ខេត្តមណ្ឌលគិរី ៖ កូនដំរីព្រៃមួយក្បាលត្រូវបានអ្នកភូមិប្រទះឃើញដេកងាប់ក្នុងសភាពត្រូវរបួសដោយគ្រាប់កាំភ្លើងតាមផ្លូវធ្វើដំណើរឆ្ពោះទៅភូមិក្តោយ ក្នុងបរិវេណក្រុមហ៊ុនដីសម្បទានសេដ្ឋកិច្ចលឹមរ៉ូយ៉ាល់ ក្នុងភូមិជីក្លប់ ឃុំសុខសាន្ត ស្រុកកោះញែក ខេត្តមណ្ឌលគិរី នារសៀលថ្ងៃទី២៦ មករា ២០២៤ ។
ប្រភពបានរាយការណ៍ថា នៅពេលក្រុមការងាររដ្ឋបាលខេត្តចុះទៅកាន់ភូមិក្តោយ ឃុំរយ៉ ស្រុកកោះញែក ដើម្បីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋក៏បានទទួលព៏ត៌មានពីអ្នកភូមិប្រទះឃើញមានកូនដំរីព្រៃងាប់ ។ ក្រោយទទួលបានព័ត៌មាននេះ មន្ត្រីជំនាញនៃដែនជម្រកការពារសត្វព្រៃភ្នំព្រេច បានចុះទៅត្រួតពិនិត្យនៅទីតាំងកើតហេតុ ។
បន្ទាប់ពីត្រួតពិនិត្យជាបឋម គេរកឃើញមានស្នាមគ្រាប់មួយគ្រាប់ចំឆ្អឹងជំនីរឆ្វេងទើបបណ្ដាលឱ្យកូនដំរីមួយក្បាលនេះងាប់ ។ ប្រភពបានបន្តថា មន្ត្រីឧទ្យានុរក្សបានដឹកយកកូនដំរីញីខាងលើនោះទៅស្នាក់ការ ដើម្បីទុកឱ្យនគរបាលជំនាញកោល្យវិច្ឆ័យត្រួតពិនិត្យស្លាកស្នាមរកការពិតតើរបួសនោះបង្កឡើងមកពីអ្វីបាញ់ដោយកាំភ្លើងឬព្រួញ?
គួរបញ្ជាក់ថា ទីតាំងដែលគេប្រទះឃើញកូនដំរីខាងលើនេះគឺស្ថិតក្នុងដែនជម្រកការពារសត្វព្រៃភ្នំព្រេច ដែលសម្បូរទៅដោយសត្វព្រៃកម្រជាច្រើន រួមមាន ពូជដំរីព្រៃអាស៊ី ខ្ទីង ទន្សោង ជាដើម៕
ចែករំលែកព័តមាននេះ