មិនដល់៥ខែផង នៅក្នុងតំណែងនាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានធ្វើដំណើរទៅដល់អាមេរិក ចិន អឺរុប ឥណ្ឌូណេស៊ី វៀតណាម…
មិនដល់៥ខែផង នៅក្នុងតំណែងនាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានធ្វើដំណើរទៅដល់អាមេរិក ចិន អឺរុប ឥណ្ឌូណេស៊ី វៀតណាម និងជប៉ុនជាដើម ។ ដើមអាណត្តិទី៧នេះ កម្ពុជាបានក្រាលព្រំទទួលស្វាគមន៍នាយករដ្ឋមន្ត្រីថៃដែលជាមិត្តជាប់របងកម្ពុជាដ៏មានសក្តានុពលខាងសេដ្ឋកិច្ចផងដែរ ។
![](https://kohsantepheapdaily.com.kh/wp-content/uploads/2024/01/c40d4e188492ed3dc312c2ad3dceb116.jpg)
តាមរយៈសកម្មភាព និងបេសកកម្មខាងលើនេះ កម្ពុជាបានកំពុងពង្រឹងវិស័យការទូតជាមួយសកលលោកនោះត្រឹមវិស័យការទូតនយោបាយទេ តែបានយកចិត្តទុកដាក់ជាខ្លាំងនៅវិស័យការទូតសេដ្ឋកិច្ចផងដែរ ។ សេដ្ឋកិច្ចជាគន្លឹះ ដើម្បីកម្ពុជាពង្រឹងឯករាជ្យភាព មានធិបតយ្យេភាព ពលរដ្ឋរស់នៅក្នុងភាពរុងរឿងមានសេដ្ឋកិច្ចខ្ពស់មានចំណូលល្អគ្រប់ៗគ្នា ។ ការក្លាយជាអ្នកមានជាក្តីរំពឹងរបស់ពលរដ្ឋខ្មែរគ្រប់រូប ។
![](https://kohsantepheapdaily.com.kh/wp-content/uploads/2024/01/74e90ef8095aff79a34a50a3abcaeef0.jpg)
គេនៅចាំបានថា អំឡុងពេលបំពេញទស្សនកិច្ចនៅសហរដ្ឋអាមេរិក កាលពីខែកញ្ញា ឆ្នាំ២០២៣ ដើម្បីចូលរួមមហាសន្និបាតរបស់អង្គការសហប្រជាជាតិនោះ សម្តេច ហ៊ុន ម៉ាណែត បានគូសបញ្ជាក់យ៉ាងច្បាស់ថា ដំណើរទស្សនកិច្ចរបស់សម្តេចនៅក្រៅប្រទេសដូចជាអាមេរិកជាដើមនោះ មិនមែនធ្វើឡើងតែដើម្បីវិស័យការទូតដែលសំដៅដល់ការទូត នយោបាយនោះទេ គឺសម្តេចធ្វើការទូតសេដ្ឋកិច្ច គឺទាក់ម៉ូយមកវិនិយោគនៅកម្ពុជាដែរ ។
![](https://kohsantepheapdaily.com.kh/wp-content/uploads/2024/01/728b6262ac8b63d033db85371a579c16.jpg)
«ខ្ញុំបានធ្វើការជាមួយការទូតនយោបាយ ហើយខ្ញុំមិនដែលភ្លេចពីការដើរទាក់ម៉ូយនោះទេ ទោះបីជាទៅចិន ឥណ្ឌូនេស៊ី និងអាមេរិកក៏ដូចគ្នាដែរ ។ ខ្ញុំចុះដល់អាមេរិក ខ្ញុំបានជួបជា មួយតំណាងក្រុមហ៊ុនចំនួន៥៨នៅក្នុងវិស័យនានា» នេះជាការលើកឡើងរបស់សម្តេច នាយករដ្ឋមន្ត្រី នៅក្រោយពេលបំពេញទស្សនកិច្ចនៅសហរដ្ឋអាមេរិក ។
![](https://kohsantepheapdaily.com.kh/wp-content/uploads/2024/01/a745180e10cf7b75dbd38e936a41c248.jpg)
រហូតមកដល់ពេលនេះ អាចអះអាងបានថា សម្តេចនាយករដ្ឋមន្ត្រីបានប្រឹងប្រែងទាក់ម៉ូយ ឱ្យមកវិនិយោគនៅកម្ពុជា គឺបានសឹងគ្រប់ជ្រុងសំខាន់ៗនៃប៉ូលសេដ្ឋកិច្ចរបស់ពិភពលោកហើយប្រទេសដែលសម្តេចបានជួបនោះសុទ្ធសឹងជាមហាអំណាចសេដ្ឋកិច្ចនៅក្នុងសកលលោក និងតំបន់ដូចជា អាមេរិក អឺរ៉ុប ជប៉ុន និងចិន ជាមហាអំណាចសេដ្ឋកិច្ចលើលោក ។ ដូច្នេះប្រសិនជាបណ្តាប្រទេសទាំងនោះបន្ថែមការវិនិយោគថ្មីៗទម្លាក់ក្រុមហ៊ុនរបស់ខ្លួន បន្ថែមមករកស៊ីនៅកម្ពុជានោះ ។ កម្ពុជា ដែលមានពលរដ្ឋប្រមាណ១៧លាននាក់នោះ ប្រាកដជារីកចម្រើនហើយពលរដ្ឋប្រាកដជាគ្មានអ្នកអត់ការងារនោះទេ ។
