រាជធានីភ្នំពេញ ៖ ជនសង្ស័យ២នាក់ ក្នុងចំណោមគ្នា៣នាក់ ដែលជាមុខសញ្ញាចាស់ ធ្លាប់ធ្វើសកម្មខាងឆក់ទូរសព្ទ ខ្សែ.ក និងកាបូបរបស់អ្នកដំណើរតាមផ្លូវ ត្រូវបានកម្លាំងនគរបាលខណ្ឌពោធិ៍សែនជ័យ ដេញតាមចាប់ខ្លួនបាន២នាក់…
រាជធានីភ្នំពេញ ៖ ជនសង្ស័យ២នាក់ ក្នុងចំណោមគ្នា៣នាក់ ដែលជាមុខសញ្ញាចាស់ ធ្លាប់ធ្វើសកម្មខាងឆក់ទូរសព្ទ ខ្សែ.ក និងកាបូបរបស់អ្នកដំណើរតាមផ្លូវ ត្រូវបានកម្លាំងនគរបាលខណ្ឌពោធិ៍សែនជ័យ ដេញតាមចាប់ខ្លួនបាន២នាក់ ចំណែកឯម្នាក់ទៀតរត់គេចខ្លួនបាត់ ។
សមត្ថកិច្ចចាប់ខ្លួនជនសង្ស័យខាងលើ ធ្វើឡើងកាលពីវេលាម៉ោង០១និង៣០នាទីរសៀលថ្ងៃទី០២ ខែកុម្ភៈ ឆ្នាំ២០២៤ នៅក្នុងភូមិត្រពាំងល្វា១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
មន្ត្រីនគរបាលខណ្ឌពោធិ៍សែនជ័យ បានអោយដឹងថា ជនសង្ស័យទាំង២នាក់ដែលត្រូវឃាត់រួមមាន ៖
ទី១- ឈ្មោះ គ្រៀល សីហា អាយុ១៧ឆ្នាំ ស្នាក់នៅក្នុងភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ។
និងទី២- ឈ្មោះ វី ចំរ៉ុង អាយុ១៧ឆ្នាំ ស្នាក់នៅក្នុងភូមិស្រែជម្រៅ សង្កាត់ចោមចៅទី២ ខណ្ឌពោធិសែនជ័យ។
វត្ថុតាងដកហូតបាន រួមមាន ៖
-ម៉ូតូម៉ាកហុងដាស្កូបពីពណ៌ស ១គ្រឿង ពាក់ស្លាកលេខ ភ្នំពេញ 1JN-0193 ជាមធ្យោបាយសម្រាប់ជិះធ្វើសកម្មភាព ។
-ទូរសព្ទដៃមួយគ្រឿង ម៉ាក iPhone14 promax (របស់ជនសង្ស័យ) ។
មន្ត្រីនគរបាលខណ្ឌពោធិ៍សែនជ័យ ប្រាប់ឲ្យដឹងថា ជនសង្ស័យខាងលើ គឺជាមុខសញ្ញាចាស់ ដែលកន្លែងមក ធ្លាប់បានធ្វើសកម្មភាពឆក់ក្នុងភូមិសាស្ត្រខណ្ឌពោធិ៍សែនជ័យ បានសម្រេចចំនួន៤លើករួចមកហើយ ។
មន្ត្រីនគរបាលខណ្ឌពោធិ៍សែនជ័យ ប្រាប់បន្តថា ដោយឡែកនៅថ្ងៃកើតហេតុ ក្រុមជនសង្ស័យបានចេញធ្វើសកម្មភាពនៅក្នុងភូមិសាស្ត្រខណ្ឌពោធិ៍សែនជ័យ ប៉ុន្តែគ្មានឱកាសឡើយ ក៏បានទៅធ្វើសកម្មភាពឆក់ស្ត្រីអ្នកដំណើរម្នាក់ នៅក្នុងភូមិសាស្ត្រខណ្ឌដង្កោ បានសម្រេចទូរសព្ទម៉ាក iPhone មួយគ្រឿង។ បន្ទាប់មក បាននាំគ្នាជិះម៉ូតូវិល ត្រឡប់ចូលទឹកដីខណ្ឌពោធិ៍វិញ ស្របពេលកម្លាំងនគរបាលខណ្ឌពោធិ៍សែនជ័យ កំពុងតែជិះល្បាត ក៏ប្រទះឃើញនៅតាមផ្លូវ ក្នុងភូមិតាងួន២ សង្កាត់កាកាបទី១ ក៏បានដេញតាមចាប់ខ្លួនបាន២នាក់ (ខណៈម្នាក់ទៀតរត់រួច) នាំទៅធ្វើការសាកសួរ តែម្ដង ។
មន្ត្រីនគរបាល បានប្រាប់បន្ថែមទៀតថា ក្រោយឃាត់ខ្លួន ជនសង្ស័យបានសារភាពថា នៅវេលាថ្ងៃត្រង់ទី០២ កុម្ភៈនេះ ពួកគេបានចេញទៅធ្វើសកម្មភាពឆក់ទូរសព្ទដៃ ពីនារីម្នាក់ កំពុងធ្វើដំណើរតាមផ្លូវ២១៧ ក្បែរស្ពានដែក ភូមិម័ល សង្កាត់ដង្កោ ខណ្ឌដង្កោ។ ក្រោយពេលឆក់បានសម្រេចហើយ ក៏បាននាំគ្នាជិះម៉ូតូវិល មកខណ្ឌពោធិ៍សែនជ័យវិញ ក៏ត្រូវបានកម្លាំងនគរបាលដេញតាមតាមចាប់ខ្លួនបានតែម្តង ចំណែកឯទូរសព្ទដែលឆក់នោះ ត្រូវបានបក្ខពួកម្នាក់ទៀត ដែលគេចខ្លួនរួចនោះ យកទៅជាមួយ ។
បច្ចុប្បន្ន ជនសង្ស័យទាំង២នាក់ ត្រូវបញ្ជូនខ្លួនទៅកាន់អធិការដ្ឋាននគរបាលខណ្ឌដង្កោ ដើម្បីសាកសួរ និងចាត់ការបន្តតាមនីតិវិធីច្បាប់ ៕
ចែករំលែកព័តមាននេះ