អ៊ី​តា​លី ៖ បន្ទាប់​ពី​ចំណាយពេល​៩២៩​ថ្ងៃ​ជាមួយ​ការងារ​គ្រូបង្វឹក​នៅ​លី​គ​បាល់ទាត់​កំពូល​អ៊ី​តា​លី លោក José Mourinho កាលពី​ថ្ងៃ​ទី​១៦ ខែមករា ឆ្នាំ​២០២៤ ត្រូវ​បាន​ក្លិប​ចចក​ញី AS Roma បណ្តាញ​ចេញពី​តំណែង​គ្រូបង្វឹក​ហើយ​។

ក្លិប AS Roma បាន​ប្រកាស​ថា លោក Jose Mourinho និង​បុគ្គលិក​គ្រូបង្វឹក​របស់​គាត់​បាន​ចាក​ចេញពី​ក្លិប ហើយ​កៅអី​របស់​គ្រូបង្វឹក​សញ្ជាតិ​ព័រ​ទុ​យ​ហ្គា​ល់​អាយុ​៦០​ឆ្នាំ​រូប​នេះ ត្រូវ​បាន​ជំនួស​ដោយ​វីរបុរស​ក្លិប Roma គឺ​លោក Daniele De Rossi អាយុ​៤០​ឆ្នាំ អតីត​ខ្សែបម្រើ​ការពារ​ឆ្នើម​ក្រុម​ជម្រើស​ជាតិ​អ៊ី​តា​លី​។ លោក De Rossi ដែល​ស៊ុត​បញ្ចូល​ទី ៦៣​គ្រាប់​ពី​ការ​បង្ហាញខ្លួន ៦១៦​ប្រកួត​សម្រាប់ Roma អំឡុង​ពេល​អាជីព​១៨​ឆ្នាំ​ជាមួយ​ក្លិប​អ៊ី​តា​លី​មួយ​នេះ ត្រូវ​បាន​ផ្តល់​កុងត្រា​ក្នុង​នាម​គ្រូបង្វឹក​រហូត​ដល់​ថ្ងៃ​ទី​៣០ ខែមិថុនា ឆ្នាំ​២០២៤​។

លោក Mourinho ត្រូវ​បាន​តែងតាំង​ជា​គ្រូបង្វឹក​ក្រុម Roma កាលពី​ខែឧសភា ឆ្នាំ ២០២១ ហើយ​បាន​ដឹកនាំ​ក្រុម​អ៊ី​តា​លី​មួយ​នេះ​ឈ្នះ​ពានរង្វាន់ UEFA Europa Conference League នៅ​ឆ្នាំ ២០២២ ខណៈ​ដែល​កាលពី​ឆ្នាំ​មុន លោក​ក៏​បាន​ដឹកនាំ​ក្រុម​ឡើង​ដល់​វគ្គ​ផ្ដាច់ព្រ័ត្រ​ពានរង្វាន់ UEFA Europa League ប៉ុន្តែ​ចាញ់ Sevilla ដោយ​ការ​ទាត់​បាល់​ប៉េ​ណា​ល់​ទី​កាត់សេចក្តី​។

ដើម្បី​បណ្តាញ​លោក Jose Mourinho ចេញពី​តំណែង​មុន​ពេល​កុងត្រា​អស់​សុពលភាព​នៅ​ចប់​រដូវ​កាល​នេះ Roma ត្រូវ​បង់​៦​លាន​ដុល្លារ​អា​មេ​រិ​ក​សម្រាប់​គ្រូបង្វឹក​រូប​នេះ​។ ដូច្នេះ​គិត​រហូត​មក​ទល់​ពេល​នេះ លោក Mourinho រក​ប្រាក់​បាន​រហូត​ដល់ ១៦៧​លាន​ដុល្លារ​អា​មេ​រិ​ក​ហើយ ដោយ​ត្រូវ​បណ្តេញ​ចេញពី​តំណែង​ជា​គ្រូបង្វឹក​មុន​ពេល​កំណត់​ចំនួន​៦​ដង ដោយ​ក្លិប​ចំនួន ៥ ផ្សេង​គ្នា​រួម​មាន ៖

-Chelsea ឆ្នាំ ២០០៧ (​បណ្តាញ​លើក​ទី​១) បង់ ៣៧​លាន​ដុល្លារ
-Real Madrid ឆ្នាំ ២០១៣ បង់ ៣៥​លាន​ដុល្លារ
-Chelsea ឆ្នាំ ២០១៥(​បណ្តាញ​លើក​ទី​២) បង់ ១៧​លាន​ដុល្លារ
-Manchester United ឆ្នាំ ២០១៨ បង់ ៤១​លាន​ដុល្លារ
-Tottenham Hotspur ឆ្នាំ ២០២១ បង់ ៣១​លាន​ដុល្លារ
-Roma ឆ្នាំ ២០២៤ បង់ ៦​លាន​ដុល្លារ

គួរ​បញ្ជាក់​ថា អាជីព​ជា​គ្រូបង្វឹក​ចាប់តាំងពី​ឆ្នាំ ២០០០ លោក Jose Mourinho ធ្លាប់​ដឹកនាំ​ក្រុម Benfica, Uniao de Leiria, Porto, Chelsea, Inter Milan, Real Madrid, Manchester United, Tottenham Hotspur និង Roma៕ (​ប្រភព ៖ CNN, AP និង NZ Herald)