លោកមេឃុំព្រះពន្លា សុំបដិសេធន៍រឿងជីករណ្តៅដីរំលាយទួលបុរាណ
- ស្វាយរៀង
ខេត្តស្វាយរៀង ៖ នៅថ្ងៃទី៣០ មេសា ២០២៤ លោកគឹម រិទ្ធី មេឃុំព្រះពន្លា ស្រុកកំពង់រោទ៍សូមធ្វើការបំភ្លឺជូន ក្រោយសារព័ត៌មានកោះសន្តិភាពបានចុះផ្សាយ…
ខេត្តស្វាយរៀង ៖ នៅថ្ងៃទី៣០ មេសា ២០២៤ លោកគឹម រិទ្ធី មេឃុំព្រះពន្លា ស្រុកកំពង់រោទ៍
សូមធ្វើការបំភ្លឺជូន ក្រោយសារព័ត៌មានកោះសន្តិភាពបានចុះផ្សាយ កាលពីថ្ងៃទី២៩ មេសា ២០២៤ ដែលមានចំណងជើងថា «ជីករណ្តៅដីរំ.លា.យទួលបូរាណដល់ក្បាលប្រែតហើយ អាជ្ញាធរឆ្លើយថា «អត់ដឹង» ។
លោកសូមបដិសេធន៍ និងសុំបំភ្លឺជូនថា ទាក់ទងការជីករណ្តៅដីរបស់ក្រុមហ៊ុនតៃសេង៥ ដែលបានមកជីកដីនៅក្នុងទឹកដីភូមិត្រោក ឃុំព្រះពន្លា( ជិតអូរដូនអាម) គឺមិនមែនជាទួលបុរាណទេ គឺជាដីស្រែ( ឈ្មោះស្រែភូមិធំ) ជាដីភូមិចាស់ដែលគេឈប់រស់នៅតាំងពីសង្គមចាស់មកម្ល៉េះ មានទំហំ៣០អា ជាប់ដីស្រែ ប្រជាពលរដ្ឋគេគ្រប់គ្រងជាដីកម្មសិទ្ធិ និងអាស្រ័យផលរហូតមក។
ចំពោះដីដែលក្រុមហ៊ុនកំពុងជីកយកអាចម៍ដីនេះ ប្រជាពលរដ្ឋបានទទួលប្រាក់ពីក្រុមហ៊ុន គ្រប់ចំនួនហើយ។ ទាក់ទិនករណីនេះដែរ កាលពីវេលាម៉ោង១១ និង៥០នាទីថ្ងៃត្រង់ថ្ងៃទី២៩មេសា២០២៤ លោកស្រីឥន ណាគ្រី ប្រធានមន្ទីរវប្បធម៌និងវិចិត្តសិល្បៈខេត្តស្វាយរៀង ក៏បានដឹកនាំមន្ត្រីក្រោមឱវាទ ចុះទៅពិនិត្យនៅចំណុចរណ្តៅដី (ភូមិធំ)លោកស្រីបានមានប្រសាសន៍ថា ចំណុចដែលក្រុមហ៊ុនតៃសេង៥ ជីកនោះ ពុំមែនជាដីទួលបុរាណ ដែលមានចុះបញ្ជីទេ គឺជាដីកម្មសិទ្ធិរបស់ប្រជាពលរដ្ឋគ្រប់គ្រងអាស្រ័យផល (ជាភូមិចាស់ ហៅភូមិធំ)ភូមិចាស់នោះត្រូវម្ចាស់ឈប់រស់នៅ ដោយឆ្ងាយពីគេ មិនហ៊ានរស់នៅ ក៏ទៅនៅកន្លែងផ្សេង ហើយភូមិធំនោះមានដុះដំបូករពាក់ដើមឈើដើមឬស្សី ម្ចាស់គេគ្រប់គ្រងអាស្រយ័ផល ហើយបានលក់ទៅឲ្យក្រុមហ៊ុន។លោកស្រីបញ្ជាក់ថា នៅឃុំព្រះពន្លាគឺមានទួលបុរាណចំនួន២៥ទួល ដែលមានចុះបញ្ជី ចំណែកដីភូមិធំ មិនមែនជាទួលបុរាណទេ។
