- ភ្នំពេញ
រាជធានីភ្នំពេញ ៖ គិតត្រឹមបំណាច់ខែមករា ឆ្នាំ២០២៤ ក្រសួងធម្មការ និងសាសនា បានប្រកាសពីការជួបធ្វើកំណត់ហេតុ និងចុះកិច្ចសន្យា រវាងមន្ត្រីជំនាញជាមួយគ្រូបារមី គ្រូអូមអាម…
រាជធានីភ្នំពេញ ៖ គិតត្រឹមបំណាច់ខែមករា ឆ្នាំ២០២៤ ក្រសួងធម្មការ និងសាសនា បានប្រកាសពីការជួបធ្វើកំណត់ហេតុ និងចុះកិច្ចសន្យា រវាងមន្ត្រីជំនាញជាមួយគ្រូបារមី គ្រូអូមអាម យ៉ាងហោចណាស់១០នាក់ នៅតាមបណ្តាខេត្តនានា និងនៅភ្នំពេញ ចាប់តាំងពីខែសីហា ឆ្នាំ២០២៣។
គ្រូបារមីទាំងនោះ បានចុះកិច្ចសន្យាផ្តិតមេដៃ ដោយបានសន្យាលុបរូបភាព និងវីដេអូ ដែលមានពីមុនបង្ហោះតាមហ្វេសប៊ុក និងយូធូប ឬក៏តិកតុក ហើយប៉ះពាល់ដល់សណ្តាប់ធ្នាប់សាធារណៈ ។ គ្រូបារមី គ្រូអូមអាម ក៏បានសន្យាថា មិនបន្តថតរូប ឬឡាយវីដេអូ ( Live Video ) ពីសកម្មភាពធ្វើពិធីផ្សេងៗដែលធ្វើឱ្យប៉ះពាល់ដល់ប្រពៃណីទំនៀមទំលាប់វប្បធម៌ខ្មែរទេ ។ ក្នុងនោះ គ្រូបារមី-គ្រូអូមអាម បានប្រកាសសន្យាថា សុខចិត្តទទួលខុសត្រូវចំពោះមុខច្បាប់ ក្នុងករណីដែលរូបគេនៅតែប្រព្រឹត្តកំហុសបន្តទៀត ។
ក្រសួងធម្មការ និងសាសនា ក៏បានប្រកាសអំពាវនាវដល់មហាជនដែលប្រើប្រាស់បណ្តាញសង្គមទាំងអស់ សូមឈប់បង្ហោះវីដេអូចាស់ៗកន្លងទៅ ឬវីដេអូថ្មីៗ ពាក់ព័ន្ធនឹងគ្រូបារមី គ្រូអូមអាមផ្សេងៗ ។ ប្រសិនបើមិនបញ្ឈប់ទេ សាមីខ្លួននឹងត្រូវទទួលនូវវិធានការតាមផ្លូវច្បាប់ជាធរមាន ។
សូមរម្លឹកថា ក្នុងរយៈពេលប៉ុន្មានថ្ងៃនេះ ក្រសួងធម្មការ និងសាសនា តាមរយៈមន្ទីររាជធានីខេត្ត រួមទាំងប៉ូលិសផង បានហៅគ្រូបារមី គ្រូអូមអាម មកអប់រំណែនាំ និងធ្វើកិច្ចសន្យាជាបន្តបន្ទាប់ ។ ក្នុងនោះរួមមាន៖ ១-លោក ម៉ម សាវិន នៅខេត្តសៀមរាប កាលពីថ្ងៃទី២៨ ខែសីហា ឆ្នាំ២០២៣ ។ ២-លោក ស៊ូ សេងហ៊ួ នៅរាជធានីភ្នំពេញ នៅថ្ងៃទី២៤ ខែកញ្ញា ឆ្នាំ២០២៣។ ៣-កញ្ញា សុខ នី នៅខេត្តក្រចេះ នៅថ្ងៃទី៣១ ខែតុលា ឆ្នាំ២០២៣។ ៤-លោក ប៉ាន់ វណ្ណៈ នៅខេត្តកំពត នៅថ្ងៃទី២ ខែមករា ឆ្នាំ២០២៤។ ៥-លោក គឹន បុត្តា នៅខេត្តកំពង់ចាម នៅថ្ងៃទី៤ ខែមករា ឆ្នាំ២០២៤។ ៦-លោក ស៊ីវ សុផល នៅរាជធានីភ្នំពេញ នៅថ្ងៃទី២១ ខែមករា ឆ្នាំ២០២៤។ ៧-លោក ញ៉ិប សុភិន នៅរាជធានីភ្នំពេញ នៅថ្ងៃទី២៧ ខែធ្នូ ឆ្នាំ២០២៣ ។ ៨-លោក វ៉ាត វុធ នៅរាជធានីភ្នំពេញ នៅថ្ងៃទី២ ខែមករា ឆ្នាំ២០២៤។ ៩-អ្នកស្រី អេន ចរិយា ហៅ អ្នកគ្រូលី