ADផ្ទាំងផ្សព្វផ្សាយពាណិជ្ជកម្ម

Picture

ស្ត្រី​ម្នាក់​អះអាងថា​ជា​កូនលួ.ចលា.ក់​វីរបុរសបាល់ទាត់ Pele ស្នើ​យក​ស.ព​ឪពុក​ធ្វើតេស្ត DNA

1 ខែ មុន

ប្រេ​ស៊ី​ល ៖ ស្ត្រី​ម្នាក់​ដែល​បាន​អះអាង​ថា ជា​កូនស្រី​លួចលាក់​របស់​វីរបុរស​បាល់ទាត់​ប្រេ​ស៊ី​ល Pele បាន​

ប្រេ​ស៊ី​ល ៖ ស្ត្រី​ម្នាក់​ដែល​បាន​អះអាង​ថា ជា​កូនស្រី​លួចលាក់​របស់​វីរបុរស​បាល់ទាត់​ប្រេ​ស៊ី​ល Pele បាន​ទាមទារ​យក​សាកសព​ឪពុក​មក​ធ្វើតេស្ត DNA ស្វែងរក​ការ​ពិត​។ នេះ​បើ​យោង​តាម​ប្រភព​ពី​កាសែត The Sun ចេញផ្សាយ​កាលពី​ថ្ងៃ​ទី​២២ ខែមករា ឆ្នាំ​២០២៤ កន្លង​ទៅ​។

តាម​ពិត​រឿងរ៉ាវ​នៃ​ការ​អះអាង​ថា​ជា​កូនស្រី​លួចលាក់​នេះ បាន​កើតឡើង​កាលពី​ជិត​៥​ឆ្នាំ​មុន​មក​ម្ល៉េះ ប៉ុន្តែ​កាលពី​ថ្មី​ៗ​នេះ លោកស្រី Maria do Socorro Azevedo អាយុ​៦០​ឆ្នាំ​បាន​ណែនាំ​មេធាវី​របស់​ខ្លួន​ចាប់ផ្តើម​សើរើ​ពាក្យបណ្តឹង​ដើម្បី​បញ្ជាក់​ការ​ពិត​ថា លោក Pele គឺជា​ឪពុក​បង្កើត​របស់​គាត់​។

លោកស្រី Maria do Socorro Azevedo ដែលអះអាងថាជាកូនស្រីលួចលាក់របស់លោក Pele

លោក Pele ដែល​ជា​កីឡាករ​តែ​ម្នាក់​គត់​លើ​ពិភពលោក​ឈ្នះ​ពានរង្វាន់ World Cup ៣​ដង បាន​ទទួលមរណភាព​ក្នុង​អាយុ​៨២​ឆ្នាំ កាលពី​ថ្ងៃ​ទី​២៩ ខែធ្នូ ឆ្នាំ​២០២២ នៅ​មន្ទីរពេទ្យ Sao Paulo ប្រទេស​ប្រេ​ស៊ី​ល មុន​ស្លាប់​លោក​បញ្ហា​ជំងឺ​តម្រងនោម និង​ក្រពេញ​ប្រូ​ស្តា​ត ថែម​ទាំង​ទទួល​ការ​វះកាត់​យក​ដុំ​សាច់​ចេញពី​ពោះវៀនធំ​ផង​ដែរ កាលពី​ខែកញ្ញា ឆ្នាំ​២០២១​។ ទោះ​យ៉ាងណា Pele បាន​ទទួលស្គាល់​ថា គាត់​អាច​មានកូន​ម្នាក់​ទៀត​។ និមិត្តរូប​បាល់ទាត់​ប្រេ​ស៊ី​ល​រូប​នេះ​បាន​រៀប​ការ​៣​ដង ហើយ​ជា​ផ្លូវការ​គាត់​មានកូន​ទាំងអស់​៧​នាក់ និង​ម្នាក់​ជា​កូនស្រី​ចុង ហើយ​ដើម្បី​ស្វែងរក​ការ​ពិត​កូន​២​នាក់​របស់​គាត់​គឺ​លោក Edinho Nascimento និង​លោកស្រី Flavia Christina បាន​យល់ព្រម​ធ្វើតេស្ត DNA បន្ទាប់​ពី​មានការ​អះអាង​ពី​ស្ត្រី​ខាងលើ​។

របាយការណ៍​នៅ​ប្រេ​ស៊ី​ល​ដោយ​ដកស្រង់​សម្តី​មេធាវី​របស់​លោកស្រី Maria លោក Marcos Fernando dos Santos Sousa អះអាង​ថា លទ្ធផល​ដំបូង​បាន​បង្ហាញ​ថា អវិជ្ជមាន ប៉ុន្តែ​ការ​ធ្វើតេស្ត DNA កូនក្តី​គាត់​ជាមួយនឹង​លទ្ធភាព​កម្រិត​ខ្ពស់​នៃ​តំណ​ឈាម​។ មេធាវី​ដដែល​បាន​និយាយ​ថា ឥឡូវនេះ​ពួក​គេ​គ្មាន​ជម្រើស ក្រៅពី​ស្នើ​សុំ​យក​សាកសព​របស់​លោក Pele ដែល​បាន​បញ្ចុះ​រួច​ហើយ ដើម្បី​ធ្វើតេស្ត​ដោះស្រាយ​ស្ថានភាព​នេះ​។

