ខេត្តបាត់ដំបង ៖ ឧបករណ៍នេសាទល្មើសច្បាប់ (សាច់ស្បៃមុង) ចំនួន០៣កន្លែង នៅក្នុងទឹកដី ឃុំកោះជីវាំង ស្រុកឯកភ្នំ ត្រូវបានកម្លាំងចម្រុះ ដែលដឹកនាំដោយមន្ត្រីជលផល…
ខេត្តបាត់ដំបង ៖ ឧបករណ៍នេសាទល្មើសច្បាប់ (សាច់ស្បៃមុង) ចំនួន០៣កន្លែង នៅក្នុងទឹកដី ឃុំកោះជីវាំង ស្រុកឯកភ្នំ ត្រូវបានកម្លាំងចម្រុះ ដែលដឹកនាំដោយមន្ត្រីជលផល ចុះកាប់កម្ទេចចោល កាលពីថ្ងៃទី៣០ មករា តែគេមិនទាន់ស្គាល់អត្តសញ្ញាណជនប្រព្រឹត្ត ឬម្ចាស់បទល្មើសនេះណាម្នាក់ទេ។
យោងតាមសេចក្ដីរាយការណ៍បានឱ្យដឹងថា កិច្ចប្រតិបត្តិការនេះ ធ្វើឡើងដោយកម្លាំងចម្រុះ របស់ស្រុកឯកភ្នំ ដែលដឹកនាំដោយមន្ត្រីខណ្ឌរដ្ឋបាលជលផល ។ កម្លាំងចម្រុះនេះបានចុះទៅដល់ចំណុច«កោះដាច់» ស្ថិតក្នុងភូមិសាស្ត្រ ឃុំកោះជីវាំង ស្រុកឯកភ្នំ ហើយបានកាប់បំផ្លាញឧបករណ៍នេសាទខុសច្បាប់ចំនួន០៣កន្លែង ដែលក្រុមជនល្មើស បានដាក់ពង្រាយនៅតំបន់នោះ។
បើតាមរបាយការណ៍ កម្លាំងចម្រុះបានកាប់បំផ្លាញចោលនូវបទល្មើសនេសាទដូចជា ១-សាច់ស្បៃមុងប្រវែង១២០០ម៉ែត្រ ២-កាប់បំផ្លាញបង្គោលឈើចំនួន៥០០ដើម ៣-កាប់បំផ្លាញឡុកចាប់ត្រីចំនួន០៦កន្លែង និងព្រលែងកូនត្រីមួយចំនួនចូលក្នុងទឹកវិញ ។ រីឯជនល្មើសមិនត្រូវបានឃាត់ខ្លួន សូម្បីអត្តសញ្ញាណជនល្មើសម្នាក់ក៏គេមិនស្គាល់ដែរ ។
បទល្មើសនេសាទ ហាក់កំពុងកើនឡើងខ្លាំង នៅក្នុងតំបន់ទន្លេសាប ស្ថិតក្នុងទឹកដី ឃុំកោះជីវាំង ស្រុកឯកភ្នំ។ នេះបើតាមការកត់សម្គាល់ តាមរយៈការបង្ក្រាបរបស់កម្លាំងសម្រុះ នៃរដ្ឋបាលស្រុកមួយនេះ បើធៀបទៅនឹងតាមបណ្ដាស្រុកនានា ដែលមានភូមិសាស្ត្រជាប់តំបន់ទន្លេសាបដូចគ្នា ដែលមានស្រុកឯកភ្នំ ស្រុកមោងឫស្សី ស្រុកសង្កែ និង ស្រុកថ្មគោល។ មួយរយៈចុងក្រោយនេះ គេឃើញកម្លាំងចម្រុះ ស្រុកឯកភ្នំ ដែលដឹកនាំដោយមន្ត្រីជលផល បានចុះបង្ក្រាប កាប់បំផ្លាញ ឬ ដុតកម្ទេចបទល្មើសនេសាទនេះចោលជាបន្តបន្ទាប់។
ប៉ុន្តែជាអកុសល្យសមត្ថកិច្ចហាក់មិនធ្លាប់ចាប់បានជនល្មើសបានម្នាក់បញ្ជូនទៅប្រគល់ជូនតុលាការម្ដងណាទេ សូម្បីតែអត្តសញ្ញាណជនល្មើសក៏គេមិនមានលទ្ធភាពស្រាវជ្រាវរកឃើញដែរ។ ប៉ុន្តែយ៉ាងណា កម្លាំងសមត្ថកិច្ចចម្រុះនេះ នៅតែបន្តបេសកកម្មរបស់ខ្លួនប្រចាំនៅតំបន់ទន្លេសាទ ដើម្បីបន្តចេញល្បាតស្វែងរកបទល្មើសនៅឡើយ៕
ចែករំលែកព័តមាននេះ