រាជធានីភ្នំពេញ ៖ លោកវ៉ា ដាណេ អ្នកយកព័ត៌មានកោះសន្តិភាពដែលជួបឧបទ្ទវហេតុដាច់សរសៃឈាមខួរក្បាលធ្លាក់ខ្លួនឈឺមួយរយៈពេលខ្លីនោះ បានទទួលមរណភាពហើយកាលពីវេលាម៉ោង៧និង១៥នាទីយប់ ថ្ងៃទី២៧ ឧសភា នៅលំនៅឋានផ្ទះលេខ៣៣២ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ ក្នុងជន្មាយុ៣៩ឆ្នាំ ។
ការលាចាកលោករបស់លោកវ៉ា ដាណេ បានធ្វើឱ្យលោកឧកញ៉ា ថុង អ៊ុយប៉ាង និងលោកជំទាវឧកញ៉ា យិន ផាន្នី អគ្គនាយក និងសហការីទាំងអស់ចាត់ទុកថា ជាការបាត់បង់ធនធានមនុស្សមួយរូបរបស់កោះសន្តិភាព និងជាការបាត់បង់មួយគួរឱ្យសោកស្តាយបំផុត ។ លោកវ៉ា ដាណេ គឺជាអ្នករាយការណ៍ព័ត៌មានមួយរូប មានសីលធម៌ល្អប្រកបដោយវិជ្ជាជីវៈ និងជាបុគ្គលម្នាក់ដែលយកចិត្តទុកដាក់ក្នុងការងាររបស់ខ្លួន ។ លោកទទួលនូវការស្រឡាញ់រាប់អានពីមិត្តភក្តិគ្រប់គ្នាទាំងនៅក្នុងអង្គភាព និងមជ្ឈដ្ឋានខាងក្រៅតាមរយៈចរិតសុភាពរាបសា និងថ្លៃថ្នូររបស់លោក ។
ជាអកុសល លោកវ៉ា ដាណេ បានធ្លាក់ខ្លួនឈឺដោយជំងឺលើសឈាមវិលមុខដួលកាលពីវេលាម៉ោង៩ព្រឹក ថ្ងៃទី២១ ឧសភា ហើយត្រូវបានបញ្ជូនទៅកាន់មន្ទីរពហុព្យាបាលវិសាលសុខ និងបញ្ជូនបន្តទៅកាន់មន្ទីរពេទ្យកាល់ម៉ែត ។ ដោយសារស្ថានភាពធ្ងន់ធ្ងរនៅរសៀលថ្ងៃដដែល ក៏បញ្ជូនបន្តទៅកាន់មន្ទីរពេទ្យចឺរ៉ៃ ប្រទេសវៀតណាមទៀត ប៉ុន្តែស្ថានភាពមិនបានធូរស្រាលឡើយ ហើយនៅវេលាម៉ោង១០យប់ ថ្ងៃទី២៦ ឧសភា ក្រុមគ្រួសារក៏បញ្ជូនមកកាន់លំនៅឋានវិញ ដែលនៅសល់តែជីវិតចុងក្រោយបន្តិចបន្តួចប៉ុណ្ណោះ។ ដោយសារមានការយកចិត្តទុកដាក់ពីលោកឧកញ៉ា ថុង អ៊ុយប៉ាង និងលោកជំទាវឧកញ៉ា យិន ផាន្នី កាលពីព្រឹកថ្ងៃទី២៧ ឧសភា លោកឧកញ៉ា និងលោកជំទាវឧកញ៉ា ក៏បានចុះទៅសាកសួរសុខទុក្ខដល់លំនៅឋាន និងនាំថវិកាទៅជួយឧបត្ថម្ភដល់ក្រុមគ្រួសារនៅក្នុងដង្ហើមចុងក្រោយ និងបានបញ្ជាក់ពីក្តីស្រឡាញ់រាប់អានរវាងថ្នាក់ដឹកនាំកោះសន្តិភាពចំពោះកូនចៅ។
ទោះបីមានការអាណិតស្រឡាញ់ពីថ្នាក់ដឹកនាំកោះសន្តិភាព ព្រមទាំងសហការីទាំងអស់ និងក្រុមគ្រួសារ មិត្តភក្តិ មិនចង់ឱ្យលោកឃ្លាតឆ្ងាយយ៉ាងណាក៏ដោយ ប៉ុន្តែស្ថានភាពជំងឺ មិនអាចសង្គ្រោះបាន ហើយមច្ចុរាជបានឆក់យកជីវិតលោកទាំងវ័យក្មេង កាលពីវេលាម៉ោង៧និង១៥នាទីយប់ ថ្ងៃទី២៧ ឧសភា ក្នុងជន្មាយុ៣៩ឆ្នាំ ដោយបន្សល់ទុកកូនប្រុសស្រី៣នាក់ ។ សពរបស់លោកត្រូវបានដង្ហែទៅបញ្ចុះនៅស្រុកកណ្តាលស្ទឹង ខេត្តកណ្តាល នារសៀលថ្ងៃទី២៩ ឧសភា ដោយក្តីវិយោគក្រៃលែង។ ក្រោយពេលទទួលដំណឹងភ្លាម លោកឧត្តមសេនីយ៍ តែម ម៉ឺន ប្រធានសហព័ន្ធកីឡាប្រដាល់កម្ពុជា និងគណៈកម្មការបានចូលរួមបុណ្យសពចំនួន១០០ដុល្លារ។ ប្រធាន និងអនុប្រធានអនុគណៈកម្មការទ្រទ្រង់សហព័ន្ធកីឡាប្រដាល់ លោកស្រី សែត សាម៉េត ចំនួន៤ម៉ឺនរៀល លោកហូ គឹមសៀន ចំនួន៤ម៉ឺនរៀល លោកតាំង ណាំស្រ៊ុន ចំនួន៤ម៉ឺនរៀល និងក្រុមហ៊ុនស្រាផែនដី២០ដុល្លារ ។ សូមបញ្ជាក់ថា នៅមានជំនួយឧបត្ថម្ភមួយចំនួនទៀតដែលកោះសន្តិភាព នឹងប្រគល់ជូនភរិយារបស់លោកវ៉ា ដាណេ បន្ទាប់ពីពិធីបញ្ចុះសពរួចរាល់ ៕
ចែករំលែកព័តមាននេះ