លោក Pele និងប្រពន្ធចុងក្រោយ និងទី៣ លោកស្រី Marica Aoki

លោក Pele អតីត​កំពូល​ខ្សែប្រយុទ្ធ​ក្រុម Santos ត្រូវ​បាន​របាយការណ៍​ថា បាន​យល់ព្រម​ធ្វើតេស្ត DNA ប៉ុន្តែ​ជា​អកុសល​គាត់​បាន​ស្លាប់​មុន​ពេល​ការ​ធ្វើតេស្ត​កើតឡើង​។ លោកស្រី Maria បាន​និយាយ​ជា​សាធារណៈ​អំពី​ការ​អះអាង​ថា គាត់​ជា​កូនស្រី​បង្កើត​លួចលាក់​របស់​លោក Pele ក្នុង​កម្មវិធី​ទូរទស្សន៍​ប្រេ​ស៊ី​ល​កាលពី​ថ្ងៃអាទិត្យ​ស​ប្តា​ហ៍​មុន ហើយ​ទទូច​ថា គាត់​មិន​ចាប់អារម្មណ៍​នឹង​ទ្រព្យសម្បត្តិ​ប្រាក់​របស់​លោក Pele នោះ​ទេ​។

លោកស្រី​បាន​បញ្ជាក់​ថា ម្តាយ​របស់​គាត់​មិន​ដែល​ប្រាប់​លោក Pele ថា គាត់​មាន​ផ្ទៃពោះ​ជាមួយ​ស្តេច​បាល់ទាត់​ប្រេ​ស៊ី​ល​រូប​នេះ​ឡើយ បន្ទាប់​ពី​គាត់​បាន​ផ្លាស់​ប្តូរ​ទីលំនៅ​ទៅ​កាន់​ទីក្រុង Sao Luis រដ្ឋ Maranhao ប្រទេស​ប្រេ​ស៊ី​ល​។ លោកស្រី Maria ដែល​មក​ពី​រដ្ឋ Piaui ភាគ​ឦសាន​ប្រទេស​ប្រេ​ស៊ី​ល បាន​និយាយ​ថា គាត់​បាន​សម្រេចចិត្ត​ធ្វើតេស្ដ DNA ជា​លើក​ដំបូង​ក្នុង​ឆ្នាំ ២០១៩ នៅ​ពេលធ្វើការ​ជា​អ្នកបំរើ​នៅ​ទីក្រុង Sao Paulo ។

លោក Pele បាន​បន្សល់​ទុក​ទ្រព្យសម្បតិ្ត ៣០% ដល់​ប្រពន្ធ​ទី​៣ និង​ចុង​ក្រោយ​របស់​គាត់​គឺ​លោកស្រី Marica Aoki កូនកាត់​ជប៉ុន​-​ប្រេ​ស៊ី​ល និង​ចំណែក ៦០% ទៀត​ត្រូវ​បែងចែក​ទៅ​កូន​ទាំងអស់​របស់​គាត់ និង ១០% ទៅ​ចៅ​២​នាក់​។ ទ្រព្យសម្បត្តិ​សុទ្ធ​របស់​លោក Pele នៅ​ពេល​គាត់​ស្លាប់មាន​ប្រហែល​៩៩​លាន​ដុល្លារ​។ ដូច្នេះ​បើ​លោកស្រី Maria បញ្ចប់​ដោយ​ការ​ទទួលស្គាល់​ថា​ជា​កូន​ទី​៨​របស់​លោក Pele នោះ​គាត់​នឹង​អាច​ទាមទារ​ចំណែក​របស់​គាត់​នៃ​ទ្រព្យ​ដែល​កូន​ៗ​ទាំងអស់​ទទួល​បាន​។

យ៉ាងណាមិញ លោក Augusto Miglioli មេធាវី​គ្រួសារ​លោក Pele បាន​បញ្ជាក់​ថា គ្រួសារ​លោក Pele នឹង​ប្តឹង​ប្រឆាំង​នឹង​ការ​ទាមទារ​សំណង​ណាមួយ​ផ្អែក​លើ​មូលដ្ឋាន​នៃ​ការ​ធ្វើតេស្ត DNA ដែល​បាន​ធ្វើ​រួច​ហើយ និង​បាន​បង្ហាញ​ថា Maria មិនមែន​ជា​កូនស្រី​របស់​លោក Pele នោះ​ទេ​៕

អត្ថបទសរសេរ ដោយ

កែសម្រួលដោយ