សិង្ហបុរី៖ ថ្ងៃនេះ អតីតរដ្ឋមន្ត្រីក្រសួងដឹកជញ្ជូនសិង្ហបុរី លោកអ៊ីស្វារ៉ាន (Iswaran) (ប្រហែលជាជាប់សែស្រឡាយឥណ្ឌា) ត្រូវនាំខ្លួនឡើងតុលាការ និងចោទប្រកាន់ពីបទពុករលួយ។ នេះជាករណីដ៏កម្រដែលសិង្ហបុរីកាត់ទោសមន្ត្រីជាន់ខ្ពស់ដល់កម្រិតរដ្ឋមន្ត្រី។ លោកត្រូវចាប់ខ្លួនកាលពីខែកក្កដា…
សិង្ហបុរី៖ ថ្ងៃនេះ អតីតរដ្ឋមន្ត្រីក្រសួងដឹកជញ្ជូនសិង្ហបុរី លោកអ៊ីស្វារ៉ាន (Iswaran) (ប្រហែលជាជាប់សែស្រឡាយឥណ្ឌា) ត្រូវនាំខ្លួនឡើងតុលាការ និងចោទប្រកាន់ពីបទពុករលួយ។ នេះជាករណីដ៏កម្រដែលសិង្ហបុរីកាត់ទោសមន្ត្រីជាន់ខ្ពស់ដល់កម្រិតរដ្ឋមន្ត្រី។ លោកត្រូវចាប់ខ្លួនកាលពីខែកក្កដា ឆ្នាំ២០២៣ ហើយត្រូវជាប់ចោទពីបទទទួលប្រាក់សំណូកជាង៣សែនដុល្លារសិង្ហបុរី ឬស្មើនឹងជាង២,៨សែនដុល្លារអាមេរិកពីសេដ្ឋីអចលនទ្រព្យម្នាក់ដើម្បីជួយការពារមុខរបររកស៊ីរបស់គាត់។
យោងតាមឯកសារដាក់បន្ទុក, គេឃើញថាលោកអ៊ីស្វារ៉ានទទួលសំណូកជាសំបុត្រមើលបាល់ទាត់ជាច្រើនសន្លឹក ឧបករណ៍ភ្លេង ការធ្វើដំណើរនៅលើយន្តហោះឯកជនរបស់សេដ្ឋីរូបនេះ និងសំបុត្រចូលទស្សនាការប្រណាំងរថយន្តហ្វ័រម្ញូឡាវាន់ (Formula 1) នៅសិង្ហបុរី។ លោកត្រូវបានតែងតាំងជាទីប្រឹក្សាគណៈកម្មការប្រកួត នៅពេលសេដ្ឋីរូបនោះធ្វើជាម្ចាស់ផ្ទះ។
សម្រាប់ពេលនេះ លោកអ៊ីស្វារ៉ានជាប់បណ្ដឹងចំនួន២៧ករណី។ ក្នុងនោះ ក៏មានបណ្ដឹងពាក់ព័ន្ធនឹងអំពើពុករលួយ និងរារាំងការអនុវត្តច្បាប់។ នៅក្នុងលិខិតលាលែងពីតំណែង (ក្រោយផ្ទុះរឿងអាស្រូវ) ដែលផ្សព្វផ្សាយដោយខុទ្ទកាល័យនាយករដ្ឋមន្ត្រី លោកអ៊ីស្វារ៉ានសូមបដិសេធការចោទប្រកាន់ទៅលើរូបលោក និងសូមសិទ្ធិដើម្បីលាងសម្អាតកិត្តិយសរបស់លោក។ បើតុលាការរកឃើញកំហុសដូចការចោទប្រកាន់ លោកអាចជាប់ពន្ធនាគារ៧ឆ្នាំ និងពិន័យជាប្រាក់១សែនដុល្លារសិង្ហបុរី។
ចំពោះសេដ្ឋីម្នាក់ដែលពាក់ព័ន្ធនឹងការសូកប៉ាន់, អ្នកសារព័ត៌មានព្យាយាមទាក់ទងតាមអ៊ីមែល (email) ទៅការិយាល័យរបស់គាត់ដើម្បីស្នើសុំការឆ្លើយបំភ្លឺ។ ប៉ុន្តែគ្មានចម្លើយ។ គាត់ត្រូវចាប់ខ្លួនកាលពីខែកក្កដា ឆ្នាំ២០២៣។ ប៉ុន្តែរដ្ឋអាជ្ញាមិនទាន់ចោទប្រកាន់ទៅតុលាការនៅឡើយទេ។ សំណុំរឿងនេះកំពុងល្បីកក្រើកសិង្ហបុរីដែលជាប្រទេសតូចមានផ្ទៃដីជាង៧៣៤គីឡូម៉ែត្រការ៉េ ប៉ុន្តែជាប្រទេសដែលល្បីថាមិនសូវប្រឡាក់ប្រឡូសនឹងអំពើពុករលួយ។
អ្នកបម្រើការនៅស្ថាប័នរដ្ឋាភិបាលគ្រប់លំដាប់ថ្នាក់ (អ្នករដ្ឋការ) ត្រូវរដ្ឋផ្ដល់ប្រាក់បៀវត្សខ្ពស់ៗដើម្បីកុំឱ្យពួកគេត្អូញត្អែរថាប្រាក់ខែតិចចាយមិនគ្រប់គ្រាន់ ឬកុំឱ្យពួកគេជាប់ជំពាក់វាក់វិននឹងអំពើពុករលួយ។ រដ្ឋមន្ត្រីនៅសិង្ហបុរីទទួលបានប្រាក់បៀវត្សលើសពីមួយលានដុល្លារសិង្ហបុរី ឬជាង៧០ម៉ឺនដុល្លារអាមេរិកក្នុងមួយឆ្នាំៗ។ ដូច្នេះ ធ្វើជារដ្ឋមន្ត្រីត្រឹមតែបួនប្រាំឆ្នាំអាចសល់លុយរាប់លានដុល្លារទុកដេកស៊ីចាយពេលចូលនិវត្ត។ ប៉ុន្តែទំហំចិត្តរបស់មនុស្សយើងមិនចេះស្កប់ស្កល់ទេ។
នៅក្នុងចំណោមប្រទេស១៨០ដែលវាយតម្លៃកាលពីឆ្នាំ២០២២ សិង្ហបុរីជាប់ចំណាត់ថ្នាក់ទី៥ជាប្រទេសមិនសូវមានអំពើពុករលួយ។ លោកអ៊ីស្វារ៉ានសព្វថ្ងៃនេះមានអាយុ៦១ឆ្នាំ។ ឆ្នាំ២០០៦លោកចូលរួមធ្វើការនៅក្នុងរដ្ឋាភិបាលរបស់លោកលីស៊ានលូង (Lee Hsien Loong) ដែលជាកូនប្រុសរបស់បិតាស្ថាបនិករដ្ឋសិង្ហបុរីសម័យទំនើប លោកលីក្វាន់យូ។ កាលនោះ លោកកាន់តំណែងនៅក្នុងក្រសួងពាណិជ្ជកម្ម និងទូរគមនាគមន៍។ បន្ទាប់មកនៅឆ្នាំ២០២១ លោកជារដ្ឋមន្ត្រីក្រសួងដឹកជញ្ជូន៕
ប្រភព៖ Reuters
https://www.reuters.com/world/asia-pacific/singapore-transport-minister-charged-court-graft-case-local-media-2024-01-18/
ចែករំលែកព័តមាននេះ