ខេត្តបាត់ដំបង ៖ បុរសម្នាក់បានដើរជាន់មីនក្នុងចម្ការរមៀតរបស់ខ្លួនបណ្ដាលឱ្យផ្ទុះរបួសដាច់ជើងទាំងសងខាង កាលពីវេលាម៉ោង៩និង៣០នាទីព្រឹកថ្ងៃទី០៤ កុម្ភៈ ចម្ងាយពីបន្ទាត់ព្រំដែនខ្មែរ ថៃប្រហែល៣០០ម៉ែត្រត្រង់ចន្លោះប៉ុស្ដិ៍នគរបាលការពារព្រំដែនគោក «ចរិយា និងទីងមោង» ស្ថិតក្នុងភូមិភ្នំរៃ…
ខេត្តបាត់ដំបង ៖ បុរសម្នាក់បានដើរជាន់មីនក្នុងចម្ការរមៀតរបស់ខ្លួនបណ្ដាលឱ្យផ្ទុះរបួសដាច់ជើងទាំងសងខាង កាលពីវេលាម៉ោង៩និង៣០នាទីព្រឹកថ្ងៃទី០៤ កុម្ភៈ ចម្ងាយពីបន្ទាត់ព្រំដែនខ្មែរ ថៃប្រហែល៣០០ម៉ែត្រត្រង់ចន្លោះប៉ុស្ដិ៍នគរបាលការពារព្រំដែនគោក «ចរិយា និងទីងមោង» ស្ថិតក្នុងភូមិភ្នំរៃ ឃុំតតោក ស្រុកសំឡូត។
សេចក្ដីរាយការណ៍បានឱ្យដឹងថា ជនរងគ្រោះឈ្មោះ ស៊ីម សុភាព ភេទប្រុស អាយុ៥៥ឆ្នាំ រស់នៅក្នុងភូមិ ឃុំកើតហេតុខាងលើ ។ ជនរងគ្រោះបានដើរជីកមើមរមៀតនៅក្នុងចម្ការរបស់ខ្លួន ស្រាប់តែជាន់គ្រាប់មីនបណ្ដាលឱ្យផ្ទុះរបួសដាច់ជើងទាំងពីរ និងរបួសដៃខ្លះផង ហើយត្រូវកម្លាំងនគរបាលវរសេនាតូចការពារគោកលេខ៣១០ ដែលប្រចាំការតាមប៉ុស្ដិ៍ជាប់ព្រំដែនខ្មែរ-ថៃ ជួយអន្តរាគមន៍សែងចេញពីចំណុចកើតហេតុ រួចដឹកទៅកាន់មន្ទីរពេទ្យដើម្បីសង្គ្រោះបន្ទាន់ ។
មេបញ្ជាការវរសេនាតូចនគរបាលការពារព្រំដែនគោកលេខ៣១០ លោក អ៊ុក សារិន បានថ្លែងប្រាប់កោះសន្តិភាព នៅរសៀលថ្ងៃទី ០៤ កុម្ភៈ នេះថា ជនរងគ្រោះបានដើរជាន់មីនប្រភេទសញ្ញាលេខបូក (+)ដែលកប់ក្នុងដីសេសសល់ពីសម័យសង្គ្រាម ដែលមានចម្ងាយពីព្រំដែនខ្មែរ-ថៃប្រហែល៣០០ម៉ែត្រ ។
លោកបាននិយាយថា ដីចម្ការនៅតំបន់នោះមានប្រជាពលរដ្ឋកាប់ឆ្ការដាំដំណាំរាល់ឆ្នាំ តែមិនធ្លាប់បានដោះមីនទេ ហើយក៏មិនធ្លាប់ប្រើប្រាស់ត្រាក់ទ័រភ្ជួរដីម្ដងណាដែរ ដោយប្រជាពលរដ្ឋប្រើប្រាស់ត្រឹមចបកាប់ ដើម្បីកាប់ដីដាំដំណាំ ដែលភាគច្រើនពលរដ្ឋដាំរមៀត។
លោក អ៊ុក សារិន បានបញ្ជាក់ថា នៅព្រឹកកើតហេតុ ជនរងគ្រោះបានដើរគាស់មើមរមៀត តែអកុសល្យក៏ជាន់ចំគ្រាប់មីនបណ្ដាលឱ្យផ្ទុះរបួសដាច់ជើងទាំងសងខាងតែម្ដង ។ក្រោយទទួលបានព័ត៌មាននេះ កម្លាំងរបស់លោកដែលប្រចាំការតាមប៉ុស្ដិ៍ដែននៅក្បែរនោះ បាននាំគ្នាទៅជួយអន្តរាគមន៍ដើម្បីសែងជនរងគ្រោះចេញពីចំណុចគ្រោះថ្នាក់ រួចដឹកតាមរថយន្តបញ្ជូនគាត់ទៅមន្ទីរពេទ្យបង្អែកស្រុកសំឡូត ដើម្បីសង្គ្រោះបន្ទាន់ ។
លោកក៏បានបញ្ជាក់ដែរថា ដីនៅតំបន់ក្បែរព្រំដែនកន្លែងគ្រោះថ្នាក់ខាងលើនេះ មិនទាន់មានអង្គភាពកម្ចាត់មីន ធ្វើការបោសសំអាតគ្រាប់មីនឬយុទ្ធភ័ណ្ឌដទៃទៀតនៅឡើយទេ តែប្រជាពលរដ្ឋចេះតែនាំគ្នាកាប់ឆ្ការដាំដំណាំរមៀតស្រឡះស្ទើរគ្រប់កន្លែងអស់ទៅហើយ។ ដូច្នេះហើយទើបប្រជាពលរដ្ឋតែងជួបគ្រោះថ្នាក់ដោយគ្រាប់មីននេះជាបន្តបន្ទាប់រហូតមកដល់ពេលនេះ៕
ចែករំលែកព័តមាននេះ