មិនមែនគំរា.មទេ ប៉ុន្តែវា គឺជាការពិត។ ដូច្នេះយើងទាំងអស់គ្នាត្រូវតែចាំបាច់លើកកម្ពស់ការប្រុងប្រយ័ត្ននៅក្នុងការប្រយុទ្ធប្រឆាំងក៏ដូចជា ការទទួល និងប្រើប្រាស់ព័ត៌មានក្លែងក្លាយ ហើយបញ្ហានេះសូម្បីតែ លោក នេត្រ ភក្ត្រា…
មិនមែនគំរា.មទេ ប៉ុន្តែវា គឺជាការពិត។ ដូច្នេះយើងទាំងអស់គ្នាត្រូវតែចាំបាច់លើកកម្ពស់ការប្រុងប្រយ័ត្ននៅក្នុងការប្រយុទ្ធប្រឆាំងក៏ដូចជា ការទទួល និងប្រើប្រាស់ព័ត៌មានក្លែងក្លាយ ហើយបញ្ហានេះសូម្បីតែ លោក នេត្រ ភក្ត្រា រដ្ឋមន្ត្រីក្រសួងព័ត៌មានក៏សង្កត់ធ្ងន់ដែរ ។
នៅក្នុងពេលបើកសន្និបាតបូកសរុបលទ្ធផលការងារ ឆ្នាំ២០២៣ និងលើកទិសដៅការងារ ឆ្នាំ២០២៤ របស់ក្រសួងព័ត៌មាន នាព្រឹកថ្ងៃទី២២ ខែមករា ឆ្នាំ២០២៤ លោក នេត្រ ភត្រា បានលើកឡើងថា ក្រសួងនឹងខិតខំធ្វើយ៉ាងណាគ្រប់គ្រង សន្តិសុខព័ត៌មានឱ្យបានល្អ ដើម្បីកុំឱ្យប្រជាពលរដ្ឋពុលព័ត៌មានក្លែងក្លាយដែលធ្វើឱ្យមានការយល់ច្រឡំ ។
លោករដ្ឋមន្ត្រីបានសង្កត់ធ្ងន់ថា បើសិនប្រជាពលរដ្ឋពុលដោយសារព័ត៌មាននោះនឹងពិបាក ។ ដូច្នេះហើយក្នុងនាមក្រសួងដែលជាអ្នកផ្សព្វផ្សាយរដ្ឋផង វិធានការច្បាប់ផង គឺចាំបាច់ត្រូវគ្រប់គ្រងសន្តិសុខព័ត៌មានឱ្យបានពេញលេញ ។ បើតាមការលើកឡើងរបស់លោករដ្ឋមន្ត្រីនៅកម្ពុជាគ្រាន់តែអ្នកដែលមានគណនីហ្វេសប៊ុក គឺប្រមាណជា ១៥ លានគណនី ហើយបើតិកតក់វិញនោះ គឺប្រមាណជា ១០លានគណនី ។ ដូច្នេះ ហើយបានជាតម្រូវឲ្យមានការប្រុងប្រយ័ត្ននឹងព័ត៌មានក្លែងក្លាយ ។
ទាក់ទិននឹងសន្តិសុខព័ត៌មាននេះ លោក នេត្រ ភក្ត្រា បានថ្លែងថា ក្រសួងបានផ្តោតសំខាន់លើ៣ចំណុច ទី១ គឺការទទួលបានព័ត៌មានរបស់ប្រជាពលរដ្ឋ ទី២ ព័ត៌មានដែលមានគុណភាព និងទី៣ សុវត្ថិភាពសារព័ត៌មាន ដែលសំដៅលើព័ត៌មានដែលបង្កើតឡើងបញ្ចេញផ្សព្វផ្សាយ គឺជាព័ត៌មានមានភាពត្រឹមត្រូវ ពិតប្រាកដ មិនបំពុលសង្គម ។ លោករដ្ឋមន្ត្រីក្រសួងព័ត៌មាន បន្តថា សន្តិសុខព័ត៌មាន គឺជាផ្នែកមួយក្នុងការជួយពង្រឹងសន្តិសុខសម្រាប់ជាតិ សណ្តាប់ធ្នាប់ និងស្ថេរភាពសម្រាប់ប្រទេស។
