ខេត្តឧត្តរមានជ័យ ៖ លោកអ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់កាលពីថ្ងៃទី២៦ ឧសភា កន្លងទៅនេះ បានដឹកនាំគណៈប្រតិភូមួយក្រុមចុះសាកសួរសុខទុក្ខកងទ័ពនៅតំបន់ប្រាសាទតាមាន់ធំទិសទី៣ ព្រមទាំងនាំយកអំណោយមួយចំនួនទៅឧបត្ថម្ភដល់កងទ័ពផង ។ អំណោយដែលផ្តល់ជូននាឱកាស
ខេត្តឧត្តរមានជ័យ ៖ លោកអ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់កាលពីថ្ងៃទី២៦ ឧសភា កន្លងទៅនេះ បានដឹកនាំគណៈប្រតិភូមួយក្រុមចុះសាកសួរសុខទុក្ខកងទ័ពនៅតំបន់ប្រាសាទតាមាន់ធំទិសទី៣ ព្រមទាំងនាំយកអំណោយមួយចំនួនទៅឧបត្ថម្ភដល់កងទ័ពផង ។ អំណោយដែលផ្តល់ជូននាឱកាសនោះមានដែកចម្រុះចាប់ពី៦លី រហូតដល់១២លី និងលួសសំណង់ចំនួន២៥តោន ស៊ីម៉ង់ត៍ចំនួន៥០តោន ម៉ាស៊ីន GPS ចំនួន១០គ្រឿង មីយើងចំនួន២៥០ កេស ត្រីខកំប៉ុងចំនួន៧០កេសធំ ទឹកត្រីចំនួន១០០យួរ ទឹកស៊ីអ៊ីវចំនួន១០០យួរ ទឹកបរិសុទ្ធ ចំនួន៥០០យួរ និងថវិកាចំនួន២លានរៀល ។
លោកឧត្តមសេនីយ៍ឯកឈិន ចាន់ពណ៌ គណៈបញ្ជាការឯកភាពសមរភូមិជួរមុខទិសទី៣ បានមានប្រសាសន៍ពីសភាពការណ៍ក្នុងតំបន់ប្រាសាទតាមាន់ធំ ប្រាសាទតាក្របី គឺកងកម្លាំងប្រដាប់អាវុធយើងបានខិតខំយកចិត្តទុកដាក់ជីកលេណដ្ឋាននៅតាមខ្សែត្រៀមជួរមុខ គោរពវិន័យកងទ័ពធ្វើការទប់ទល់នឹងសត្រូវឈ្លានពានបូរណភាពទឹកដីជូនប្រជាពលរដ្ឋ និងជូនរាជរដ្ឋាភិបាលដែលមានទំនុកចិត្តលើកងកម្លាំងប្រដាប់អាវុធជាសសរទ្រូងរបស់ប្រទេសជាតិ ។
លោកឧត្តមសេនីយ៍ឯកបានបញ្ជាក់ថា ជាក់ស្តែងចាប់ពីថ្ងៃទី២២ មេសា រហូតដល់ថ្ងៃទី៤ ឧសភា ឆ្នាំ២០១១ កន្លងទៅ ក្រុមទាហាន សៀមរាប់ពាន់នាក់ បានប្រើប្រាស់អាវុធគ្រប់ធុនបាញ់ស្រោចមកលើទីតាំងកងទ័ពកម្ពុជាឈរជើង និងបាញ់ស្រោចដាក់ភូមិប្រជាពលរដ្ឋកម្ពុជារាប់ម៉ឺនគ្រាប់ ប៉ុន្តែកងទ័ពកម្ពុជានៅតែធ្វើការទប់ទល់នឹងខ្មាំងសត្រូវសៀម ការពារបាននូវគោលដៅឈរជើងមិនឱ្យបាត់បង់ទឹកដី សូម្បីតែមួយមីល្លីម៉ែត្រឡើយ ។
លោកអ៊ឹម ឈុនលឹម ទេសរដ្ឋមន្ត្រី រដ្ឋមន្ត្រី ក្រសួងរៀបចំដែនដីនគរូបនីយកម្ម និងសំណង់ បានសាកសួរសុខទុក្ខ និងផ្តាំផ្ញើដល់មេបញ្ជាការមេបញ្ជាការរងកងកម្លាំងប្រដាប់អាវុធដែលកំពុងឈរជើងការពារបូរណភាពទឹកដីគ្រប់អង្គភាពទាំងអស់សូមគោរពវិន័យ គោរពបទបញ្ជារបស់ថ្នាក់ដឹកនាំ កងកម្លាំងប្រដាប់អាវុធ ត្រូវតែមានភាពអង់អាចក្លាហាន និងស្មារតីប្រុងប្រយ័ត្ន ខ្ពស់ទើបឈានទៅរកជ័យជម្នះលើខ្មាំងសត្រូវបាន ។ ប្រជាពលរដ្ឋកម្ពុជាទាំងនៅ ក្នុងប្រទេសនិងក្រៅប្រទេស តែងតែមានក្តីសង្ឃឹម ជាពិសេសរាជរដ្ឋាភិបាលដែលបានយកចិត្តទុកដាក់ ឱ្យមានការចងសម្ព័ន្ធមេត្រីភាពរវាងសមរភូមិក្រោយ និងសមរភូមិមុខកាន់តែរ៉ឹងមាំថែមទៀត ៕
ចែករំលែកព័តមាននេះ