ប្រជាពលរដ្ឋប្រមាណជាង១ពាន់នាក់ប្រមូលផ្តុំគ្នាផ្ទុះការតវ៉ានៅបរិវេណផ្សាររុនតាឯក ស្ថិតក្នុងតំបន់អភិវឌ្ឍន៍ធម្មជាតិ ក្រុងរុនតាឯក ខេត្តសៀមរាប ពាក់ព័ន្ធក្នុងករណីបាត់បង់សាច់ប្រាក់ក្នុងប័ណ្ណសមធម៌ (ប័ណ្ណក្រីក្រ) អស់មួយចំនួនធំ ដោយនៅសល់តែមួយគ្រួសារចំនួន
ខេត្តសៀមរាប ៖ នាថ្ងៃថ្ងៃទី២៧ ខែមករា ឆ្នាំ២០២៤នេះ ប្រជាពលរដ្ឋប្រមាណជាង១ពាន់នាក់ប្រមូលផ្តុំគ្នាផ្ទុះការតវ៉ានៅបរិវេណផ្សាររុនតាឯក ស្ថិតក្នុងតំបន់អភិវឌ្ឍន៍ធម្មជាតិ ក្រុងរុនតាឯក ខេត្តសៀមរាប ពាក់ព័ន្ធក្នុងករណីបាត់បង់សាច់ប្រាក់ក្នុងប័ណ្ណសមធម៌ (ប័ណ្ណក្រីក្រ) អស់មួយចំនួនធំ ដោយនៅសល់តែមួយគ្រួសារចំនួន១២០០០០រៀលតែប៉ុណ្ណោះ។
មិនត្រឹមតែប៉ុណ្ណោះ បងប្អូនប្រជាពលរដ្ឋ ក៏បានសំណូមពរស្នើសុំឱ្យរាជរដ្ឋាភិបាល ដែរថា
ទី១- សុំរក្សាលុយក្នុងប័ណ្ណសមធម៌ឱ្យនៅចំនួនដដែល
ទី២- ស្នើសុំអំណោយ និងប្លង់រឹង ដែលរដ្ឋាភិបាលចែកជូនកន្លងមកថ្មីៗនេះ ដោយសារគ្រួសារខ្លះមិនទាន់បាននៅឡើយ។
ខណៈពេលនោះ ក៏មានការអញ្ជើញចូលរួមពីសំណាក់តំណាងឱ្យក្រសួងសង្គមកិច្ច តំណាងអាជ្ញាធរ ក្រុង ខេត្ត ស្រុក ដើម្បីសម្របសម្រួល ប៉ុន្តែជាលទ្ធផលគ្មានបានអ្វីទាំងអស់។ ក្នុងនោះផងដែរ តំណាងឱ្យក្រសួងសង្គមកិច្ច ក៏បានសន្យាថា «នឹងនាំពាក្យនេះជូនទៅរាជរដ្ឋាភិបាល ហើយថ្ងៃច័ន្ទនេះ នឹងជូនដំណឹងដល់បងប្អូនវិញ»។
សូមបញ្ជាក់ផងដែរថា កាលពីថ្ងៃទី២៦ ខែមករា ឆ្នាំ២០២៤ ប្រជាពលរដ្ឋផ្ទះការតវ៉ាម្ដងហើយ ស្ថិតនៅចំណុចផ្សាររុនតាឯក ក្នុងភូមិធម្មជាតិរុនតាឯក សង្កាត់រុនតាឯក ក្រុងរុនតាឯកតេជោសែន ខេត្តសៀមរាប ដោយមានពលរដ្ឋប្រមាណជាង១ពាន់នាក់ ដែលបានស្ម័គ្រចិត្តចាកចេញពីលំនៅដ្ឋានធ្លាប់តាំងនៅក្នុងរមណីយដ្ឋានអង្គរ ប្ដូរទៅរស់នៅក្នុងក្រុងថ្មី ដែលមានឈ្មោះថា «ក្រុងរុនតាឯក តេជោសែន»។
ហើយក៏បានលើកគ្នាតវ៉ារឿងប័ណ្ណសមធម៌ (ប័ណ្ណក្រីក្រ)នេះ បន្ទាប់ពីទទួលបានអនុក្រឹត្យថ្មី លេខ៣៧១ អនក្រ.កប ដែលចុះហត្ថលេខាដោយសម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលថ្ងៃទី២៩ ខែធ្នូ ឆ្នាំ២០២៣ ពាក់ព័ន្ធការកែសម្រួលអនុក្រឹត្យលេខ៨៨ អនក្រ.បក ចុះថ្ងៃទី១២ ខែមិថុនា ឆ្នាំ២០២០ ស្តីពីការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ពីការផ្សព្វផ្សាយរបស់លោកមេឃុំ។
ប្រជាពលរដ្ឋដែលបានមកប្រមូលផ្ដុំគ្នាតវ៉ាទាំងខាងលើនេះ បានលើកឡើងប្រហាក់ប្រហែលគ្នាថា «កាលពីសម្ដេចតេជោ ហ៊ុន សែន នៅជានាយករដ្ឋមន្ត្រីនៃព្រះរាជាណាចក្រកម្ពុជា សម្ដេចបានសន្យាផ្ដល់ប័ណ្ណក្រីក្រ ប័ណ្ណសមធម៌ ជូនដល់បងប្អូនប្រជាពលរដ្ឋដែលស្ម័គ្រចិត្តតាមការស្នើសុំរបស់រាជរដ្ឋាភិបាល ស្មោះស្ម័គ្រចាកចេញពីតំបន់រមណីយដ្ឋានអង្គរ មកតាំងទីលំនៅថ្មី ស្ថិតក្នុងទឹកដីឃុំរុនតាឯក នៅប័ណ្ណសមធម៌ (ប័ណ្ណក្រីក្រ) រយៈពេល១០ឆ្នាំ»។
