(កីឡា)៖ កាលពីថ្ងៃទី០៣ ខែកុម្ភៈ សំបុត្រចូលទស្សនាការប្រកួតមិត្តភាព រវាង Inter Miami និងក្រុមរបស់ហុងកុង League XI ចំនួន៤០,០០០ បានលក់អស់ ដោយអ្នកគាំទ្រ​ហុងកុង រំភើបនឹងចង់ទស្សនាកំពូល​តារា​អាហ្សង់ទីនប្រកួតផ្ទាល់។

Inter Miami បានយកឈ្នះហុងកុងក្នុងលទ្ធផល ៤-១ ក្នុងការប្រកួតមិត្តភាពកាលពីរសៀលថ្ងៃទី៤ ខែកុម្ភៈ ប៉ុន្តែអ្វីដែលអ្នកគាំទ្រខកចិត្តនោះ គឺ Lionel Messi មិនបានចូលលេងនោះទេ ពោលគឺនៅកៅអីបម្រុងរហូតសូម្បីតែចុងម៉ោងក៏មិនបានចូលលេងដែរ។

អ្នកគាំទ្រជាច្រើននៅ​កន្លែងប្រកួត​ឈរ​ខឹង​នឹង​ស្រែក​ទាមទារឱ្យសងថ្លៃសំបុត្រដែលមានតម្លៃជាង១០០ដុល្លារឡើង ហើយមានវីដេអូ​មួយ​របស់​អ្នក​គាំទ្រ​ម្នាក់​ទាត់​ផ្លាក​សញ្ញា​ផ្សាយ​ពាណិជ្ជកម្ម​ជាមួយ​នឹង​រូបភាព​របស់ Messi បាន​បង្ក​ឱ្យ​មាន​ការ​កក្រើក​ពេញ​បណ្ដាញ​សង្គម។

NBC News បានសរសេរថា «រយៈពេល ៣ថ្ងៃរបស់ Messi នៅហុងកុងបានបញ្ចប់ដោយការខកចិត្តសម្រាប់អ្នកគាំទ្រ»។ សូម្បី​តែ​រដ្ឋាភិបាល​ហុងកុង​ក៏​សម្ដែង​ការ​ខក​ចិត្ត​ពេល​តារា​វ័យ ៣៦ ឆ្នាំ​រូប​នេះ​មិន​បានចូល​លេង។ គ្រូបង្វឹកក្លឹប Inter Miami លោក Gerardo Martino បានពន្យល់ថា Leo មិនទាន់បានជាសះស្បើយពីរបួសរបស់គាត់នៅឡើយទេ។ លោក Martino បាននិយាយថា «យើងយល់ពីអារម្មណ៍របស់អ្នកគាំទ្រ និងក្តីសង្ឃឹមសម្រាប់ការអភ័យទោស»៕