រៀបការបាន៣ថ្ងៃខឹងប្តីចុះចោល ផឹកទឹកអាស៊ីត នារីម្នាក់ទៀតខឹងប្តីដើរផឹកស៊ី ផឹកថ្នាំបាញ់កក់

ថ្ងៃទី ២៧ ខែ ឧសភា ឆ្នាំ ២០១១

ម៉ោង ០៥:៤៣

ខេត្តកំពង់ឆ្នាំង ៖ ស្ត្រីពីរនាក់បានប៉ងផ្តាច់ជីវិតខ្លួនដោយម្នាក់តូចចិត្តរៀបការបាន៣ថ្ងៃ ប្តីចុះចោល និងម្នាក់ទៀតតូចចិត្តប្តីផឹកស៊ីមិនជួយធ្វើការងារផ្ទះ ។ ហេតុការណ៍នេះបានកើតឡើងនៅយប់ថ្ងៃទី២៦ ឧសភា និងមួយករណីទៀតកើតឡើងនៅម៉ោង៤ទៀបភ្លឺថ្ងៃទី២៧ ឧសភា នៅភូមិតែមួយ គឺភូមិក្រោលជី ឃុំពពេល ស្រុកបរិបូណ៍ ។ ស្ត្រីដែលតូចចិត្តនឹងប្តីទើបរៀបការបាន៣ថ្ងៃ ហើយចុះចោលនេះឈ្មោះឡាយ គី អាយុ៣៣ឆ្នាំ ។

តាមការរៀបរាប់របស់ឪពុកក្មេកស្ត្រីរូបនេះ ឈ្មោះសៀង ណាត អាយុ៤៣ឆ្នាំ ឱ្យដឹងថា កូនប្រសាគាត់នោះបានផឹកទឹកអាស៊ីតមួយកូនកែវ កាលពីវេលាម៉ោង៤ទៀបភ្លឺ ថ្ងៃទី២៧ ឧសភា បន្ទាប់ពីកូនប្រសាគាត់តូចចិត្តនឹងប្តីដែល ទើបរៀបការបាន៣ថ្ងៃ ហើយចុះចោលរូបនាង ។ បុរសជាឪពុកក្មេកមិនបានប្រាប់ឈ្មោះកូនបង្កើតរបស់គាត់ទេ តែប្រាប់ថា កូនប្រុសគាត់អាយុ២៣ឆ្នាំ ប្អូនប្រពន្ធ១០ឆ្នាំ ។ ក្រោយរៀបការពួកគេ មិនចុះសម្រុងគ្នា ហើយកូនប្រុសគាត់គេចចេញពីផ្ទះ ទើបកូនប្រសាឈឺចិត្តក៏ផឹកទឹកអាស៊ីតអស់មួយកូនកែវ ហើយគាត់ប្រញាប់ប្រញាល់ដឹកមកមន្ទីរពេទ្យនៅម៉ោង៨ព្រឹកថ្ងៃដដែល ។ គ្រូពេទ្យប្រាប់ថា ស្ថានភាពនេះអាចនឹងធ្ងន់ធ្ងរព្រោះទឹកអាស៊ីតធ្វើឱ្យរលាកពោះវៀន ក្រពះ នឹងអាចគ្រោះថ្នាក់បំផុត ។

ចំណែកករណីមួយទៀត ស្ត្រីឈ្មោះឈៀន គីមហោ អាយុ៣០ឆ្នាំ ដោយសារតែខឹងនឹងប្តីឈ្មោះនៅ សៀត ហៅម៉ៅ ជាអ្នករត់ម៉ូតូឌុប គិតតែដើរផឹកស៊ីមិនជួយធ្វើការងារផ្ទះ ក៏ផឹកថ្នាំប៉ងសម្លាប់ខ្លួនដែរ ដោយផឹកថ្នាំបាញ់កក់ ឈ្មោះពី ដូ កាលពីវេលាម៉ោង៨យប់ថ្ងៃទី២៦ ឧសភា ក្នុងលំនៅឋានដែលស្ថិតក្នុងភូមិក្រោលជីនោះដែរ នាងត្រូវបានដឹកមកសង្គ្រោះនៅមន្ទីរពេទ្យកាលពីវេលាម៉ោង១០យប់ ។ ក្រុមគ្រួសារមិនបានផ្តល់ព័ត៌មានឱ្យបានជាក់លាក់ទេ គ្រាន់តែប្រាប់គ្រូពេទ្យថា នាងបានផឹកថ្នាំបាញ់កក់ ឈ្មោះពី ដូ ព្រោះខឹងនឹងប្តីមិនជួយធ្វើកិច្ចការផ្ទះ ។ ទោះជាយ៉ាងណា ស្ត្រីទាំងពីរនាក់ខាងលើកំពុងស្ថិតក្នុងការសង្គ្រោះរបស់ក្រុមគ្រូពេទ្យខេត្តយ៉ាងយកចិត្តទុកដាក់ ៕