នេះ គឺជាក្តីបារម្ភនៅកម្ពុជា ខណៈដែលនៅលើពិភពលោកឯណោះវិញ ព័ត៌មានក្លែងក្លាយនេះនឹងបង្កគ្រោះថ្នាក់ដ៏ធំបំផុតដល់ពិភពលោក នៅក្នុងខណៈពេលដែលពេលនេះពលរដ្ឋកំពុងតែយកចិត្តទុកដាក់លើបញ្ហាអំពីសង្គ្រាម អតិផរណា និងបញ្ហាសេដ្ឋកិច្ចជាដើម ។ ការស្ទង់មតិប្រចាំឆ្នាំដែលធ្វើឡើងដោយវេទិកាសេដ្ឋកិច្ចពិភពលោក ក្នុងចំណោមអ្នកជំនាញដែលជា អ្នកបង្កើតគោលនយោបាយ និងអ្នកដឹកនាំឧស្សាហកម្មក៏ដូចជា សេដ្ឋកិច្ចជាង១.៤០០ នាក់ បានអះអាងថា ព័ត៌មានក្លែងក្លាយជាបញ្ហាអទិភាពដែលកំពុងតែបំពុលពិភពលោកខ្លាំងណាស់ ។
ការស្ទង់មតិនេះបានអះអាងថា នៅពេលដែលពិភពលោកកំពុងតែស្ថិតនៅក្នុងស្ថានភាព ដូចសព្វថ្ងៃ ព័ត៌មានក្លែងក្លាយ គឺកាន់តែសាហាវ ហើយព័ត៌មានក្លែងក្លាយធំៗដែលនឹងត្រូវគេបំពុលនៅក្នុងពេលនេះរហូតដល់រយៈពេល២ឆ្នាំគេជឿជាក់ថា នឹងសម្បូរបំផុតនៅលើបញ្ហាសន្តិសុខតាមលំហអ៊ីនធើណិត អតិផរណា ស្ថានភាពសេដ្ឋកិច្ចទូទៅ សង្គ្រាម អំពើហិ.ង្សា បញ្ហាអាកាសធាតុជំងឺជាដើម ។
ទៅថ្ងៃមុខព័ត៌មានក្លែងក្លាយ ទាំងនេះត្រូវបានគេជឿជាក់ថា មិនត្រឹមតែមិនថយចុះនោះទេវានឹងកាន់តែមានច្រើន ។ ដូច្នេះគប្បីពង្រឹង និងប្រុងប្រយ័ត្នហើយប្រើប្រាស់ព័ត៌មានដែលពិត ដើម្បីជាប្រយោជន៍សម្រាប់សង្គម ។ នៅក្នុងករណីយើងប្រើប្រាស់នូវព័ត៌មានដែលខុស ហើយក្លែងក្លាយអ្វីដែលយើងប្រឈមមុខចម្បងនោះ គឺអាចយើងមានទោសទៅតាមទំហំនៃបញ្ហានៃការធ្វេសប្រហែស ហើយ និងការដែលសង្គមរងការខូចខាត ។ ដូចដែលរដ្ឋមន្ត្រីព័ត៌មានបានលើកឡើងខាងលើ គឺថាប្រភពព័ត៌មានតាមបណ្តាញសង្គម នៅកម្ពុជា គឺមានរហូតដល់២៥លានគណនី ដូច្នេះគប្បី ជ្រើសរើសព័ត៌មានណាដែលមាន ប្រភពច្បាស់លាស់ព័ត៌មានដែលចេញពីស្ថាប័នដែលមាន រចនាសម្ព័ន្ធ មានការគ្រប់គ្រង ត្រួតពិនិត្យច្បាស់លាស់ ត្រឹមត្រូវតាមច្បាប់ ៕ អត្ថបទៈ ហេង ចេស្តារ
ចែករំលែកព័តមាននេះ