ជាម្ចាស់គណនីហ្វេសបុកឈ្មោះ «EN Chariya» និង «កំពូលម៉ូត» ដែលតាំងខ្លួនជាព្រះនាងឥន្ទ្រទេវីស្នងរូប ត្រូវបានប៉ូលិស នៅនាយកដ្ឋាន ប្រឆាំងបទល្មើសបច្ចេកវិទ្យា កោះហៅឱ្យចូលបំភ្លឺ ហើយធ្វើកិច្ចសន្យា កាលពីថ្ងៃទី៣០ ខែមករា ឆ្នាំ២០២៣ ។ ១០-លោក ស សង្ហា ដែលជាគ្រូបារមី កើតនៅឆ្នាំ១៩៨៩ មាន ទីលំនៅក្នុងសង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ។
មកដល់ពេលនេះ នៅតែមានបងប្អូនខ្មែរយើងមួយចំនួន មានជំនឿបែបភ្ញាក់ផ្អើល ជំនឿតាមគ្នា និងរឿងដែលមិនគួរជឿ ។ ហេតុនេះហើយទើបគ្រូបារមី គ្រូអូមអាមទាំងនោះងាយនឹងបោកប្រាសបានដោយស្រួល ។ គ្រូទាយ គ្រូបារមី គ្រូមន្តអាគមអូមអាម មិនមែនពូកែទេ តែមកពីអ្នកជឿទាំងនោះមិនបានពិចារណា ហើយងាយនឹងឱ្យគេបោក ។
ប៉ុន្តែទោះបីជាគេខំបង្ហាញការពិតខ្លះថា គ្រូបារមី គ្រូមន្តអាគម គ្រូទាយ… សុទ្ធ តែបោកប្រាស់ដោយមានទាំងភស្តុតាងមកបង្ហាញយ៉ាងណាក៏ដោយ ក៏ខ្មែរយើងមួយចំនួននៅតែបន្តជឿទាំងងងឹតងងុល ហើយមិនព្រមស្តាប់គេស្តាប់ឯង និងមិនខ្ចីគិតពិចារណាអ្វីទាល់តែសោះ ។
គ្រូទាយ គ្រូបារមី គ្រូមន្តអាគម រួមទាំងគ្រូហុងស៊ុយ ជាដើមនោះ បើខ្លាំងពូកែ ហើយស័ក្តិសិទ្ធិមែន ហេតុអ្វីក៏មិនជួយក្រុមគ្រួសាររបស់ពួកគាត់ ពិសេសរូបគ្រូនោះផ្ទាល់ឱ្យមានបានឱ្យចេះដឹងឱ្យឡើងធ្វើធំ ហើយពិសេសឱ្យជាពីជំងឺទាំងអស់ទៅ?
ប៉ុន្តែតាមពិត រឿងអស់ទាំងនេះ សុទ្ធតែជាការបោកប្រាស់តាមសីលវិធីរបស់គ្រូម្នាក់ៗ ដែលមានជំងឺបោកប្រាស់ ហើយរឹតតែសង្វេគទៅទៀត គឺអ្នកជឿតាមគ្រូអស់ទាំងនោះ ព្រមឱ្យគេបោកយកលុយយកកាក់ទៅថ្វាយដល់ផ្ទះរបស់គ្រូ ដោយមិនខ្ចីគិតអ្វី ។ ធូបដុតទាំងព្រឹក ដុតទាំងល្ងាច ឡើងផ្សែងចូលសួត បំផ្លាញសុខភាព មិនត្រឹមតែខ្លួនឯងទេ គឺប៉ះពាល់សុខភាពអ្នករស់នៅជាមួយទាំងកូនទាំងចៅ ហើយបានបង្កើតជំនឿ ដែលលែងយកខ្លួនឯងជាទីពឹងតទៅទៀត ។
អ្នកជឿស៊ុបម្នាក់ៗនាំគ្នាពឹងផ្អែកតែលើជំនឿបែរបន់ ហើយមិនប្រឹងរៀនសូត្រឱ្យបានចេះជ្រៅជ្រះ ឬមានជំនាញពិតប្រាកដ ដើម្បីចិញ្ចឹមជីវិតទេ ។ រស់មួយថ្ងៃៗ ពឹងតែលើអុជធូប បន់ស្រន់ព្រះអង្គផង អារុកអារ័ក្សផង និងបន់ទេវតាផង ហើយសុំសេចក្តី សុខពីព្រះពុទ្ធបដិមាផង ។
សូមភ្ញាក់ខ្លួនឡើង! ឈប់ពឹងលើគ្រូបារមី គ្រូសីល គ្រូមន្តអាគម អូមអាមតទៅទៀត ហើយពឹងលើខ្លួនឯង ប្រឹងប្រែងដោយប្រើសមត្ថភាព ចំណេះ និងជំនាញ ហើយស្វែងរកសេចក្តីសុខពីខ្លួនឯង ៕
ចែករំលែកព័តមាននេះ