(អន្តរជាតិ)៖ កាសែត Ladbible បានរាយការណ៍ថា Kabosu ដែលជាឆ្កែនៃពូជ Shiba បានស្លាប់នៅព្រឹកថ្ងៃទី២៤ ខែឧសភានៅក្នុងប្រទេសជប៉ុន នៅអាយុ១៧ឆ្នាំ នេះបើយោងតាមម្ចាស់របស់ Kabosu គឺលោកស្រី Atsuko Sato។

ម្ចាស់របស់ឆ្កែ Kabosu បាននិយាយថា «Kabosu បានទទួលមរណភាពនៅក្នុងដៃរបស់ខ្ញុំ។ ទោះបីជាខ្ញុំសោកសៅក៏ដោយ ខ្ញុំក៏មានអារម្មណ៍ដឹងគុណចំពោះឱកាសដែលបានរស់នៅជាមួយ Kabosu អស់រយៈពេល១៧ឆ្នាំមកហើយ។ Kabosu បាននាំមកនូវសេចក្តីរីករាយដល់មនុស្សជាច្រើននៅជុំវិញពិភពលោក»។

មរណភាពរបស់ Kabosu គឺជាការបាត់បង់ដ៏ធំធេងសម្រាប់សហគមន៍អនឡាញ។ រូបភាពរបស់ Kabosu បានបង្ហាញខ្លួនជាលើកដំបូងនៅលើអ៊ីនធឺណិតក្នុងឆ្នាំ២០១០ ហើយបានក្លាយទៅជា meme ដែលរីករាលដាលទូទាំងពិភពលោកយ៉ាងឆាប់រហ័ស។ ក្នុងឆ្នាំ២០១៣ ឆ្កែKabosu ត្រូវបាន បោះឆ្នោតជា “Top Meme” ប្រចាំឆ្នាំដោយ Know Your Meme ។

ប្រជាប្រិយភាពនៃ Kabosu ធ្វើឱ្យរូបរបស់ Kabosu ត្រូវគេយកទៅដាក់រូបិយប័ណ្ណគ្រីបតូដែលមានឈ្មោះ Dogecoin។ នៅឆ្នាំ២០២១ Dogecoinបានក្លាយជា NFT meme ដែលមានតម្លៃថ្លៃបំផុតរហូតមកដល់បច្ចុប្បន្ន។ រូបភាពនិមិត្តសញ្ញារបស់ Dogecoin ត្រូវបានដេញថ្លៃជានិមិត្តសញ្ញា NFT ក្នុងតម្លៃជិត៤លានដុល្លារអាមេរិក នេះ បើយោងតាម ​​NBC ។

លោកស្រី Sato នឹងរៀបចំពិធីបុណ្យសម្រាប់ឆ្កែ Kabosu នៅថ្ងៃទី២៦ ខែឧសភា នៅ Flower Kaori ក្នុងទីក្រុង Kotsu no Mori ទីក្រុង Narita (Chiba ប្រទេសជប៉ុន)៕