ប្រជាពលរដ្ឋបានបន្តថា «ដល់ឥឡូវនេះ កាត់ខ្ទេចកាត់ខ្ទី ដោយពលរដ្ឋភាគច្រើនពុំបានដឹង ឬយល់ព័ត៌មានណាមួយដ៏ជាក់លាក់ឡើយ និងទូលំទូលាយក្នុងការផ្សព្វផ្សាយពិស្តារជាមុន។ ហើយអ្នកក្រខ្សត់ គ្នារំពឹងទៅលើលុយនេះ ដែលជាផ្នែកមួយជួយសម្រួលជីវភាពខ្លះៗ លុះដល់ឥឡូវនេះ តើឱ្យគ្នាសង្ឃឹមស្អីទៀត? ធ្វើឱ្យពួកគាត់បាក់ទឹកចិត្តអស់ហើយ»។
ចំណែកឯប្រជាពលរដ្ឋខ្លះទៀត មកពីឃុំពាក់ស្មែង ស្រុកអង្គរធំ ក៏បានលើកឡើងដែរថា «សម្រាប់ខ្ញុំយល់ហើយ នៅឡើយតែពលរដ្ឋដែលខ្វះការយល់ដឹង ហើយពួកគាត់នៅមានកម្រិត ទាប ទើបធ្វើឱ្យមានការទាមទារឱ្យមន្ត្រីជំនាញពន្យល់គាត់បន្ថែម។ បើចេញតែសេចក្តីប្រកាសឱ្យពួកគាត់អាន ម៉េចនឹងយល់បាន។ មានន័យថា ពលរដ្ឋដែលមិនមានចែងក្នុងលេខរៀងចាប់ពីលេខ២ រហូតដល់លេខ៥ បានតែតម្លៃក្បាលប័ណ្ណ១២ម៉ឺនរៀលហ្នឹងឯង…» ។
ប្រជាពលរដ្ឋដែលលើកគ្នាមកតវ៉ានោះ បានបញ្ជាក់ថា «មូលហេតុមកពីមានការប្រែប្រួលប្រាក់ឧបត្ថម្ភ ក្នុងអំឡុង៣ខែចុងក្រោយនេះ គឺចាប់ពីខែមករា ដល់ខែមីនា ឆ្នាំ២០២៤ ក្រោយពីមានការផ្សព្វផ្សាយគោលការណ៍រាជរដ្ឋាភិបាល។ ហើយការចែកខិត្តប័ណ្ណរបស់មេឃុំ-ចៅសង្កាត់ មេភូមិ ដល់ប្រជាពលរដ្ឋតាមផ្ទះរួចមក ប្រជាពលរដ្ឋយល់ឃើញថា ប្រាក់ដែលគាត់ទទួលបាន គឺជាការដោះដូរលំនៅដ្ឋានពីតំបន់អង្គរ ទៅរុនតាឯក ហើយអត្ថប្រយោជន៍ដែលគាត់ត្រូវទទួលបានការឧបត្ថម្ភពីរាជរដ្ឋាភិបាលរយៈពេល១០ឆ្នាំ ដោយមិនមែនគិតថា ទទួលពីកម្មវិធីកូវីដ-១៩ និងសុពលភាពប័ណ្ណសមធម៌នោះទេ»។
ក្រុមប្រជាពលរដ្ឋ ក៏បានសំណូមពរ និងស្នើសុំឱ្យរដ្ឋាភិបាលនៅតែបន្តឧបត្ថម្ភជាបន្តទៀតទៅតាមប្រាក់ដែលគាត់ទទួលបានដូចប្រចាំខែកន្លងមកនៅដដែល ពីព្រោះពួកគាត់មានការលំបាកក្នុងការប្រកបអាជីវកម្មនានា នៅក្នុងទីក្រុងថ្មីមួយនេះ ជាពិសេសពួកគាត់នៅជាប់បំណុលធនាគារ ដែលសង្ឃឹមថា ប្រាក់ឧបត្ថម្ភរបស់រាជរដ្ឋាភិបាល នឹងជួយពួកគាត់បាន។
ពាក់ព័ន្ធទៅនឹងករណីខាងលើនេះដែរ នាថ្ងៃទី២៦ ខែមករា លោក ប្រាក់ សោភ័ណ អភិបាល នៃគណៈអភិបាលខេត្តសៀមរាប បានចាត់ឱ្យតំណាងលោក សុខ ថុល អភិបាលរងខេត្តសៀមរាប និងក្រុមការងារចុះ ដើម្បីដោះស្រាយ និងជួបផ្ទាល់ជាមួយប្រជាពលរដ្ឋ ហើយជាលទ្ធផលផ្លែផ្កានោះ លោកសុខ ថុល បានមានប្រសាសន៍ថា «ប្រជាជនសុំរំសាយសិនទៅ»។
បន្ទាប់មក លោក សុខ ថុល ក៏បានជម្រាបជូនបងប្អូនប្រជាពលរដ្ឋដែលលើកគ្នាមកធ្វើការតវ៉ាទាំងនោះថា «សូមបងប្អូន អ្នករុនតាឯក ចាំថ្ងៃស្អែកវេលាម៉ោង៨ព្រឹក ត្រូវនឹងព្រឹកថ្ងៃទី២៧ ខែមករា ឆ្នាំ២០២៤ ជួបគ្នានៅផ្សាររុនតាឯក ដោយមានក្រសួងពាក់ព័ន្ធនឹងចូលរួមផងដែរ បើបងប្អូនមានបញ្ហាអ្វីអាចសួរផ្ទាល់បាន»៕
ចែករំលែកព័តមាននេះ