រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជា ណា ចក្រកម្ពុជា និងជាគ្រូបង្វឹកកិត្តិយសក្រុមបាល់ទាត់តារាកម្ពុជាបានថ្លែងថា ព្រឹត្តិការណ៍កីឡាបាល់…
រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជា ណា ចក្រកម្ពុជា និងជាគ្រូបង្វឹកកិត្តិយសក្រុមបាល់ទាត់តារាកម្ពុជាបានថ្លែងថា ព្រឹត្តិការណ៍កីឡាបាល់ ទាត់មិត្តភាពសប្បុរសធម៌ក្រោមមូលបទ «រួមគ្នាដើម្បីសប្បុរសធម៌ និងការប្រយុទ្ធប្រឆាំងគ្រឿង ញៀន» និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា ដែលគិតត្រឹមថ្ងៃទី០១ ខែឧសភា ឆ្នាំ២០២៤ ទទួលបានថវិកាចំនួនជាង៥លានដុល្លារអាមេរិកពីសប្បុរសជន។
យោងតាមបណ្ដាញទំនាក់ទំនងសង្គម កាលពីល្ងាចថ្ងៃទី០១ ខែឧសភា ឆ្នាំ២០២៤ សម្ដេចតេជោបានសរសេរថា បាល់ទាត់ល្ងាចនេះ បង្ហាញនូវសមិទ្ធផលសន្តិភាព ស្ថិរភាពនយោបាយនិងការអភិវឌ្ឍ ពិសេស បង្ហាញនូវស្មារតីសាមគ្គីភាពក្នុងចំណោមជនរួមជាតិយើង។ អរគុណក្រុមបាល់ទាត់ទាំង៤ក្រុម ដែលចូលរួមប្រកួត។ អរគុណសិល្បករ សិល្បការិនី អ្នកចូលរួមរៀបចំបម្រើការងារទាំងអស់ ពិសេសសាលារាជធានីភ្នំពេញ និងកងកម្លាំងប្រដាប់គ្រប់ប្រភេទ។ អរគុណអ្នកគាំទ្រដែលចូលរួមទស្សនាទាំងនៅពហុកីឡដ្ឋានទាំងមើលការផ្សាយផ្ទាល់។
ជាមួយគ្នានោះដែរ សម្ដេចតេជោ ក៏បានអរគុណសប្បុរសជនទាំងអស់ដែលបានចូលរួមជាថវិកា ដែលគិតត្រឹមថ្ងៃទី០១ ខែឧសភា ឆ្នាំ២០២៤នេះ មានប្រាក់រៀល ៦០៥ 000 000 រៀល ជាដុល្លារ ៤ ៨៥០ ០០០ ដុល្លារ។ សរុបគិតជាប្រាក់ដុល្លារចំនួន (៥ ០០១ ២៥០)។ សម្ដេចតេជោលើកឡើងថា ដូចបានជំរាបជូន៣ថ្ងៃមុននេះថា ថវិកាត្រូវបានបែងចែកសម្រាប់មន្ទីរពេទ្យកុមារអង្គរ ៥០០ ០០០ ដុល្លារ, មជ្ឈមណ្ឌលព្យាបាលកុមារបេះដូងជប៉ុន ៣០០ ០០០ ដុល្លារ, គ្រួសារយុទ្ធជនពលី២០គ្រួសារ ២០០ ០០០ ដុល្លារ សរុប ១ ០០០ ០០០ ដុល្លារ។
សម្រាប់មន្ទីរពេទ្យគន្ធបុប្ផា និងទទួលបាន ៤ ០០១ ២៥០ ដុល្លារ ជាបណ្តោះអាសន្ន និងប្រសិនជាទទួលបានបន្ថែមទៀត ក៏នឹងប្រគល់ជូនមន្ទីរពេទ្យគន្ធបុប្ផាទាំងអស់។ លទ្ធផលចុងក្រោយរបស់យើង គឺជីវិតសុខភាព និងស្នាមញញឹមរបស់កុមារ។
គួរបញ្ជាក់ដែរថា នារសៀលថ្ងៃទី ០១ ខែ ឧសភា ឆ្នាំ២០២៤ នៅពហុកីឡដ្ឋានជាតិអូឡាំពិក សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាគ្រូបង្វឹកកិត្តិយសក្រុមបាល់ទាត់តារាកម្ពុជា (Cambodia football Super Stars) បានអញ្ជើញជាអធិបតីភាពដ៏ខ្ពង់ខ្ពស់ ក្នុងព្រឹត្តិការណ៍កីឡាបាល់ទាត់មិត្តភាពសប្បុរសធម៌ក្រោមមូលបទ «រួមគ្នាដើម្បីសប្បុរសធម៌ និងការប្រយុទ្ធប្រឆាំងគ្រឿងញៀន» និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា។
ព្រឹត្តិការណ៍ប្រកួតកីឡាបាល់ទាត់មិត្តភាពសប្បុរសធម៌នេះ បានបញ្ចប់ដោយបរិយាកាសសប្បាយរីករាយបំផុត ដែលមានបងប្អូនប្រជាពលរដ្ឋទៅទស្សនាផ្ទាល់ប្រមាណជាង៣ម៉ឺននាក់ ក្នុងនោះលទ្ធផលនៃការប្រកួតគឺ កីឡាបាល់ទាត់ក្រុមតារាកម្ពុជា (Cambodia football Super Stars) បានទទួលជ័យជម្នះលើក្រុមបាល់ទាត់ Kun Khmer All Stars ក្នុងលទ្ធផល (2-0)។
ព្រឹត្តិការណ៍កីឡាបាល់ទាត់មិត្តភាពនេះជាព្រឹត្តិការណ៍ដ៏សំខាន់ដែលឆ្លុះបញ្ចាំងពីសាមគ្គីភាព ហើយជំរុញប្រជាពលរដ្ឋស្រឡាញ់កីឡា និងចៀសផុតពីគ្រឿងញៀន និងទឹកចិត្តសប្បុរសធម៌ ពិសេស ដើម្បីប្រមូលថវិកាជួយដល់មន្ទីរពេទ្យគន្ធបុប្ផា ដែលជាការបង្ហាញឱ្យឃើញពីភាពសប្បាយរីករាយរបស់ប្រជាពលរដ្ឋកម្ពុជាក្រោមម្លប់សន្តិភាព និងស្របទៅតាមពាក្យស្លោក «កីឡារស់ក្នុងសន្តិភាព»។
ទិដ្ឋភាពជាក់ស្តែងគេសង្កេតឃើញមានវត្តមានថ្នាក់ដឹកនាំស្ថាប័នជាតិច្រើនរូប បានអញ្ជើញចូលរួមទស្សនា និងអបអរសាទរព្រឹត្តិការបាល់ទាត់នេះផងដែរ៕
ចែករំលែកព័តមាននេះ