សូមរំលឹកផងដែរ កន្លងមកប្រជាពលរដ្ឋភូមិអូរដូនអាមផ្ទុះប្រតិកម្ម ករណីក្រុមហ៊ុនជីករណ្តៅដីយកអាចម៌ដី ជីករំលាយ (ទួលភូមិធំ)ជ្រៅដល់ក្បាលប្រែត ដែលប្រជាពលរដ្ឋលើកឡើងថា ជាទីទួលសម្រាប់ប្រជាពលរដ្ឋទុកជាកន្លែងគោរពបូជា និងឡើងអ្នកតា សុំទឹកភ្លៀង។បច្ចុប្បន្ន ក្រុមហ៊ុនបានជីកគាស់រំលើងរំលាយក្លាយជារណ្តៅ ចំណែកអាជ្ញាធរឃុំស្រុកឆ្លើយថាអត់ដឹង។
ករណីជីករំលាយទួលបុរាណនេះកើតឡើង ជិតកន្លះខែមកហើយរហូតមកដល់ថ្ងៃទី២៩មេសា២០២៤នេះ។បើតាមប្រជាពលរដ្ឋ នៅភូមិអូរដូនអាម ឃុំព្រះពន្លា ស្រុកកំពង់រោទ៌បានប្រាប់អ្នកសារព័ត៌មានយើងថា មានក្រុមហ៊ុនមួយ បានមកប្រមូលទិញដី នៅតាមបណ្តោយមាត់អូរដូនអាម ជាង៣០ហិកតា ដើម្បីអភិវឌ្ឍន៍ ដោយឲ្យលោកមេភូមិជួយទំនាក់ទំនងទិញពីប្រជាពលរដ្ឋ បន្ទាប់មកក្រុមហ៊ុនបានកក់ប្រាក់១០% ២០% ៤០%ក្នុងហិកតា តាមគ្រួសារម្ចាស់ដី ។
ហើយអ្វីដែលប្រជាពលរដ្ឋម្ចាស់ដីប្រតិកម្មនោះ ដោយក្រុមទិញដីស្រែរបស់គាត់មិនទាន់ឲ្យលុយគ្រប់ផង ស្រាប់តែមានក្រុមអាជីវកម្មជីករណ្តៅដី បានមកជីកដីស្រែរបស់ពួកគាត់អស់ ទំហំជិត០២ហិកតា ព្រមទាំងជីករំលាយទួលបុរាណ (ទួលភូមិធំ)ដែលជាទីកន្លែងសម្រាប់ធ្វើពិធីឡើងអ្នកតា សុំទឹកភ្លៀង រលាយទួលក្លាយជារណ្តៅជម្រៅ៨ទៅ០៩ម៉ែត្រយកអាចម៌ដីទៅចាក់ នៅលើដីស្រែផ្សេងទៀត ធ្វើអភិវឌ្ឍន៍។ហើយអ្វីដែលប្រជាពលរដ្ឋតវា នោះដោយពួកគាត់ព្រួយបារម្ភ ជីកយកអាចម៌ដីក្លាយជារណ្តៅ ហើយក្រុមហ៊ុនជីករណ្តៅដីនោះលើកគ្រឿងចក្រទៅបាត់តើពួកគាត់ទៅទាប្រាក់ពីអ្នកណា ។
ទាក់ទិនករណីនេះដែរ លោកគឹម រិទ្ធី មេឃុំព្រះពន្លា បានប្រាប់អ្នកសារព័ត៌មានយើងថា លោកពុំបានដឹងទេ ករណី ក្រុមអាជីវកម្មជីករណ្តៅដី ជីករំលាយទួលបុរាណ(ទួលភូមិធំ)នេះ ក្រុមហ៊ុនមិនបានមកសុំច្បាប់ពីអាជ្ញាធរឃុំទេសូមសួរទៅ អាជ្ញាធរស្រុកទៅ ។ ហើយចំពោះដីស្រែប្រជាពលរដ្ឋ ក៏លោកមិនដឹងដែរ រហូតមកដល់ពេលនេះមិនទាន់ឃើញ មានប្រជាពលរដ្ឋយកលិខិតកិច្ចសន្យាទិញ-លក់ដីមកចុះហត្ថលេខា នៅរដ្ឋបាលឃុំនៅឡើយ ។
