ខេត្តបាត់ដំបង ៖ រថយន្តដឹកដីមួយគ្រឿងត្រូវបានរថភ្លើងបុកពេញទំហឹងរហូតផ្ងារជើងបណ្ដាលឱ្យអ្នកបើកបររងរបួសធ្ងន់ពេលព្យាយាមបើកឆ្លងកាត់ផ្លូវរថភ្លើងមួយកន្លែង កាលពីវេលាម៉ោង៣ និង៣០នាទីរសៀលថ្ងៃទី០១ កុម្ភៈ ស្ថិតនៅចំណុចភូមិរាំងក្រោល ឃុំរាំងកែសី ស្រុកសង្កែ ។…
ខេត្តបាត់ដំបង ៖ រថយន្តដឹកដីមួយគ្រឿងត្រូវបានរថភ្លើងបុកពេញទំហឹងរហូតផ្ងារជើងបណ្ដាលឱ្យអ្នកបើកបររងរបួសធ្ងន់ពេលព្យាយាមបើកឆ្លងកាត់ផ្លូវរថភ្លើងមួយកន្លែង កាលពីវេលាម៉ោង៣ និង៣០នាទីរសៀលថ្ងៃទី០១ កុម្ភៈ ស្ថិតនៅចំណុចភូមិរាំងក្រោល ឃុំរាំងកែសី ស្រុកសង្កែ ។
លោក យុត តុងហូ អធិការស្រុកសង្កែបានឱ្យដឹងថា រថយន្តដឹកដីបានធ្វើដំណើរមកពីទិសខាងលិចឆ្ពោះទៅកើត ហើយពេលមកដល់ចំណុចកើតហេតុ បានព្យាយាមបើកឆ្លងផ្លូវរថភ្លើង ដោយខ្វះការប្រុងប្រយ័ត្នមិនមើលឆ្វេង-ស្ដាំ ហើយស្របពេលរថភ្លើងធ្វើដំណើរពីទិសខាងជើងឆ្ពោះទៅខាងត្បូង លុះមកដល់ចំណុចប្រសព្វរវាងរថភ្លើងនិងរថយន្តនេះដែរ ក៏ត្រូវរថភ្លើងបុកពេញទំហឹងបណ្ដាលឱ្យរថយន្តក្រឡាប់ផ្ងារជើង ។លោកអធិការបានបញ្ជាក់ថា អ្នកបើកបររថយន្តរងរបួសធ្ងន់ ហើយត្រូវបានដឹកទៅកាន់មន្ទីរពេទ្យភ្លាមៗ ។
អ្នកបើកបររថយន្តឈ្មោះ ដុង ឧត្តម ភេទប្រុស អាយុ៣១ឆ្នាំ នៅភូមិ-ឃុំកើតហេតុខាងលើ ។បើតាមពិនិត្យកន្លែងកើតហេតុ គេឃើញរថយន្តក្រឡាប់ផ្ងារជើង រីឯរថភ្លើងកំពិតផ្នែកខាងមុខ ។ប្រភពពីប្រជាពលរដ្ឋបាននិយាយថា មុនពេលមកដល់ផ្លូវឆ្លងកាត់ គេឮសំឡេងស៊ីភ្លេរថភ្លើងក្នុងល្បឿនយឺតៗ តែពុំឃើញមានអ្នកធ្វើចរាចរណ៍នៅចំណុចផ្លូវឆ្លងកាត់ទេ ។ ស្របពេលនោះ គេឃើញរថយន្តបានបើកហាក់ធ្វើព្រងើយ បើទោះជារថភ្លើងជិតមកដល់ក្ដី ដែលទំនងអ្នកបើករថយន្តមិនបានឮស៊ីភ្លេរថភ្លើងទេ ព្រោះរថយន្តបិទកញ្ចក់ជិត ហើយបានព្យាយាមបើកឆ្លងផ្លូវរថភ្លើង ក៏ត្រូវរថផ្លើងបុកពីចំហៀងពេញទំហឹងតែម្ដង ។
លោក យុត តុងហូ អធិការស្រុកសង្កែបានប្រាប់ថា បើពិនិត្យលើស្ថានភាពជាក់ស្ដែង ភាគីរថយន្តអាចមានកំហុសច្រើនជាងភាគីរថភ្លើង ។ នេះជាការធ្វេសប្រហែស ដែលបើករថយន្តឆ្លងកាត់ផ្លូវរថភ្លើងមិនព្រមពិនិត្យឆ្វេងស្ដាំ ទើបជួបគ្រោះថ្នាក់បែបនេះ តែយ៉ាងណា លោកបាននាំយករថយន្តមករក្សាទុកបណ្ដោះអាសន្ន ដើម្បីរង់ចាំភាគីទាំង០២ចូលដោះស្រាយតាមផ្លូវច្បាប់ ៕
ចែករំលែកព័តមាននេះ