អភិបាលខេត្តប៉ៃលិន ចូលរួមលេងល្បែងប្រជាប្រិយជាមួយពលរដ្ឋ ក្នុងពិធីបុណ្យចូលឆ្នាំ
- ប៉ៃលិន
ខេត្តប៉ៃលិន ៖ កាលពីរសៀលថ្ងៃទី១៥ ខែមេសា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន…
ខេត្តប៉ៃលិន ៖ កាលពីរសៀលថ្ងៃទី១៥ ខែមេសា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញដឹកនាំលេងល្បែងកម្សាន្តប្រជាប្រិយខ្មែរជាមួយបងប្អូនប្រជាពលរដ្ឋ និងភ្ញៀវទេសចរជាតិ អន្តរជាតិ ដែលកំពុងនាំគ្នាធ្វើដំណើរចូលមកលេងក្នុងខេត្តប៉ៃលិន ដើម្បីថែរក្សាប្រពៃណីទំនៀមទម្លាប់របស់ខ្មែរ ក្នុងឱកាសបុណ្យចូលឆ្នាំថ្មី ឆ្នាំមមី អដ្ឋស័ក ព.ស ២៥៧០ គ.ស ២០២៦ ហើយនិងបង្កភាពសប្បាយរីករាយ ថែមទាំងផ្តល់ទុកនូវរូបភាពជាអនុស្សាវរីយ៍ផងដែរ។
ប្រភពព័ត៌មានពីមន្ត្រីសាលាខេត្តប៉ៃលិន បានរៀបរាប់ឱ្យដឹងថា ៖ ក្នុងរយៈពេលប៉ុន្មានថ្ងៃជាប់ៗគ្នានេះ ទាំងថ្នាក់ដឹកនាំខេត្ត ទាំងប្រជាពលរដ្ឋមកពីតាមភូមិនានាក្នុងខេត្ត បាននាំគ្នាលេងល្បែងប្រជាប្រិយ ដូចជាការលេងចោលឈូង ទាញព្រ័ត្រ បោះអង្គុញ លោតបាវ លាក់កន្សែង ស្វាដណ្តើមស្លឹក និងការរាំលេងកម្សាន្តបទប្រពៃណីខ្មែរ ។
ប្រភពដដែលបានបន្តទៀតថា «ថ្ងៃវិរៈវ័នបត» ថ្ងៃពុធ ១៣រោច ខែចេត្រ ឆ្នាំមមី អដ្ឋស័ក ព.ស ២៥៦៩ ត្រូវនឹងថ្ងៃទី១៥ ខែមេសា ឆ្នាំ២០២៦ ពេលរសៀល លេងល្បែងកម្សាន្តប្រជាប្រិយខ្មែរ «នៅវត្តរតនសោភ័ណ ហៅវត្តកោងកាង» ចាប់ផ្តើមពីម៉ោង ១៤ និង០០នាទីរសៀល ដោយលោកជំទាវក៏សូមអញ្ចើញឱ្យបងប្អូនប្រជាពលរដ្ឋចូលរួម «ល្បែងប្រជាប្រិយ៍ជាច្រើនទៀត ជាប្រពៃណីខ្មែរយើង ។
ចំណែកភ្ញៀវទេសចរ និងប្រជាពលរដ្ឋរស់នៅក្នុងតំបន់ខេត្តប៉ៃលិន ពិតជាសប្បាយរីករាយ ក្នុងការចូលរួមលេងជាមួយនឹងថ្នាក់ដឹកនាំ ដោយម្នាក់ៗ មានការសើចក្អាកក្អាយ ពោរពេញទៅដោយអំណរ ហើយថែមទាំងបំបាត់នូវទុក្ខកង្វល់ក្នុងចិត្ត។ ម្យ៉ាងវិញទៀត កម្មវិធីនេះ ធ្វើឱ្យបងប្អូនកូនចៅអ្នករស់នៅក្នុងខេត្តប៉ៃលិន នៅតែនឹកចាំ និងរក្សាទំនៀមទម្លាប់ប្រពៃណីជាតិខ្មែរយើងឱ្យកាន់តែគង់វង់ថែមទៀត។
បើតាមប្រភពព័ត៌មានពីភ្ញៀវទេសចរម្នាក់ ឈ្មោះ សុខ ឡាយ ភេទស្រី រស់នៅខេត្តបាត់ដំបង បានឱ្យដឹងដែរថា ពួកគាត់មានគ្នា៥នាក់ ដោយធ្វើដំណើរចូលមកលេងក្នុងខេត្តប៉ៃលិន បានរយៈពេល២ថ្ងៃហើយ។ តែនៅថ្ងៃនេះ ពួកគាត់ពិតជាសប្បាយខុសពីធម្មតា ដោយបានចូលរួមលេងរាំកម្សាន្តជាមួយនឹងថ្នាក់ដឹកនាំខេត្តប៉ៃលិន ដែលម្នាក់ៗញញឹមបិទមាត់មិនជិតនោះឡើយ ហើយពួកគាត់ក៏មិនធ្លាប់ឃើញបែបនេះពីមុនមកដែរ ទើបតែចូលមកដល់ខេត្តប៉ៃលិនភ្លាម ធ្វើឱ្យពួកគាត់សង្កេតឃើញថ្នាក់ដឹកនាំខេត្តមួយនេះ ជ្រើសរើសយកល្បែងប្រជាប្រិយខ្មែរគ្រប់ប្រភេទ ដែលដូនតាបន្សល់ទុកឱ្យ យកមកលេង និងប្រើប្រាស់ដែលធ្វើឱ្យពួកគាត់ញឹកចងចាំក្នុងខេត្តថា ពេលត្រឡប់ទៅវិញ ប្រាប់ដល់បងប្អូនកូនចៅៗតៗគ្នាឱ្យនាំគ្នាចូលមកលេងក្នុងខេត្តប៉ៃលិន សម្រាប់ឆ្នាំក្រោយៗទៀត៕
ចែករំលែកព័តមាននេះ