ស្របពេលដែលករណីទូទាត់លុយតាមប្រព័ន្ធឌីជីថលមានការច្រឡំកាន់តែច្រើន ជាពិសេស គឺរវាងលុយរៀល និងលុយដុល្លារ ប្រតិបត្តិការហិរញ្ញវត្ថុត្រូវបានលើកទឹកចិត្តឲ្យ ពង្រឹងការប្រុង ប្រយ័ត្ន និងបញ្ជ្រៀបការយល់ដឹងពីការប្រើប្រាស់ប្រព័ន្ធទូទាត់ឌីជីថលនេះ។
ការរីកចំរើននៃបច្ចេកវិទ្យាទូទាត់លុយតាមឌីជីថលក្នុងរយៈពេលប៉ុន្មានឆ្នាំចុងក្រោយនេះ មាន កំណើនកាន់តែច្រើន មិនថាការទូទាត់តាមប្រព័ន្ធ QR Code ឫក៏ការតាមប្រព័ន្ធទូរស័ព្ទ នោះទេ ប៉ុន្តែចំណុចហានិភ័យមួយដែលកើតមានជារឿយៗគឺករណី ច្រឡំការទូទាត់ គ្នារវាង លុយរៀលនិងលុយដុល្លារ។
តាមរយៈការវិវត្តទាំងនេះ ធ្វើអោយធនាគារជាតិនៃកម្ពុជា បានជំរុញអោយគ្រឹះស្ថានហិរញ្ញាវត្ថុ នានាបង្កើនការយកចិត្តទុកដាក់ជួយដោះស្រាយបញ្ហារបស់អតិថិជន និងពង្រឹង សមត្ថភាព ក្នុងការទប់ទល់ការវាយប្រហារតាមប្រព័ន្ធទូទាត់តាមប្រព័ន្ធអ៊ីនធឺណិត ក៏ដូចជាការអប់រំ ពលរដ្ឋពីការប្រើប្រាស់ប្រព័ន្ធទូទាត់ឌីជីថល។
លោកស្រី ជា សិរី អគ្គទេសាភិបាលធនាគារជាតិនៃកម្ពុជា បានកត់សម្គាល់នាពេលថ្មីៗនេះ ថា ស្របពេលដែលការទូទាត់តាមប្រព័ន្ធអេឡិចត្រូនិកនៅកម្ពុជាមានការរីកចម្រើនខ្លាំងនៅមួយរយៈចុងក្រោយ ការឆបោក និងការវាយប្រហារប្រព័ន្ធទូទាត់តាមប្រព័ន្ធអ៊ិនធឺណិត ក៏បានកើត មានឡើងច្រើនគួរឱ្យកត់សម្គាល់ផងដែរ ដែលទាមទារឱ្យភាគីពាក់ព័ន្ធបង្កើន ការយកចិត្ត ទុកដាក់បន្ថែមទៀតលើបញ្ហានេះ។
លោកស្រី កត់សម្គាល់ឃើញថា ការប្រើប្រាស់ប្រព័ន្ធទូទាត់អេឡិចត្រូនិក បានកើន ឡើងយ៉ាងឆាប់រហ័ស ជាពិសេសបន្ទាប់ពីវិបត្តិកូវីដ-១៩ ដោយក្នុងនោះប្រតិបត្តិការទូទាត់ តាមរយៈប្រព័ន្ធបាគង និងខេអេចឃ្យូអរ បានកើនឡើងគួរឱ្យកត់សម្គាល់ ដែលបានរួម ចំណែក សម្រួលពាណិជ្ជកម្ម ទេសចរណ៍ ការវិនិយោគ និងការផ្ទេរប្រាក់ពីក្រៅប្រទេស ព្រមទាំងលើកកម្ពស់បរិយាបន្នហិរញ្ញវត្ថុផងដែរ។
ពាក់ព័ន្ធនឹងករណី លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុកម្ពុជា បានអោយកម្មវិធីលុយ នៃសារព័ត៌មានកោះសន្តិភាពដឹងថា សមាគម និងគ្រប់ភាគី ពាក់ព័ន្ធតែងតែយកចិត្តទុកដាក់អប់រំ ផ្សព្វផ្សាយ និងបញ្ជ្រាបដល់អតិថិជនរបស់ខ្លួន គ្រប់សកម្មភាពក្នុងការទូទាត់ដោយប្រើប្រាស់ប្រព័ន្ធឌីជីថលនេះ។
លោក កាំង តុងងី បន្តថា «កន្លងមកសមាគមមីក្រូហិរញ្ញាវត្ថុកម្ពុជា អ្នកពាក់ព័ន្ធ ជាពិសេស សមាជិក ជាយុទ្ធសាស្ត្រយើងផ្តោតទៅលើការអប់រំ និងបញ្ជ្រៀបការយល់ដឹង ដល់ប្រជាពល រដ្ឋនូវការប្រើប្រាស់សេវា ហិរញ្ញាវត្ថុទាំងប្រព័ន្ធអនឡាញ និងប្រព័ន្ធឌីជីថលនេះជាដើម។ យើងធ្វើការអប់រំអោយពួកគាត់យល់ដឹងពីហានិភ័យផ្សេងៗពីការ ប្រើប្រាស់នូវប្រព័ន្ធឌីជីថល ទាំងអស់នេះ»។
លោក កាំង តុងងី បន្តថា យើងក៏ធ្វើការសហការជាមួយក្រសួងមហាផ្ទៃ រួមនិងប៉ូលិសជាតិក្នុងការផ្លាស់ប្តូរប្រព័ន្ធព័ត៌មានក្នុងការជំរុញ ក្នុងការរាយការណ៍ ក្នុងពេលដែលមានបញ្ហា ប្រឈមកើតឡើងជាមួយនិងអតិថិជនជាដើម។
លោក សុខ សីហា ជាអ្នកប្រើប្រាស់ការទូទាត់ប្រាក់តាមប្រព័ន្ធឌីជីថល បានអោយដឹងថា ការទូទាត់ប្រាក់ឌីជីថលពិតជាមានភាពងាយស្រួល ប៉ុន្តែទាមទារអោយមានការយល់ ដឹង ពីការប្រើប្រាស់ការផ្ទេរសាច់ប្រាក់អោយបានត្រឹមត្រូវ ប្រាកដច្បាស់លាស់ ដើម្បីចៀសវាងការទូទាត់ខុស និងពិបាកក្នុងការបង្វែរសាច់ប្រាក់ត្រឡប់មកវិញ។
អាជីវកររូបនេះ និយាយថា ការទូទាត់ច្រឡំចំពោះខ្លួននៅមិនទាន់កើតមាននោះទេ ដោយសារ តែខ្លួនប្រើប្រាស់គណនីជាប្រាក់រៀលច្រើនជាងប្រាក់ដុល្លរ ។ ហើយក៏ជាការទូទាត់តិចតួចមិនធំដុំ ច្រើនករណីស្មុគស្មាញ និងម្យ៉ាងទៀតខ្លួនលោកក៏នៅតែប្រើប្រាស់ការទូទាត់សាច់ប្រាក់ផ្ទាល់ច្រើនជាង។
គិតត្រឹមឆ្នាំ២០២៣ ចំនួនគណនីអីវាឡតសរុបមានជិត២០លានគណនី និងទំហំប្រតិបត្តិការ សេវាទូទាត់បានកើនឡើង១៨% ដល់ជិត៧៦ពាន់លានដុល្លារ ស្មើនឹង២,៤ដង នៃផលិតផល ក្នុងស្រុកសរុបរបស់កម្ពុជា៕
ចែករំលែកព័តមាននេះ