សម្តេចតេជោ ហ៊ុន សែន៖ ត្រូវចងចាំ ជោគជ័យ មិនមែន​បាន​មក​ដោយការិយាល័យធ្វើការល្អ រថយន្តទំនើប ខោអាវស្អាតនោះឡើយ​

ភ្នំពេញ៖ នៅល្ងាចថ្ងៃអាទិត្យ ទី២១ ខែមករា ឆ្នាំ២០២៤ សម្តេចតេជោ ហ៊ុន សែន បានបង្ហោះរូបថត ១សន្លឹក អមដោយសំណេរ ដោយបង្ហាញនឹកអាណិតខ្លួន កាលពីធ្វើជា​រដ្ឋមន្ត្រីការបរទេស ក្នុងវ័យ​មិនដល់ ២៧ឆ្នាំ​។ ក្នុងនោះ សម្តេចតេជោ ក៏បានផ្តាំជាចំហ​​ថា ត្រូវចងចាំ ជោគជ័យ មិនមែន​បាន​មក​ដោយការិយាល័យធ្វើការល្អ រថយន្តទំនើប ខោអាវស្អាត​នោះឡើយ​។

សម្តេចតេជោ ហ៊ុន សែន បានលើកឡើងក្នុងបណ្តាញសង្គមថា «ឃើញរូបថតមួយសន្លឹកនេះ នឹកអាណិតខ្លួន។ ធ្វើរដ្ឋមន្ត្រីការបរទេស ក្នុងវ័យមិនទាន់គ្រប់ ២៧ឆ្នាំ មិនទាន់​បានជួបប្រពន្ធកូន មានរបបស្បៀង ១៦គីឡូ ក្នុងនោះ អង្ករ ១០គីឡូ ពោត​ ក្រហម ៦គីឡូ។ ងាកមកសម្លៀកបំពាក់ ខ្ញុំមានខោអាវធំ​តែមួយសម្រាប់នេះទេ ដែលជាជំនួយ របស់មិត្តវៀតណាម (រូបថតនេះ ថតនៅ​ប្រហែលពាក់កណ្តាលខែកុម្ភៈ ឆ្នាំ១៩៧៩ មុនពេលខ្ញុំជួបភរិយា និងកូនខ្ញុំ)»។

សម្តេចតេជោ ហ៊ុន សែន បន្ថែមថា «ខោអាវធំនេះ មិនបានវាស់កាត់ទេ បានជាខោវែងជាងជើង អាវធំជាងខ្លួន។ ឯអាវក្នុង មានតែ ២ទេ ស្បែកជើង ទៅ រើសនៅផ្សារថ្មីម្ខាងធំ ម្ខាងតូច ពាក់ឈឺ​ជើង ស្ទើរដើរមិនរួច»។

សម្តេចតេជោ ហ៊ុន សែន បន្តទៀតថា «តែទោះយ៉ាងណា ខោអាវមិនស្អាតនេះ មិនរំខានការងារ​ខ្ញុំ​នោះទេ វាតាមបំរើខ្ញុំ ទាំងនៅភ្នំពេញ ហាណូយ មូស្គូ កំឡំបូ ប្រទេសស្រីលង្កា នៅពេលខ្ញុំធ្វើ​ដំណើរ​ទៅ​ប្រជុំ​ប្រទេស នៃចលនាមិនចូលបក្សសម្ព័ន្ធ»។

សម្តេចតេជោ ហ៊ុន សែន បន្ថែមថា «ខោអាវមួយសម្រាប់នេះ វាបានជួយឱ្យខ្ញុំទទួលបាន​ជោគ​ជ័យ​រយៈពេលជាង ៤៥ឆ្នាំ កន្លងមក។ ជោគជ័យ ដែលបានមកដោយការលំបាក គឺជោគជ័យ ដែល​មោទកភាព និងត្រូវចេះថែរក្សាឱ្យខាងតែបាន»។

សម្តេចតេជោ ហ៊ុន សែន បានគូសបញ្ជាក់ ដោយផ្តាំជាចំហថា «ត្រូវចងចាំ ជោគជ័យ មិនមែន​បាន​មក​ដោយការិយាល័យធ្វើការល្អ រថយន្តទំនើប ខោអាវស្អាតនោះឡើយ តែបានមកដោយ​ចេះធ្វើ​ការ ដោយមានប្រសិទ្ធភាព ដើម្បីបំរើដល់ផលប្រយោជន៍ជាតិ និងប្រជាជន»៕