ខេត្តកំពង់ស្ពឺ ៖ សមាជិកក្រុមប្រឹក្សារបស់គណបក្សភ្លើងទៀន នៅឃុំទួលអំពិល ស្រុកបសេដ្ឋ ខេត្តកំពង់ស្ពឺ ដែលជាអង្គបោះឆ្នោត នៅថ្ងៃទី២៦ ខែឧសភា ឆ្នាំ២០២៤…
ខេត្តកំពង់ស្ពឺ ៖ សមាជិកក្រុមប្រឹក្សារបស់គណបក្សភ្លើងទៀន នៅឃុំទួលអំពិល ស្រុកបសេដ្ឋ ខេត្តកំពង់ស្ពឺ ដែលជាអង្គបោះឆ្នោត នៅថ្ងៃទី២៦ ខែឧសភា ឆ្នាំ២០២៤ ស្អែកនេះ និងបក្ខពួក ត្រូវនគរបាលឃាត់ខ្លួនកាលពីយប់ថ្ងៃទី២៤ ខែឧសភា បន្ទាប់ពីបានផឹកស្រាស្រវឹង បង្កអំពើហិង្សាលើអ្នកដទៃ ។
អធិការ នៃអធិការដ្ឋាននគរបាលស្រុកបសេដ្ឋ លោកវរសេនីយ៍ឯក ចន សុភិត បានប្រាប់ថា ជនសង្ស័យ ដែលត្រូវបានឃាត់ខ្លួនមានចំនួន ២នាក់ ក្នុងនោះ រួមមាន ៖ ឈ្មោះ ឈូក ង៉ែត អាយុ៤៣ឆ្នាំ រស់នៅភូមិសង្គ្រាមបូរ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ជាអង្គបោះឆ្នោតបក្សភ្លើងទៀន និងបក្ខពួកឈ្មោះ យ៉ុង ផាត អាយុ៤៣ឆ្នាំ រស់នៅភូមិតាម៉ឺន ឃុំទួលអំពិល ស្រុកបសេដ្ឋ ខេត្តកំពង់ស្ពឺ ។
ក្រុមប្រឹក្សាបក្សភ្លើងទៀន និងបក្ខពួក បានព្រួតគ្នាធ្វើសកម្មភាពវាយទៅលើជនរងគ្រោះឈ្មោះ ដាង គ្រុយ ភេទប្រុស អាយុ៤៦ឆ្នាំ រស់នៅភូមិ-ឃុំកើតហេតុខាងលើ ត្រូវចំត្រចៀក១កន្លែង បបូរមាត់១កន្លែង និងក្បាលជង្គង់ បណ្ដាលឲ្យរងរបួសជាទម្ងន់ ។
ករណីហិ.ង្សានេះ កើតឡើងអំឡុងពេលជនរងគ្រោះ និងជនសង្ស័យ បានផឹកស៊ីជាមួយគ្នា ហើយបានទាស់ពាក្យសម្ដីគ្នាទៅវិញទៅមក ភ្លាមនោះ ជនសង្ស័យខាងលើ ខឹងបានព្រួតគ្នាវាយលើជនរងគ្រោះឲ្យរងរបួសតែម្ដងទៅ ។
លោកបានបន្តទៀតថា ក្រោយធ្វើសកម្មភាពរួចក្រុមជនសង្ស័យ បាននាំគ្នារត់គេចខ្លួនចេញពីកន្លែងកើតហេតុបាត់អស់តែម្ដង ។
ចំណែកជនរងគ្រោះត្រូវបានសាច់ញាតិបញ្ជូនទៅព្យាបាលនៅពេទ្យឯកជនមួយកន្លែង ក្នុងឃុំទួលអំពិល ស្រុកបសេដ្ឋ។
សូមបញ្ជាក់ថា បន្ទាប់ពីទទួលព័ត៌មានខាងលើ កម្លាំងជំនាញព្រហ្មទណ្ឌស្រុក សហការជាមួយកម្លាំងប៉ុស្តិ៍នគរបាលរដ្ឋបាលទួលអំពិល ចុះទៅដល់កន្លែងកើតហេតុ ប្រមូលព័ត៌មាន និងកសាងសំណុំរឿងចាត់ការទៅតាមនីតិវិធី ។
រហូតដល់ព្រឹកថ្ងៃទី២៥ ខែឧសភា ឆ្នាំ២០២៤ កម្លាំងជំនាញសហការជាប៉ុស្តិ៍ទួលអំពិល បន្តស្រាវជ្រាវរហូតឈានដល់ឃាត់ខ្លួនជនបង្កយកមកសួរនាំនៅអធិការដ្ឋាននគរបាលស្រុកបសេដ្ឋ ។
ក្រោយឃាត់ខ្លួនជនសង្ស័យឈ្មោះ ឈូក ង៉ែត បានឆ្លើយសារភាពថា ខ្លួន និងបក្ខពួកឈ្មោះ យ៉ុង ផាត ពិតជាបានធ្វើសកម្មភាពព្រួតគ្នាវាយទៅលើជនរងគ្រោះឈ្មោះ ដាង គ្រុយ ប្រាកដមែនមូលហេតុ ផឹកស៊ីទាស់ពាក្យសម្តីគ្នា ។
ពេលនេះសមត្ថកិច្ចកំពុងកសាងសំណុំរឿងដើម្បីបញ្ជូនទៅកាន់ជំនាញចាត់ការបន្ត ៕
ចែករំលែកព័តមាននេះ