គ្រាន់តែឮថា មានក្រុមហ៊ុនតាយសេង មកប្រមូលទិញដីស្រែរបស់ប្រជាពលរដ្ឋ ប្រហែល៣០ហិកតា នៅតាមបណ្តោយមាត់អូរដូនអាមនេះ ដើម្បីជីកយកអាចម៌ដីទៅចាក់នៅក្នុងតំបន់អភិវឌ្ឍន៍របស់ក្រុមហ៊ុនតាយសេង៥ ។ហើយក៏មិនដឹងថា គេជីករណ្តៅដីនេះទំហំប៉ុន្មានហិកតា និងជម្រៅ ប៉ុន្មានម៉ែត្រក៏អត់ដឹងដែរ។
លោកមេឃុំ បន្តទៀតថា បើតាមគម្រោង អភិឌ្ឍន៍របស់ក្រុមហ៊ុនតាយសេង៥ នេះ គេប្រមូលទិញដីស្រែពីប្រជាពលរដ្ឋនេះគឺប្រមាណ ជាង៣០០ហិកតា ឯណោះ គឺតាមបណ្តោយអូរដូនអាមនិងតាមបណ្តោយខាងក្រោយផ្ទះរបស់ប្រជាពលរដ្ឋក្នុងភូមិអូដូនអាមទាំងអស់ ។ហើយក្រុមហ៊ុនទើបតែឲ្យថ្លៃប្រាក់កក់ប៉ុណ្ណោះ ទើបប្រជាពលរដ្ឋគាត់ព្រួយបារម្មណ៍ មិនបានទទួលប្រាក់ថ្លៃដីគ្រប់តាមតម្លៃដីឬ ក្រុមហ៊ុនចេះតែពន្យា ពេលច្រើនខែច្រើនឆ្នាំ ខាតបង់ផលប្រយោជន៍ពួកគាត់។
ទាក់ទិនករណីនេះដែរ លោកសុចពិសី អភិបាលស្រុកកំពង់រោទ៌ បានមានប្រសាសន៍ប្រាប់អ្នកសារព័ត៌មានយើងថា លោកមិនទាន់ទទួលរបាយការណ៍ពីលោកមេឃុំព្រះពន្លានៅឡើយទេ។ចំណែកលោកប៉ាត់ សាក់ មន្ត្រីមន្ទីររ៉ែនិងឋាមពលខេត្តបានឲ្យដឹងថា ក្រុមហ៊ុនធ្វើអាជីវកម្មជីករណ្តៅដី ឈ្មោះហួរ មកពីភ្នំពេញ បានធ្វើសកម្មភាពជីករណ្តៅដី យកអាចម៍ដី ទំហំ២ហិកតា ជម្រៅ ៨ទៅ០៩ម៉ែត្រ យកអាចម៍ដីទៅចក្រក្នុងតំបន់សេដ្ឋកិច្ចពិសេសតាយសេង៥ ហើយការជីករណ្តៅដីនេះ មិនពាក់ពន្ធ័មន្ទីររ៉ែនិងឋាមពលខេត្តទេ បើគេសុំច្បាប់តាមរយៈមន្ទីរ គឺអនុញ្ញាតិ បានត្រឹមក្រោម១ហិកតា ជម្រៅត្រឹម០៥ម៉ែត្រ។ហើយនេះគេជីកទំហំ២ហិកតា ឡើងទៅអាចសុំទៅក្រសួង ហើយបើតាមការចុះពិនិត្យរបស់លោកគឺ ក្រុមហ៊ុនគេជីកដី នៅក្នុងតំបន់របស់គេដូច្នេះ មន្ទីរ មិនអាចចូលទៅ ហាមឃាត់ឬឲ្យផ្អាក សួរនាំរកច្បាប់ទម្លាប់ទេ ។
ចែករំលែកព័តមាននេះ