រាជធានីភ្នំពេញ ៖ សម្មានចិត្តជួយយកអាសារគ្នាក្នុងគ្រាលំបាកជាសម្មានចិត្តដ៏ល្អរបស់ខ្មែរយើងបន្សល់ទុកតាំងពីដូនតាយើងមក ។ មកដល់ពេលនេះក៏មិនទាន់ដាច់ពូជឡើយ សម្មានចិត្តដ៏សប្បុរសរបស់ខ្មែរយើងក្នុងការជួយយកអាសារគ្នានេះ ។ យ៉ាងណាក៏ដោយការជួយគ្នាក៏ត្រូវតែគិតពីសុវត្ថិភាពផ្ទាល់ខ្លួនជាចម្បងផងដែរ ។
ក្នុងរឿងជួយគ្នានេះ កាលពីថ្ងៃទី២១ ខែមករា ឆ្នាំ២០២៤ នៅម៉ោង១៣ និង៣០នាទី មានករណីមនុស្សលង់ទឹកស្លា.ប់ម្នាក់ នៅចំណុចទំនប់សែនសុខដុម (ទំនប់លើ) ស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី ។ អ្នកលង់ទឹកនោះ ដោយសារតែជួយហែលទឹកទៅរើសបាល់ឱ្យក្មេងៗ ។
ជនរងគ្រោះ ឈ្មោះ ដែន ទង ភេទប្រុស អាយុ២៣ឆ្នាំ ជនជាតិព្នង សញ្ជាតិខ្មែរ មានទីលំនៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី ។ ជនរងគ្រោះបានចុះជួយយកបាល់ដែលធ្លាក់ចូលទឹកឲ្យក្មេងៗ ។ ពេលដែលយកបាល់បាន ជនរងគ្រោះក៏ហែលទឹក មកច្រាំងវិញ តែត្រូវលង់ទឹកបណ្ដាលអោយស្លា.ប់តែម្ដង ។
ក្រោយកើតហេតុ មានអ្នកងូតទឹករាវយកស.ពឡើងលើគោក ហើយសមត្ថកិច្ចជំនាញបានត្រួតពិនិត្យ ហើយសន្និដ្ឋានថា ស.ពជនរងគ្រោះ ពិតជាបានលង់ទឹកស្លា.ប់ ពិតប្រាកដមែន ពុំមានពាក់ព័ន្ធករណីឃា.តកម្មឡើយ ។
ករណីចុងក្រោយនេះ នាំឱ្យយើងគ្រប់រូបត្រូវទុកជាមេរៀន ។ តែមិនមែនរហូតដល់ថ្នាក់ថា ឃើញគេមានអាសន្នមានគ្រោះថ្នាក់ហើយ បែរជាអោបដៃមើល ក៏ទៅផុតដោយមិនជួយនោះទេ ព្រោះតែខ្លាចគ្រោះថ្នាក់ដល់ខ្លួនឯង ។ ប៉ុន្តែក្នុងករណីថ្មីចុងក្រោយ នៅខេត្តមណ្ឌលគិរីនេះ គឺត្រឹមតែជួយរើសបាល់ឱ្យក្មេងៗ ហេតុអ្វីក៏ត្រូវចំណាយជីវិតដូច្នេះ ។ អ្នកជួយរើសបាល់អាចរកទូក ឬក៏ពោងដែលធ្វើពីពោះវៀនកង់ឡាន ឬក៏ប៊ីដុង ធុងស្នោរដែលអាចអណ្តែត ល្មមតោងបាន ដើម្បីជិះ ឬហែលទៅរើសបាល់នោះ ។
នៅមានករណីជាច្រើនទៀត ដែលសុទ្ធតែជារឿងនឹកស្មានមិនដល់ ហើយបង្កគ្រោះថ្នាក់ដល់អ្នកជួយ ។ ដូចជាករណី មានអ្នកលោ.តទឹកសម្លា.ប់ខ្លួន ពីស្ពានជ្រោយចង្វារ ស្រាប់តែមានអ្នកជួយលោ.តទៅតាមក៏មិនកើតឡើយ ។ បើមិនដូច្នេះទេ ករណីអ្នកងូតទឹកជ្រោះ ហើយត្រូវទឹកហូរ គួចទៅ ស្រាប់តែមានអ្នកហែលទៅជួយសង្គ្រោះក៏អាចនឹងបង្កគ្រោះថ្នាក់ ទាំងពីរនាក់ ។
រឿងឆ.ក់ខ្សែភ្លើងក៏ដូចគ្នា ។ បើឃើញអ្នករងគ្រោះឆ.ក់ខ្សែភ្លើង ស្រាប់តែអ្នកជួយសង្គ្រោះទៅចាប់ទាញផ្ទាល់ដៃ គឺអាចនឹងឆ.ក់ទាំងពីរនាក់ ។ ដូច្នេះករណីឆ.ក់ខ្សែភ្លើង គឺមានវិធីជួយដោយបិទប៉ារ៉ែត ឬក៏រកវត្ថុស្ងួត ដូចជា ក្រណាត់ អាវ ក្រមា ចាប់ទាក់ទាញជនរងគ្រោះពីខ្សែភ្លើងឆ.ក់នោះ ទើបមិនគ្រោះថ្នាក់ដល់អ្នកជួយ ។
សរុបទៅ មនុស្សយើងម្នាក់ៗ តែងតែមានចិត្តអាណិតអាសូរ និងជួយយកអាសារនៅពេលឃើញអ្នករងគ្រោះ ។ ប៉ុន្តែការជួយសង្គ្រោះនោះ ត្រូវតែជួយដោយប្រើបញ្ញា ពោល គឺជួយបានទាំងជនរងគ្រោះ ហើយក៏មិនបង្កគ្រោះថ្នាក់អ្វីដល់អ្នកជួយឡើយ ។ រឿងសាមញ្ញៗតែបើយើងធ្វើមិនបានគិតគូរឱ្យល្អិតល្អន់ក៏អាចនឹងបង្កគ្រោះថ្នាក់ធំក៏អាចថាបាន ៕
ចែករំលែកព័តមាននេះ