ក្រៅពីស្តេចសេដ្ឋកិច្ចនៅលើលោក ប្រទេសវៀតណាម និងថៃ ដែលប្រមុខដឹកនាំកម្ពុជា បានជួបប្រាស្រ័យទាក់ទងជាមួយថ្នាក់ដឹកនាំ និងអ្នកធុរកិច្ចរបស់គេហើយដែរនោះ ក៏មិន ធម្មតាដែរ ។ ប្រសិនក្រុមហ៊ុន មកពីប្រទេសទាំងពីរនេះសុខចិត្តបោះទុននៅកម្ពុជា បន្ថែម ទៀតនោះ ទាំងសេដ្ឋកិច្ច ទាំងចំនួនពលរដ្ឋខ្មែរមានការងារធ្វើនឹងហត់ឡើងជាមិនខាន ឡើយ ។
![](https://kohsantepheapdaily.com.kh/wp-content/uploads/2024/01/17df099f5c57c933decf9ee4ca97a1a0.jpg)
សរុបមកវិញរហូតមកដល់ពេកនេះ គេអាចនិយាយថា ថ្នាក់ដឹកនាំកម្ពុជ បានធ្វើនូវអ្វីដែល គួរធ្វើអស់ហើយ គឺគេនៅរង់ចាំតែការសម្រេចចិត្តពីអ្នកវិនិយោគនៅបណ្តាប្រទេសទាំង នោះប៉ុណ្ណោះ ។ កត្តាសុខសន្តិភាព ស្ថិរភាពសង្គម រួមនឹងច្បាប់វិនិយោគថ្មី ដែលបានធានាការពារច្បាស់លាស់ដល់ផលប្រយោជន៍អ្នកវិនិយោគទុននៅកម្ពុជា រួមនេះគោលនយោបាយអនុគ្រោះនានា ដែលរដ្ឋាភិបាលសម្រេចបានដាក់ចេញជាលក្ខណៈសម្បត្តិរបស់កម្ពុជា សម្រាប់ទាក់ទាញអ្នកវិនិយោគ ។ ប៉ុន្តែមានការមើលឃើញថា ក្រៅពីកត្តាទាំងអស់នេះកម្ពុជាគួរមានវិធានការមួយចំនួនទៀត ដើម្បីបង្កលក្ខណៈងាយស្រួលដល់ការវិនិយោគរបស់បរទេស ។ កត្តាទាំងនោះមានដូចជា ការលុបបំបាត់អំពើពុករលួយ ការពង្រឹងការអនុវត្តច្បាប់ ការបញ្ចុះតម្លៃសេវាកម្មនានា ដែលជាវត្ថុធាតុដើមក្នុងការវិនិយោគដូចជាអគ្គិសនី ថ្លៃដឹកជញ្ជួន រួមទាំងលក្ខណ្ឌការងាររបស់កម្មករផងដែរ ។ លក្ខខណ្ឌការងារ ដែលក្រុមហ៊ុនខ្លះ ពិសេសនៅប៉ែកអឺរ៉ុប និងអាមេរិកគេតម្រូវតែម្តង ពីព្រោះជាការចង់បានរបស់ទីផ្សារ ។
![](https://kohsantepheapdaily.com.kh/wp-content/uploads/2024/01/cd2078201e6757a7ed0b5a21d78f8d38.jpg)
ពេញមួយឆ្នាំ២០២៣ កម្ពុជាអនុម័តគម្រោងវិនិយោគបានសរុបចំនួន២៦៨ ដែលមានទុនវិនិយោគសរុបប្រមាណជិត៥ពាន់លានដុល្លារអាមេរិក ។ ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ក្នុងចំណោមគម្រោងវិនិយោគនៅឆ្នាំកន្លងទៅនោះមានគម្រោងថ្មីចំនួន២៤៧ និងគម្រោងពង្រីកផលិតកម្មចំនួន២១ ។ រំហូរទុនវិនិយោគក្នុងឆ្នាំ ២០២៣ ភាគច្រើន មានប្រភពមកពីប្រទេសចិន និងក្នុងស្រុក ដោយបានរួមចំណែកជិត៩០% នៃទុនវិនិយោគសរុប បន្ទាប់មានទុនពីប្រទេសម៉ាឡេស៊ី និងសិង្ហបូរី ។
មិនថា ការវិនិយោគមកពីអាមេរិក ចិន អឺរុប វៀតណាម និងជប៉ុននោះទេ ពលរដ្ឋកម្ពុជា និយាយជារួម គឺកម្ពុជាតែម្តងបានកំពុងរង់ចាំ ។ ការវិនិយោគពីបណ្តាប្រទេសទាំងអស់នោះនឹងនាំមកនូវកំណើនសេដ្ឋកិច្ច និងទីផ្សារការងារដល់ពលរដ្ឋខ្មែរ ។ ការវិនិយោគពីបណ្តាប្រទេសទាំងអស់លើលោកនឹងធ្វើឱ្យកម្ពុជាសម្រេចបាននូវចក្ខុវិស័យក្លាយជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសអ្នកមានចំណូលខ្ពស់នៅឆ្នាំ២០៥០ ខាងមុខនេះ ៕
ចែករំលែកព័តមាននេះ