ទីក្រុងស៊ីដនី៖ រដ្ឋមន្ត្រីការបរទេសអូស្ត្រាលី លោកស្រីផឹននី វ៉ុង (Penny Wong)សោកស្ដាយចំពោះការសម្រេចរបស់តុលាការចិនដែលព្យួរទុកទោសប្រហារជីវិតជនជាតិអូស្ត្រាលីដើមកំណើតចិន លោកយ៉ាងហេងជុន (Yang Hengjun) ជាអ្នកនិពន្ធ និងសរសេរប្លក់ (blogger)។ គាត់ជាប់ឃុំរយៈពេល៥ឆ្នាំមកហើយបទចារកម្ម បន្ទាប់ពីត្រូវសមត្ថកិច្ចចិនចាប់ខ្លួនកាលពីឆ្នាំ២០១៩នៅអាកាសយានដ្ឋានទីក្រុងក្វាងចូវ ដោយចោទប្រកាន់គាត់ពីបទលួចយកការណ៍សម្ងាត់ទៅឱ្យរដ្ឋបរទេស។
បុរសវ័យ៥៧ឆ្នាំរូបនេះជាអ្នកសរសេរប្លក់គាំទ្រលទ្ធិប្រជាធិបតេយ្យ។ គាត់កើតនៅប្រទេសចិន និងក្រោយមកចូលសញ្ជាតិអូស្ត្រាលី។ ខែឧសភា ឆ្នាំ២០២១ តុលាការនាំខ្លួនគាត់ឡើងតុលាការ និងកាត់ទោសគាត់ជាអសាធារណៈត្រឹមតែមួយថ្ងៃប៉ុណ្ណោះ។ សូម្បីតែសេចក្ដីសម្រេចរបស់តុលាការបែបណាក៏មិនត្រូវបានផ្សព្វផ្សាយជាសាធារណៈដែរ។ ក្រុមគ្រួសារលោកយ៉ាងហេងជុនភ្ញាក់ផ្អើលនឹងសេចក្ដីសម្រេចនេះ និងចាត់ទុកថាជាការសម្រេចដែលមានសភាពធ្ងន់ធ្ងរហួសពីការស្មាន។
រដ្ឋមន្ត្រីការបរទេសអូស្ត្រាលី លោកស្រីផឹននី វ៉ុង (Penny Wong) ថ្លែងថារដ្ឋាភិបាលរបស់លោកស្រីក៏ភ្ញាក់ផ្អើលយ៉ាងខ្លាំងផងដែរនឹងការសម្រេចរបស់តុលាការ។ លោកស្រីថ្លែងថាក្រសួងបានកោះហៅឯកអគ្គរដ្ឋទូតចិនទៅជម្រាបជូនពីការមិនទទួលយកនូវសេចក្ដីសម្រេចនេះ។ លោកស្រីថ្លែងថារដ្ឋាភិបាលអូស្ត្រាលីបានតស៊ូមតិតាមគ្រប់លទ្ធភាពនៅក្នុងសំណុំរឿងលោកយ៉ាងហេងឈុន។ លោកស្រីថ្លែងថាពលរដ្ឋអូស្ត្រាលីគ្រប់រូបចង់ឃើញលោកយ៉ាងវិលត្រឡប់ទៅជួបជុំក្រុមគ្រួសារវិញ។
យោងតាមសេចក្ដីសម្រេចរបស់តុលាការចិនដែលគេដឹងកាលពីព្រឹកមិញ លោកយ៉ាងត្រូវបន្ធូរបន្ថយទោសពីប្រហារជីវិតភ្លាមៗមកពន្យារពេល២ឆ្នាំដើម្បីតាមដានមើលសកម្មភាពរបស់គាត់។ បើតុលាការពិនិត្យឃើញថាគាត់កែប្រែអត្តចរិតមកជាមនុស្សល្អវិញ តុលាការនឹងបន្ធូរបន្ថយមកជាប់ពន្ធនាគារមួយជីវិត ឬ២៥ឆ្នាំ។ ប៉ុន្តែសេចក្ដីសម្រេចរបស់តុលាការចិនកម្រអ្នកណាប្ដឹងទាស់បានជោគជ័យណាស់។ លើសពី៩៩,៩%បន្ទាប់ពីតុលាការសម្រេចហើយត្រូវរក្សាទុកជាបានការដដែល។
អូស្ត្រាលីនឹងប្ដឹងទាស់នឹងសេចក្ដីសម្រេចនេះ ខណៈដែលគ្រូបង្រៀនរបស់លោកយ៉ាងប្រាប់ថាសុខភាពរបស់លោកយ៉ាងកំពុងតែចុះទ្រុឌទ្រោមខ្លាំងណាស់។ ដូច្នេះ គួរតែដោះលែងគាត់ត្រឡប់ទៅអូស្ត្រាលីវិញ។ គ្រូរូបនេះស្នើសុំឱ្យរដ្ឋាភិបាលអូស្ត្រាលីជួយនិយាយធ្វើម៉េចឱ្យលោកយ៉ាងហេងជុនអាចវិលត្រឡប់ទៅអូស្ត្រាលីវិញដោយស្នើសុំនៅក្រៅឃុំ (parole) ដើម្បីព្យាបាលជំងឺ។
ក្រុមអ្នកគាំទ្រលោកយ៉ាងយល់ថាការដាក់ទោសធ្ងន់ដល់ថ្នាក់នេះដោយសារគាត់រិះគន់ការរំលោភសិទ្ធិមនុស្សនៅប្រទេសចិន និងការដែលគាត់តស៊ូមតិដើម្បីសិទ្ធិមនុស្ស, លទ្ធិប្រជាធិបតេយ្យ និងនីតិរដ្ឋ។ គ្រូបង្រៀនរបស់គាត់ប្រាប់ថាលោកយ៉ាងធ្លាប់ធ្វើការឱ្យក្រសួងសន្តិសុខជាតិចិនរយៈពេល១៤ឆ្នាំ។ កាលនោះធ្វើការនៅថ្នាក់ខេត្ត។ ធ្វើការយូរៗទៅ គាត់មានគំនិតស្អប់ខ្ពើមនឹងការងាររបស់ខ្លួនឯង។ គាត់ក៏ងាកទៅសរសេរប្រលោមលោកស៊ើបអង្កេតវិញម្ដងដោយប្រើប្រាស់បទពិសោធនៅកន្លែងធ្វើការ។
ក្រោយមក ដោយសារមើលស្ថានការណ៍មិនស្រួល គាត់ក៏ផ្លាស់ទៅរស់នៅប្រទេសអូស្ត្រាលី និងទទួលបានសញ្ជាតិអូស្ត្រាលី។ ប្រាំឆ្នាំក្រោយពេលទៅអូស្ត្រាលី គាត់ចូលរៀននៅសាកលវិទ្យាល័យបច្ចេកវិទ្យាទីក្រុងស៊ីដនី និងកែប្រែខ្លួនពីជនកុម្មុយនិស្តចិនទៅជាអ្នកសេរីនិយមវិញម្ដង។ នៅពេលត្រូវសមត្ថកិច្ចចាប់ឃុំខ្លួននោះ គាត់ធ្វើការនៅទីក្រុងញូយ៉ក៕
ប្រភព៖ The Guardian, Al Jazeera
https://www.theguardian.com/world/2024/feb/05/australian-academic-yang-hengjun-given-suspended-death-sentence-by-chinese-court-writer-wong
https://www.aljazeera.com/news/2024/2/5/australian-writer-yang-hengjun-sentenced-to-death-on-china-spy-charges
ចែករំលែកព័តមាននេះ