម្ពុជាបានឲ្យដឹងថា ក្រៅពីចូលគាល់មហាក្សត្រថៃ សម្តេចធិបតីក៏នឹងជួបប្រធានព្រឹទ្ធសភា និង ប្រធានរដ្ឋសភាថៃផងដែរ ។ ក្រៅពីនោះ លោកនឹងជួបពិភាក្សាទ្វេរភាគីជាមួយនឹងលោក សេដ្ឋា ថាវីស៊ីន លើកិច្ចសហប្រតិបត្តិការទ្វេរភាគី និងពហុភាគី ដែលផ្តល់ផលប្រយោជន៍ទៅវិញទៅមក ។ ទន្ទឹមនឹងនេះ កម្ពុជា និងថៃក៏នឹងចុះហត្ថលេខាលើឯកសារស្តីពីកិច្ចសហប្រតិបត្តិការទ្វេភាគីមួយចំនួន ហើយសម្តេចធិបតីក៏នឹងថ្លែងសុន្ទរកថា បើកវេទិកាធុរកិច្ចកម្ពុជា-ថៃ ។
ក្រសួងការបរទេសមិនបានលើកឡើងនូវករណីនៃការចាប់ខ្លួននោះទេ ដោយគ្រាន់តែបញ្ជាក់ថា ដំណើរទស្សនៈកិច្ចផ្លូវការរបស់សម្តេចធិបតី ទៅកាន់ថៃនឹងពង្រឹងបន្ថែមទៀតនូវទំនាក់ទំនងដ៏យូរអង្វែង និងចំណងមិត្តភាពជាប្រពៃណីរវាងប្រទេសទាំងពីរស្របតាមស្មារតីនៃការពង្រឹងភាពជាដៃគូ ដើម្បីសន្តិភាពនិងវិបុលភាព ដែលផ្តល់ផលប្រយោជន៍ទៅវិញទៅមកសម្រាប់ប្រជាជននៃប្រទេសទាំងពីរ ព្រមទាំងសម្រាប់សន្តិភាព ស្ថិរភាព និងវិបុលភាព ក្នុងសហគមន៍អាស៊ាន និងអន្តរជាតិ ។
ទំនាក់ទំនងរវាងកម្ពុជានិង ថៃបានចាប់ផ្តើមល្អូកល្អិននេះបានកើតមានឡើងចាប់តាំងពីថៃក្រហមបានឡើងកាន់អំណាចជាថ្មី ហើយនៅមុននេះអ្នកដែលនៅពីក្រោយ ថៃក្រហមដ៏មានឥទ្ធិពល គឺលោក ថាក់ស៊ីន ស៊ីណាវ៉ាត្រា ក៏ធ្លាប់មកកម្ពុជានៅមុនពេលលោកសម្រេចចិត្តចូលប្រទេស ដើម្បីទទួលទោសពីបទពាក់ព័ន្ធនឹងបទចោទប្រកាន់មួយចំនួនដែលរបបសឹកយោធា ថៃធ្លាប់ចោទប្រកាន់មុនពេលលោកត្រូវបានធ្វើរដ្ឋប្រហារ ។ លោក សេដ្ឋា ថាវីស៊ីន ផ្ទាល់ក៏បានមកបំពេញទស្សនៈកិច្ចនៅកម្ពុជាដំបូងគេ នៅពេលដែលលោកបានចូលកាន់តំណែងភ្លាមៗ។
ទំនាក់ទំនងនេះក្រៅពីធ្វើឲ្យក្រុមប្រឆាំងបាត់បង់មូលដ្ឋានក្រៅប្រទេសរបស់ខ្លួនហើយនោះ កម្ពុជា និងថៃក៏អាចនឹងបើកទំព័រកិច្ចសហប្រតិបត្តិការសេដ្ឋកិច្ចមួយចំនួនបន្ថែមទៀត ជាពិសេស គឺពាណិជ្ជកម្ម ទេសចរណ៍ និងបញ្ហាជម្លោះនៅឈូងសមុទ្រថៃ។ នៅលើទិដ្ឋភាពពាណិជ្ជកម្មភាគីមេដឹកនាំកម្ពុជា និងថៃអាចនឹងពិភាក្សាអំពីបញ្ហាអភិវឌ្ឈន៍សេដ្ឋកិច្ចនៅតាមព្រំដែនការជំរុញ និងលើកកម្ពស់ពាណិជ្ជកម្មនិងការបណ្តាក់ទុននៅលើការតភ្ជាប់វិស័យដឹកជញ្ជូន ។ ដោយឡែកទេសចរណ៍វិញនៅពេលនេះ ថៃជាទីផ្សារទេសចរណ៍ដ៏ធំរបស់កម្ពុជាដោយអ្នកទេសចរថៃបានមកលេងកម្ពុជាដល់ទៅជិត២លាននាក់ ខណៈដែលពលរដ្ឋកម្ពុជាចាត់ទុកថៃជាកន្លែងទេសចរណ៍ និងជំនួញរបស់ពួកគេស្រាប់ទៅហើយ ។
តាមសារព័ត៌មានថៃ បានលើកឡើងនោះ នៅក្នុងដំណើរទស្សនៈកិច្ចនេះ ភាគីទាំងពីររំពឹងថា នឹងបើកការពិភាក្សាគ្នាឡើងវិញពាក់ព័ន្ធនឹងតំបន់ត្រួតស៊ីគ្នា នៅក្នុងឈូងសមុទ្រថៃ ដែលមានប្រវែងប្រមាណជា ២៧.០០០ គីឡូម៉ែត្រការ៉េ ដែលទីនោះអាចជាកន្លែងមាន សក្តានុពលផ្នែកធនធានរ៉ែប្រេងកាត និងឧស្ម័ន ៕ ដោយៈ ហេង ចេស្តារ
ចែករំលែកព័តមាននេះ